Mən Maqsud İbrahimbəyovu həyatım boyu xatırlayacağam.
Bu barədə AZƏRTAC-a tanınmış jurnalist, Rusiya Federasiyasının Əməkdar jurnalisti Mixail Qusman Maqsud İbrahimbəyovun “Neft bumu hər kəsə gülümsəyir” pyesinin daxil olduğu kitabın təqdimatı zamanı bildirib.
Bakı Kitab Mərkəzində təşkil edilən tədbir yazıçının 90 illik yubileyinə həsr olunmuş festival çərçivəsində keçirilib və Maqsud İbrahimbəyovu şəxsən tanıyan, onun yaradıcılığının uzun müddət pərəstişkarı olaraq qalan insanları bir araya gətirib.
“Maqsud gənc yaşlarımdan bəri həyatımda xüsusi yer tutub. Böyük qardaşımla dost olmaqla yanaşı, atamla da gözəl münasibətləri var idi. O, evimizə gələrdi və onların ünsiyyətini izləmək əsl sevinc idi. Cəsarətlə deyə bilərəm ki, mən də onun dostu idim və bu dostluğa çox dəyər verirdim. Mənim üçün Maqsud, bir daha vurğulayıram ki, həyatımın xüsusi bir parçasıdır”, - deyə Mixail Qusman vurğulayıb.
O qeyd edib ki, Maqsud İbrahimbəyov haqqında çox uzun və ətraflı danışmaq olar.
“O, təkcə Azərbaycanın dahi mədəni və ədəbi fenomeni deyil. Maqsud qlobal səviyyəli bir insandır. Onda hər şey – həm ədəbi istedad miqyası, həm erudisiya, həm də dünyaya fəlsəfi baxış birləşirdi... Bütün bunlar birlikdə Maqsudu Azərbaycan üçün əbədi olaraq görkəmli şəxsiyyət halına gətirib. Mən hesab edirəm ki, heç də hər bir xalqın Maqsud kimi görkəmli ədəbi nəhəngləri yoxdur”, - deyə o qeyd edib.
Mixail Qusmanın sözlərinə görə, Maqsud İbrahimbəyovun yaradıcılığı bu gün üçün tamamilə müasirdir: “Onun hekayələri gələcək nəsil üçün də maraqlı olaraq qalır. Məsələn, oğlumun Maqsudun kitabları ilə böyüdüyü və onun əsərlərinə heyran qaldığı mənim üçün çox xoşdur. Artıq qeyd etdiyim kimi, onun məşhur “Ondan yaxşı qardaş yox idi” hekayəsi, mənim fikrimcə, rus olmayan bir yazıçı tərəfindən rus dilində yazılmış ən yaxşı ədəbi əsərdir”.
Maqsud İbrahimbəyovun rus dilində yazdığını qeyd edən Mixail Qusman yazıçının ədəbi miqyasının dil məhdudiyyətlərini aşdığını vurğulayıb.
“Xatırlayıram, əgər səhv etmirəmsə, “Gülüstan” Sarayında Maqsudun altmışıncı doğum günü qeyd olunanda, bayram tədbirində iştirak edən Heydər Əliyev onu təbrik edib, mükafatlandırararaq çox müdrik fikir söylədi: Nəsimi və Nizami Azərbaycan dilində deyil, fars və ərəb dillərində yazırdılar, lakin buna baxmayaraq, onlar dahi Azərbaycan şairləridir. Rus dilində yazan Maqsud da əbədi olaraq Azərbaycan ədəbiyyatının klassiki olaraq qalacaq”, - deyə Mixail Qusman bildirib.
