Fransa prezidentinə qarşı petisiya internetdə sürətlə dəstək qazanır

Fransanın solçu "Yenilməz Fransa" (LFI) Partiyası hazırkı prezident Emmanuel Makrona qarşı impiçment proseduruna başlamaqla siyasi mübarizədə ciddi addım atıb. Bu, partiyanın parlament fraksiyasının rəhbəri Matilda Panonun "X" sosial şəbəkəsindəki səhifəsində dərc olunmuş bəyanatından məlum olub.
M.Pano aydınlaşdırıb ki, impiçment prosedurunun başlanmasına dair qətnamə layihəsi birgə imzalanması üçün parlament üzvlərinə göndərilib. 
Konstitusiyanın 68-ci maddəsinə uyğun olaraq respublika prezidentinə qarşı impiçment işinin başlanması haqqında qərar layihəsi Milli Assambleya üzvlərinə təqdim olunub.
Fransa Konstitusiyasının göstərilən maddəsi prezidentin səlahiyyətlərini yerinə yetirmədiyi təqdirdə hakimiyyətdən uzaqlaşdırılmasına icazə verir. 
Bu müddəa "Yenilməz Fransa"nın hərəkətə keçməsi üçün hüquqi imkanlar açır, lakin təşəbbüsün həyata keçirilməsi yolu bir qədər çətindir. İmpiçment qanun layihəsinin qüvvəyə minməsi üçün bir neçə instansiyadan, o cümlədən solların çoxluğa malik olmadığı və partiyanın özünün təmsil olunmadığı parlamentin yuxarı palatası - Senatdan keçməlidir.
"Yenilməz Fransa" Partiyası həmçinin bildirib ki, Makron tərəfindən bir müddət əvvəl hökumət başcısı postuna namizədliyi rədd edilmiş Lüsi Kaste ölkənin baş naziri olmalıdır. Bəyanatda solçu siyasətçilər arasında ölkənin hazırkı rəhbərliyindən narazılığın artdığı vurğulanır. Bundan əlavə, partiya sentyabrın 7-də nümayiş elan edib və həmin mitinqdə, partiya nümayəndələrinin iddia etdiyi kimi, Makronun "hakimiyyəti ələ keçirməsinə" etiraz etmək planlaşdırılır. Gözlənilir ki, bu aksiya ölkənin siyasi həyatında mühüm hadisəyə çevrilməklə hazırkı prezidentin tərəfdarlarının və əleyhdarlarının diqqətini cəlb edəcək.
Beləliklə, "Yenilməz Fransa" təşəbbüsü hakimiyyətin legitimliyi və prezidentin xalq qarşısında məsuliyyəti ilə bağlı aktual suallar doğurur ki, bu da şübhəsiz, həm parlamentdə, həm də Fransa şəhərlərinin küçələrində müzakirə obyektinə çevriləcək.
Bu arada Fransa parlamenti sədrinin LFI-nı təmsil edən müavini Klemans Gette bildirib ki, Milli Assambleyada yerlərin əksəriyyətini qazanan solçu alyansdan baş nazir təyin etməkdən imtina etdiyi üçün Makrona qarşı petisiya internetdə sürətlə dəstək qazanır.
Onun dediyinə əsasən, Fransa prezidenti seçkilərin nəticələrinə baxmayaraq, köhnə hökumətin işinin davam etməsinə icazə verdiyi və müxtəlif hökumət proqramlarının həyata keçirilməsinə mane olduğu üçün tənqid edilir.
Makron seçkilərdə əksər mandatları qazanan solçu alyansın namizədini baş nazir təyin etməkdən imtina edib və hökumət qurmaq üçün danışıqlar aparır. Bu isə Fransada yenidən siyasi xaosa səbəb olub.  Sorğular göstərir ki, fransızların əksəriyyəti Makronun impiçmentini dəstəkləyir. Hələlik isə o, Yelisey sarayında müxtəlif siyasi xadimlərlə yeni hökumətin formalaşdırılması danışıqlarını davam etdirir.
 Makron, hökumət başçısını təyin etmək üçün konstitusiya səlahiyyətinə malikdir, lakin ölkədə bərqərar olmuş siyasi ənənə ən çox səs toplayan partiyadan baş nazir seçilməsini tələb edir.

Rizvan CƏFƏROV,
"Azərbaycan"