Ermənistan yarımçıq sülh müqaviləsi imzalamağa tələssə də, bunu Azərbaycanın qəbul etməyəcəyini anlayır. Çünki Azərbaycanın sülh sazişinin bağlanması üçün çox aydın və hüquqi şərtləri var. Bunlardan biri də Ermənistan konstitusiyasında yer alan ölkəmizə qarşı ərazi iddialarının aradan qaldırılmasıdır. Bunun üçün isə İrəvanın konstitusiyasına dəyişiklik etməsi zərurətdir.
Ermənistan tərəfi konstitusiyaya dəyişikliklə bağlı müxtəlif fikirlər səsləndirir. Son olaraq isə bu ölkənin ədliyyə naziri konstitusiyaya dəyişiklik üçün layihənin hazırlandığını və növbəti il dəyişiklik gözlənildiyini vurğulayıb. Sual doğuran məqam odur ki, bu dəyişiklik Azərbaycan və Ermənistan arasında sülh müqaviləsinin imzalanmasına əngəllərdən birini aradan qaldıra biləcəkmi?
Sosial Tədqiqatlar Mərkəzinin əməkdaşı Aqşin Kərimov qəzetimizə açıqlamasında bildirib ki, Ermənistanda konstitusiyaya dəyişikliklə bağlı müzakirələrin rəsmi səviyyədə artması Prezident İlham Əliyevin diktə etdiyi mövqelərə əsaslanır: "Məntiqlə yanaşsaq, Ermənistanın yeni konstitusiyası Nikol Paşinyan və komandasının ərsəyə gətirəcəyi bir kodeks deyil. Bu, daha çox Prezident İlham Əliyevin diktə etdiyi prinsiplərdir, çünki Ermənistan Azərbaycanın regionda yeni reallıq yaradabilmə gücünün bundan sonra da davam edə biləcəyini anlayır. Ermənistan konstitusiya dəyişikliyinə getməzsə, deməli, Azərbaycana və Türkiyəyə qarşı ərazi iddialarının hüquqi bazasını saxlamış olacaq. Yox, Ana qanununa dəyişiklik edərsə, həmin baza aradan qalxacaq və bu, Ermənistanın Azərbaycan və Türkiyə ilə münasibətlərinin normallaşmasına maneə olan hüquqi əngəlləri aradan qaldıracaq. Ona görə də Ermənistan bu reallıqları və Azərbaycanın geosiyasi oriyentirinin nə qədər güclü olduğunu başa düşərək, müəyyən mənada İlham Əliyevin tələblərinə boyun əymək məcburiyyətində qalacaq".
Ekspert qeyd edib ki, Ermənistanın əlinə fürsət düşən kimi Azərbaycana qarşı hər hansı revanş cəbhənin bəslənməsi fonunda sərhəddə təxribatlar törətmək ehtimalı isə məsələnin başqa tərəfidir: "Konstitusiyada olan müddəalar həmin təxribatlar üçün müəyyən qədər açar rolunu oynayır. Azərbaycan bu gün üçün Ermənistanda konstitusiyaya sivil qaydada dəyişiklik edilməsinin tərəfdarıdır. Ermənistan buna əməl etməsə, Azərbaycan sərhəddə əlavə əməliyyatlar aparmaqla yeni düzən formalaşdırmağa qadir olduğunu bir daha göstərəcək. Ona görə də Ermənistan Azərbaycanın tələblərinə, şərtlərinə, formalaşdırdığı yeni doktrinaya tabe olmaq zərurətlərini hiss edir".
Rəsmi İrəvanın Azərbaycana qarşı geosiyasi dönüş nöqtəsi yaradabilmə potensialının olmadığını vurğulayan A.Kərimov bildirib ki, bu dövlət, ilk növbədə, Rusiyanın, Avropa İttifaqının, ABŞ-nin poliqon mərkəzinə çevrilib. Digər tərəfdən, İranın Ermənistanla bağlı ambisiyaları getdikcə genişlənir və rəsmi Tehran daha İrəvanın təhlükəsizlik zəmanəti kimi deyil, ona təhdid yaradan formada çıxış edir. Yəni hazırda Ermənistanın təhlükəsizliyi İran üçün o qədər də önəm daşımır. Həmçinin Ermənistan İrana qarşı gedə bilmək potensialında deyil və buradan hər hansı siqnal veriləndə Tehran dərhal İrəvana müəyyən xəbərdarlıq mesajları göndərir. Göründüyü kimi, Ermənistan regionda təklənmiş durumdadır. Bu strateji mənzərə Azərbaycana öz mövqelərini daha da möhkəmləndirməyə və Ermənistana qarşı hüquqi aspektləri genişləndirməyə imkan verir".
Ə.QARDAŞXANOVA,
"Azərbaycan"
