Yolboyu gücünü bir qədər itirməsinə baxmayaraq, Atlantikada formalaşan "Kirk" qasırğası Avropanın bir neçə ölkəsini vuraraq ciddi fəsadlar törədib. Güclü fırtına Portuqaliya və İspaniyada dağıntılara səbəb olub. Fransa, İsveçrə, Belçika, Niderland, Danimarka, Norveç və Almaniyanın şimalının da yaxın günlərdə qasırğanın təsirini hiss edəcəyi gözlənilir.
Fırtınanın quruya çıxmasının güclü külək və leysan yağışla müşayiət olunacağı gözlənildiyi üçün Fransa yüksək hazırlıq vəziyyətinə gətirilib. Velluire merinin müavini Alen Beneto təbii fəlakətlə bağlı deyib:
"Bəndlərimiz gücləndirilib və qaldırılıb. Lazım gələrsə, qayıqları yığışdırıb bütün əhaliyə xəbərdarlıq edəcəyik".
Atlantik okeanı üzərində əmələ gələn "Kirk" qasırğası Bermud və Azor adaları arasından keçərək qısa müddət ərzində 4-cü kateqoriyaya çatıb. Lakin sonra post-tropik fırtına gücünədək zəifləməsinə baxmayaraq, Portuqaliyada daşqınlara səbəb olub və 300 min insanı işıqsız qoyub. Küləyin sürəti saatda 200 kilometrə çatıb.
Ölkənin mülki mühafizə idarəsi 600 insident qeydə alıb ki, onların da əksəriyyəti yıxılan ağaclarla bağlıdır.
İspaniyada da güclü külək və leysan yağışları aviasiya reyslərinin gecikməsinə və təxirə salınmasına səbəb olub. Yerli medianın məlumatına görə, ölkənin bəzi bölgələrində hündürlüyü 7 metrə çatan dalğalar sahilə zərbə endirib.
Euronews telekanalı xəbər verir ki, "Kirk" qasırğası artıq Fransa və Belçikanı da vurub.
Fransanın Seine-et-Marne departamenti hələ də mümkün daşqınla bağlı qırmızı xəbərdarlıq səviyyəsində qalır. Çünki yaxın günlərdə yenidən yağış gözlənilir.
Yerli KİV məlumat yayıb ki, Fransada "Kirk" qasırğası nəticəsində bir nəfər ölüb. Bundan əlavə, təbii fəlakət səbəbindən 70 minə yaxın ev işıqsız qalıb. Ölkənin şimalında yollar və binaların aşağı mərtəbələri su altında qalıb.
"Kirk" qasırğası Fransanın qonşusu Belçikaya da təsir edib. Ən çox yağıntı krallığın cənubuna düşüb. Kuven şəhərinin mərkəzini su basıb. Şəhərdə və ətrafında çətin vəziyyət qalmaqdadır, burada insanlar və heyvanlar hərbi helikopterlərlə təxliyə edilir.
Son məlumata əsasən, yerli hakimiyyət orqanları hesab edirlər ki, ən pisi arxada qalıb və indi fəlakətin nəticələri aradan qaldırılmalıdır.
Oktyabrın 11-də axşam saatlarında məlum olub ki, "Kirk" qasırğası Baltik dənizinin cənubuna, Danimarka boğazlarına yaxınlaşıb və şimala doğru irəliləməkdə davam edir. Bu barədə xəbər verən Sankt-Peterburqun baş sinoptiki Aleksandr Kolesov özünün Teleqram kanalında qasırğanın artıq siklona çevrildiyini bildirib.
Rizvan CƏFƏROV,
"Azərbaycan"
