Makron başını itirib

O, yeni hökuməti formalaşdıra bilmir

Fransada seçkilərdən 3 gün keçməsinə baxmayaraq parlament çoxluğu formalaşmayıb. Səsvermə nəticəsində Milli Assambleyada üç böyük blok - solçuların və "yaşıllar"ın "Yeni Xalq Cəbhəsi" alyansı, "Birgə" prezident bloku və ifrat sağçı "Milli Birlik" bloku yer alıb. Amma onların arasındakı ziddiyyətlər yeni hökumətin formalaşdırılmasını çətinləşdirir.
Son həftələrdə aparılan rəy sorğularının və çoxsaylı proqnozların əksinə olaraq, solçu qüvvələrin "Yeni Xalq Cəbhəsi" alyansı 2024-cü il iyulun 7-də keçirilən növbədənkənar parlament seçkilərinin ikinci turunun nəticələrinə görə Fransa Milli Assambleyasında daha çox mandat əldə edib. Səsvermənin nəticələrinə görə, seçkilərin birinci turundan sonra öndə olan və böyük qələbə qazanacağı proqnozlaşdırılan ifrat sağçı "Milli Birlik" gözlənilmədən üçüncü yeri tutub.
Parisin şimal-şərqində tərəfdarlarının keçirdiyi mitinqdə solçu alyansın qeyri-formal lideri Jan-Lük Melanşon solçu koalisiyanın nümayəndəsinin baş nazir təyin olunmasını tələb edərək deyib: "Prezidentin "Yeni Xalq Cəbhəsi"ni ölkəni idarə etməyə çağırmaq səlahiyyəti və məsuliyyəti var. Biz hazırıq".
Qeyd edək ki, seçkilərdə qalib olan solçu qüvvələri millətçilərə qarşı müxaliflikdən başqa, yalnız bir şey birləşdirir - Prezident Makron və onun siyasətinə qarşı kəskin düşmənçilik. O, təkəbbürlükdə, adi fransızların gündəlik qayğılarından tamamilə uzaq olmaqda, bərabərsizliyi gücləndirməkdə və yalnız zənginlərin qayğısına qalmaqda günahlandırılır.
Solçular ilk növbədə Makronun böyük çətinliklə, parlamentdə müzakirəyə çıxarılmadan özbaşına həyata keçirdiyi pensiya islahatını ləğv etmək istəyirlər.
"Yeni Xalq Cəbhəsi" həmçinin zəruri malların qiymətlərini dondurmağı, minimum əməkhaqqını 14 faiz artırmağı, "sərvət vergisini" geri qaytarmağı və artıq mənfəətə yeni vergi tətbiq etməyi vəd edir.
Hazırda Fransa hökumətinə kimin rəhbərlik edəcəyini birmənalı söyləmək çətindir. Seçkilərdən əvvəl Prezident Makron Jan-Lük Melanşonun baş nazir təyin edilməsi imkanının olmadığını qəti şəkildə bildirib. O, Melanşonun "Yenilməyən Fransa" Partiyasının millətçilərdən dörd dəfə pis olduğunu vurğulayıb. 
İndi ekspertlərin proqnozuna görə, Prezident tələsik yaradılmış "Yeni Xalq Cəbhəsi"ni parçalamağa və yalnız mötədil solçularla işləməyə cəhd edə bilər.
Xatırladaq ki, iyulun 8-də Emmanuel Makron ölkənin sabitliyi naminə Baş nazir Qabriel Attalın istefasını qəbul etməyib, ondan vəzifəsində qalmasını istəyib. 
"Renessans" parlament qrupunun keçmiş rəhbəri, hazırda "Birgə" prezident blokundan yenidən seçilən Silven Mayyar hesab edir ki, çoxluğun formalaşması prosesi bir neçə həftə çəkə bilər: "Bizə sadəcə olaraq proqram əsası yaratmaq üçün vaxt lazımdır. Fransada koalisiya və ittifaqlar yaratmaq mədəniyyəti olmadığından, proses bir az daha uzun sürəcək. Ancaq avropalı tərəfdaşlarımıza baxanda  bunun bir neçə həftə çəkdiyini görürük. Yəqin ki, bizim də bir neçə həftəlik müzakirələrimiz olacaq".

Rizvan CƏFƏROV,
"Azərbaycan"