Mən elə bir nəslin nümayəndəsiyəm ki, həm insani, həm də peşəkar formalaşma dövrümüz 1969-cu ildə Heydər Əliyevin respublikaya rəhbərlik etməyə başladığı illərə təsadüf edir. Həmin vaxt mən çox gənc idim, lakin bu hadisə bizim hamımız üçün böyük miqyaslı dönüş nöqtəsi oldu. Cəmi bir neçə ay ərzində Azərbaycan Sovet İttifaqının ən parlaq, qabaqcıl və güclü respublikalarından birinə çevrilməyə başladı.
AZƏRTAC xəbər verir ki, bunu jurnalistlərlə söhbətində tanınmış rusiyalı jurnalist, bakılı Mixail Qusman bildirib.
“Biz respublikamızla və liderimizlə səmimi şəkildə qürur duyurduq və o vaxtdan artıq onu məhz lider kimi qəbul edirdik. Heydər Əliyev gənc idi, güclü və enerjili idi, hələ 50 yaşı tamam olmamışdı. O, güc, iradə və əminlik saçırdı. Biz heç olmasa nədəsə ona bənzəməyə və onun müəyyən etdiyi yüksək meyarlara uyğun gəlməyə çalışırdıq”, – deyə Qusman vurğulayıb.
Onun sözlərinə görə, sonrakı illərdə Heydər Əliyev böyük Sovet İttifaqının rəhbərlərindən birinə çevrildi, Sovet İttifaqı Kommunist Partiyası Mərkəzi Komitəsinin Siyasi Bürosunun üzvü və SSRİ Nazirlər Soveti sədrinin birinci müavini oldu.
“Biz əmin idik ki, elə bir gün gələcək o, daha yüksək vəzifələrə qalxacaq”, – deyə jurnalist qeyd edib.
Heydər Əliyevin sonralar ağır xəstəlik keçirdiyini və bir çoxlarının onun yenidən fəal siyasi fəaliyyətə qayıdacağına inanmadığını xatırladan jurnalist bildirib ki, buna baxmayaraq, görkəmli siyasi xadimin mənəvi gücü, cəsarəti və iradəsi və ən əsası, ölkəsinə qarşı məsuliyyət hissi qeyri-mümkünü mümkün etdi.
“Respublikanın parçalandığı bir vaxtda xalq onu geri dönməyə və ölkəni xilas etməyə çağırdı. O isə yalnız bu çağırışı əsas götürərək geri döndü və ilk prezident seçkilərində demək olar yekdilliklə prezident seçildi. Bu isə o demək idi ki, o, arxasında xalqın etimadı olan liderdir”, – deyə Qusman vurğulayıb.
Ümummilli Liderə həsr olunmuş “Liderin qəlbi” sənədli filmi barədə danışan Mixail Qusman qeyd edib: “Biz onun haqqında film çəkdik və mümkün qədər çox tamaşaçının izləməsini istərdim. Mən əminəm ki, lider olmaq sadəcə sonradan əldə edilən keyfiyyət deyil, lider doğulmaq lazımdır. Heydər Əliyev məhz belə bir lider kimi dünyaya gəlib”.
Əgər yenidən Heydər Əliyevlə görüş imkanı olsaydı, ona verəcəyi son sualın nə olacağı barədə sualın cavabında Qusman deyib: “Zamanı geri qaytarmaq mümkün deyil və bu söhbəti canlı təsəvvür etmək də mümkün deyil. Lakin mən tez-tez onun xatirəsinə müraciət edirəm. Yəqin ki, belə soruşardım: “Heydər Əliyev, sevimli Azərbaycanınızın bu günkü həyatından razısınızmı?” Mən əminəm ki, o, gülümsəyərək cavab verərdi: ‘Bəli, razıyam’.”
jpg_1768317525.jpg)
