5 İyun - Su Təsərrüfatı və Meliorasiya İşçiləri Günü münasibətilə Azərbaycan Dövlət Su Ehtiyatları Agentliyi Qarabağ İqtisadi rayonuna mediatur təşkil edib.
AZƏRTAC-ın bölgə müxbiri xəbər verir ki, media nümayəndələri əvvəlcə Ağdərə rayonu ərazisində yerləşən Sərsəng Su anbarı ilə tanış olublar.
Onlara su anbarı haqqında ətraflı məlumat verilib. Bildirilib ki, Sərsəng su anbarı Tərtərçayın üzərində tikilərək 1976-cı ildə istifadəyə verilib. Anbarın ümumi həcmi 560 milyon kubmetrdir. Normal dolma səviyyəsində su anbarının uzunluğu 11,76 kilometr, eni 2 kilometr, suyun dərinliyi 103 metr, su güzgüsünün sahəsi 1346 hektardır. Su anbarı bəndinin hündürlüyü 125 metr, bəndin uzunluğu 555,1 metr, bəndin üstdən eni 12 metrdir.
Sərsəng su anbarının bəndində Su Elektrik Stansiyası (SES) tikilib. Bu stansiyada ümumi gücü 50 MVt olan 2 ədəd turbin quraşdırılıb. Hər bir turbinin suburaxma qabiliyyəti 30 kubmetr/saniyə olmaqla SES-dən cəmi 60 kubmetr/saniyə su buraxılır.
Bundan əlavə, suvarma məqsədilə çaya su buraxmaq üçün anbarın bəndində 6 ədəd siyirtmə də quraşdırılıb. Bu siyirtmələr vasitəsilə hər biri 5 kubmetr/saniyə olmaqla Tərtərçaya cəmi 30 kubmetr/saniyə su buraxmaq olur.
Su anbarı dolduğu hallarda qəza sutullayıcısı vasitəsilə 740 kubmetr/saniyə miqdarında daşqın sularını Tərtərçaya axıtmaq nəzərdə tutulub.
Qeyd edilib ki, Ümummilli Lider Heydər Əliyev Sərsəng su anbarının layihələndirilməsi və su elektrik stansiyasının tikintisi proseslərində, eyni zamanda Sərsəng su anbarının istifadəyə verilməsi münasibətilə keçirilən açılış mərasimində iştirak edib.
Sərsəng su anbarı Ağdərə, Tərtər, Bərdə, Goranboy, Yevlax və Ağcabədi rayonlarının ümumilikdə 96 min 217 hektar əkin sahəsinə xidmət etmək üçün nəzərdə tutulub.
jpg_1782508283.jpg)
jpg_1782507223.jpg)
