Azərbaycan hərbi potensialını daha da gücləndirməklə regionda sabitliyi təmin etmək niyyətindədir

"2024-cü ilin dürüstləşmiş büdcəsində müdafiə və milli təhlükəsizlik xərcləri 705 milyon manat artırılaraq 7 milyard 126 milyon manata çatdırılıb. Hərbi xərclərin artırılması bütövlükdə müdafiə və milli təhlükəsizliyin gücləndirilməsinin prioritet olduğunu göstərir".
Bu sözləri qəzetimizə açıqlamasında Milli Məclisin deputatı Vüqar Bayramov deyib. Deputat bildirib ki, Azərbaycan həm müdafiə qabiliyyətinin daha da gücləndirilməsi, həm də milli təhlükəsizliyin möhkəmlənməsinə xüsusi önəm verən ölkələrdəndir. Təbii ki, məqsəd Cənubi Qafqazda formalaşmış və bütövlükdə regionun inkişafına xidmət edən yeni düzənin qorunub saxlanılmasından ibarətdir. "Azərbaycan heç bir halda müharibənin tərəfdarı deyil, sülhün və xüsusən də dayanıqlı sülhün əldə edilməsində maraqlıdır. Bununla da praktiki olaraq sülhə töhfə verən ölkələrdən biridir. Sözsüz ki, özünümüdafiə, ərazi bütövlüyü və suverenliyimizin qorunması prioritetdir və bu da təbii ki, müdafiə və milli təhlükəsizlik xərclərinin artırılmasını tələb edir", - deyə o əlavə edib.
V.Bayramov qeyd edib ki,  Azərbaycanın təxminən dörd il əvvəl müharibə aparmış ölkə olduğunu nəzərə alsaq, bu, xüsusən maddi-texniki bazanın yenidən gücləndirilməsinə ehtiyac olduğundan xəbər verir. Təbii ki, bütün bunlar fonunda dövlət büdcəsinin bu istiqamətlərinə ayrılan vəsaitin həcminin artırılmasını müşahidə edirik. Bu, birmənalı şəkildə Azərbaycanın müdafiə gücünü daha da artırmaqla, ərazi bütövlüyü və suverenliyinin tam bərpa olunmasından sonra məhz bu düzənin qorunub saxlanmasına xidmət edən prioritet istiqamət olduğunu bir daha göstərir. Ona görə də hərbi xərclərimizin artmasında məqsəd stabilliyə, sülhə töhfə verməkdir. 
Deputat vurğulayıb ki, Azərbaycan hərbi xərclərini artırmaqla bir sıra ölkələrdən fərqli olaraq müharibə etmək niyyətində deyil. Yeganə niyyət regionda sülhə və stabilliyə töhfə verməkdir.

Əsmər QARDAŞXANOVA,
"Azərbaycan"