Azərbaycanda icra edilən sosial tədbirlərin bir istiqaməti də vətəndaşların məşğulluğunun təmin olunmasıdır. Bununla bağlı bir çox layihələr həyata keçirilir, beynəlxalq təşkilatlarla əməkdaşlıq edilir. Məqsəd hər bir Azərbaycan vətəndaşının sosial güvənliyini təmin etmək üçün ona layiqli iş yeri tapmaqda yardımçı olmaq, dəstək verməkdir.
Əmək və Əhalinin Sosial Müdafiəsi Nazirliyindən verilən məlumata görə, son bir həftədə daha 329 nəfər işsiz və işaxtaran şəxs əmək bazarının tələblərinə uyğun peşələr üzrə hazırlıq kurslarına cəlb olunub. Nazirliyin Dövlət Məşğulluq Agentliyi həmin şəxslərin 116-nı agentliyin peşə hazırlığı mərkəzlərinə, 213 nəfərini isə özəl tədris müəssisələrindəki kurslara göndərib.
Peşə hazırlığına cəlb olunan şəxslərin işlə təmin edilməsi üçün işəgötürənlərlə əməkdaşlıq genişləndirilir. Bu məqsədlə Dövlət Məşğulluq Agentliyi və "Marsol Group" arasında memorandum imzalanıb. Razılaşmaya əsasən, tərəflər fəaliyyət istiqamətləri, qarşılıqlı maraq kəsb edən layihələr üzrə əməkdaşlıq edəcəklər. Həmçinin sosial müdafiəyə xüsusi ehtiyacı olan və işə düzəlməkdə çətinlik çəkən şəxslər üçün əlavə iş yerləri və sosial müəssisələrin yaradılmasına marağın artırılması məqsədilə müxtəlif təşviqedici tədbirlərin, o cümlədən proqram və layihələrin həyata keçirilməsi, peşə hazırlığına cəlb olunan şəxslərin müvafiq işlə təmin edilməsinə "Marsol Group" tərəfindən kömək göstərilməsi istiqamətində razılaşma əldə olub. Bundan başqa, əməkdaşlıq çərçivəsində birgə innovativ layihələrin, korporativ sosial məsuliyyət tədbirlərinin və forumların həyata keçirilməsi də nəzərdə tutulur.
İşğaldan azad edilmiş ərazilərin sakinləri üçün peşə kurslarının təşkili də diqqət mərkəzindədir. Böyük qayıdış proqramının icrası çərçivəsində Dövlət Məşğulluq Agentliyi indiyəcən işğaldan azad edilmiş ərazilərin sakinlərindən 2000-ə yaxın şəxsi peşə kurslarına cəlb edib. Onlardan 210 nəfər işğaldan azad edilmiş ərazilərimizə köçürülmüş, digər şəxslərin isə yaxın vaxtlarda köçürülməsi nəzərdə tutulur. Sakinlər köçürülməzdən əvvəl onlarla məşğulluq imkanlarının qiymətləndirilməsi üçün görüşlər keçirilir.
Məşğulluq sahəsində ölkə üzrə vəziyyətə gəldikdə, Dövlət Statistika Komitəsinin məlumatına görə, cari il mayın 1-i vəziyyətinə ilkin mənbələrdən daxil olan məlumatlara əsasən, iqtisadi fəal əhalinin sayı 5 milyon 323,3 min nəfər olmuşdur. Onlardan 5 milyon 39,6 min nəfəri məşğul əhalidir. Aprelin 1-i vəziyyətinə muzdla çalışanların çoxu emal sənayesində, tikintidə, su təchizatı, tullantıların təmizlənməsi və emalı, kənd təsərrüfatı, meşə təsərrüfatı və balıqçılıq və s. sahələrdə çalışmışlar. Həmin dövr xidmət sahələrində çalışanların sayında ticarət, nəqliyyat vasitələrinin təmiri, səhiyyə və sosial xidmətlərin göstərilməsi, inzibati və yardımçı xidmətlərin göstərilməsi, elm və texniki fəaliyyət sahələrində üstünlük təşkil etmişdir.
Cari ilin birinci rübündə ölkədə 23,4 min yeni iş yeri açılmışdır. Yeni iş yerlərinin 90,6 faizi qeyri-dövlət sektorunda açılmışdır.
R.MÜTƏLLİBOV,
"Azərbaycan"
jpeg_1765975443.jpeg)
