Perunun paytaxtı Limada Azərbaycanla Peru arasında diplomatik münasibətlərin qurulmasının 30 illiyinə həsr olunmuş sərginin təntənəli açılış mərasimi keçirilib.
AZƏRTAC xəbər verir ki, Peru Xarici İşlər Nazirliyində təşkil olunan tədbir iki ölkə arasında üç onillik ərzində formalaşmış siyasi, diplomatik, mədəni və humanitar əməkdaşlığın inkişaf yolunu əks etdirib.
Peru Xarici İşlər Nazirliyi və Azərbaycanın Perudakı diplomatik nümayəndəliyinin birgə təşkilatçılığı ilə keçirilən tədbirin açılış mərasimində çıxış edən Azərbaycanın Meksika Birləşmiş Ştatlarındakı, eyni zamanda, Peruda akkreditə olunmuş səfiri Seymur Fətəliyev xatırladıb ki, Azərbaycan ilə Peru arasında diplomatik münasibətlər 25 iyun 1996-cı ildə qurulub. O bildirib ki, ötən 30 il ərzində ölkələr arasında siyasi dialoq, parlamentlərarası əməkdaşlıq, beynəlxalq təşkilatlar çərçivəsində qarşılıqlı dəstək, eləcə də mədəniyyət və təhsil sahələrində əlaqələr davamlı inkişaf edib.
Vurğulanıb ki, 2025-ci ildə Azərbaycan və Peru Xarici İşlər nazirlikləri arasında ilk siyasi məsləhətləşmələrin keçirilməsi ikitərəfli münasibətlərdə yeni mərhələnin başlanğıcı olub. Qarşılıqlı rəsmi səfərlər, parlamentlərarası təmaslar və mədəni-humanitar əməkdaşlıq ölkələr arasında dostluq münasibətlərinin daha da möhkəmlənməsinə mühüm töhfə verib.
Qeyd edilib ki, açılışı keçirilən sərgi təkcə son 30 ilin diplomatik salnaməsini nümayiş etdirmir, həm də Azərbaycan ilə Peru arasında formalaşmış etibarlı tərəfdaşlığın və gələcək əməkdaşlıq perspektivlərinin rəmzidir.
Peru xarici işlər nazirinin müavini, səfir Erik Anderson son otuz ildə iki ölkə arasında formalaşmış dostluq münasibətlərini yüksək qiymətləndirərək siyasi dialoqun, iqtisadi, mədəni və humanitar əməkdaşlığın gələcək illərdə daha da genişlənəcəyinə əminliyini ifadə edib.
Mərasim çərçivəsində diplomatik münasibətlərin 30 illiyi münasibətilə hazırlanmış birgə yubiley poçt açıqcası, poçt zərfi və xüsusi poçt möhürü də ictimaiyyətə təqdim olunub. Peru Poçt Xidmətinin nümayəndəsi Xorxe Santa Kruz Montero bildirib ki, bu filateliya məhsulları Azərbaycan və Peru arasında dostluğun, qarşılıqlı hörmətin və əməkdaşlığın simvolunu əks etdirir.
Yubiley poçt açıqcası və zərfin dizaynında füsunkar Göygöl ilə Perunun dünyaşöhrətli Titikaka gölü təsvir olunub. Bu təsvirlər hər iki ölkənin zəngin təbiətini, milli irsini və mədəni dəyərlərini simvolizə edir.
Poçt möhüründə isə Azərbaycanın memarlıq inciləri olan Qız qalası və Alov qüllələri, həmçinin Perunun tarixi simvollarından biri olan Maçu-Pikçu əks olunub. Bu dizayn coğrafi baxımdan uzaq məsafədə yerləşən iki ölkəni dostluq, qarşılıqlı hörmət və əməkdaşlıq kimi ortaq dəyərlər ətrafında birləşdirən rəmzi mesaj daşıyır.
Tədbir çərçivəsində yubiley poçt zərfinin rəsmi möhürlənməsi mərasimi də keçirilib. Mərasimdə səfir Seymur Fətəliyev, Peru xarici işlər nazirinin müavini Erik Anderson və Peru Poçt Xidmətinin nümayəndələri iştirak ediblər.
Rəsmi hissədən sonra qonaqlar Azərbaycan–Peru münasibətlərinin 30 illik tarixini əks etdirən sərgi ilə tanış olublar. Ekspozisiyada 1996-cı ildən bu günədək ikitərəfli əlaqələrin inkişafını əks etdirən fotoşəkillər, arxiv sənədləri və müxtəlif materiallar nümayiş etdirilib. Sərgidə yüksəksəviyyəli qarşılıqlı səfərlər, diplomatik görüşlər, Xarici İşlər nazirlikləri arasında ilk siyasi məsləhətləşmələr, beynəlxalq təşkilatlar çərçivəsində əməkdaşlıq, eləcə də mədəni, akademik və humanitar əlaqələrin əsas mərhələləri geniş şəkildə təqdim olunub.
İştirakçıların böyük marağına səbəb olan sərgi 15 gün ərzində ziyarətçilər üçün açıq olacaq və Azərbaycan ilə Peru arasında dostluq münasibətlərinin zəngin tarixini nümayiş etdirməyə davam edəcək.
