Buğda və arpa toxumu istehsalı üzrə ixtisaslaşan bu fermer təsərrüfatının sorağı Bərdənin sərhədlərini çoxdan aşıb
Bərdə ölkənin böyük iqtisadi potensiala malik rayonlarındandır. Bu yerlərin torpağı münbit, suyu bol, insanları mehriban, qonaqpərvər və əməksevərdirlər. Hələ respublikaya rəhbərliyinin birinci dönəmində Ümummilli Lider Heydər Əliyev dəfələrlə Bərdəyə səfər etmiş, əmək adamları ilə pambıq tarlalarında, taxıl zəmilərində, heyvandarlıq müəssisələrində görüşmüş, onlara dəstək və diqqətini əsirgəməmişdir.
O vaxtlar Salman Musayev rayonun ən böyük, geniş imkanlara malik "Moskva" kolxozunda ali təhsilli mütəxəssis kimi müxtəlif məsul vəzifələrdə çalışırdı. Ulu Öndərin əmək adamlarının hünərinə verdiyi yüksək dəyər Salmanı torpağa, halal zəhmətə daha möhkəm tellərlə bağlayır, seçdiyi həyat yolunun doğru olduğuna inandırırdı.
Zəhmət naxışlı, bərəkət qoxulu illər ötüb keçir, Salman təcrübə qazanır, torpağın dilini bilən, onunla ünsiyyət quran bir əmək adamı kimi formalaşırdı. Zamanın hökmü ilə ictimai-siyasi quruluş dəyişdi, kolxoz və sovxozlar dağılıb yerini özəl təsərrüfat sisteminə verdi. Heydər Əliyevin iradəsi ilə həyata keçirilən torpaq islahatı həyat amalı halal zəhmət olan kənd adamlarına səmərəli fəaliyyət üçün geniş imkanlar açdı. Bütün varlığı ilə torpağa bağlı Salman da bu imkanı qaçırmadı, ondan səmərəli istifadə etmək üçün yollar aradı. Düşünüb daşınandan, götür-qoy edəndən sonra "Kəhrəba" adlı fermer təsərrüfatı yaratdı. Gücünə, bacarığına yaxşı bələd olduğu, əmək meydanında sınadığı dostlarını da başına yığıb fəaliyyətə başladı. Çəkdikləri zəhmət, axıtdıqları alın təri hədər getmədi. Torpağa səpdikləri toxum birə min oldu. Qazandıqları yüksək nəticə, istehsal etdikləri bol məhsul onlara böyük şöhrətlə yanaşı, firavan həyat, yaxşı dolanışıq gətirdi.
İndi Salman Musayevin fermer təsərrüfatı qabaqcıl təcrübə məktəbinə çevrilib. "Kəhrəba"nın istehsal etdiyi taxıl toxumunun sorağı rayonun sərhədlərini çoxdan aşıb. Bəli, "Kəhrəba" fermer təsərrüfatı taxıl toxumçuluğu üzrə ixtisaslaşıb. Kənd Təsərrüfatı Nazirliyinin müvafiq sertifikatı ilə bu istiqamətdə fəaliyyət göstərir. Keçən təsərrüfat ilində 450 ton buğda, 60 ton arpa toxumu istehsal edilib. Buğda zəmilərində hər hektarın orta məhsuldarlığı 55, arpa sahələrində isə 50 sentner olub. Nəinki Bərdənin, qonşu rayonların fermerləri də "Kəhrəba"nın istehsal etdiyi toxumun keyfiyyətindən razılıq edirlər.
Salman Musayevlə söhbətdən öyrənirik ki, cari ilin məhsulu üçün 86 hektarda taxıl əkiblər. Səpində yerli sortlardan "Qobustan" və "Mətin"dən istifadə olunub. Aqrotexniki qaydalar əsasında becərilən zəmilər bol məhsuldan xəbər verir. "Sarı kəhrəba" ustaları bu il daha yüksək məhsuldarlığa nail olmaq əzmindədirlər.
"Kəhrəba"nın əsas fəaliyyət istiqaməti toxumçuluq olsa da, kənd təsərrüfatının digər sahələri ilə də məşğul olur. Yaxşı da nəticələri var. Fermer təsərrüfatında bəslənən qoyunların sayı hazırda 550 başdır. Keçən il həmçinin 150 kiloqram barama istehsal ediblər. Cari il bu göstəricini iki dəfə artırmağa çalışırlar. Çünki etibarlı yem bazası yaradıblar. Dörd il əvvəl bir hektarda Çindən gətirilmiş məhsuldar çəkil tingləri əkiblər. Kümxananı da mövsümə zoobaytar tələblər əsasında hazırlayıblar.
Salman Musayev söhbətinin sonunda ürəyindən keçənləri dilə gətirdi:
- Biz müharibə şəraitində yaşayırıq. Dövlətimizə güclü və müasir silah-sursatla yanaşı, bol çörək lazımdır. O da məlumdur ki, biz taxıla olan ehtiyacımızı daxili imkanlar hesabına ödəyə bilmirik. Ölkəmizdə əkin sahələri də o qədər geniş deyil. Çıxış yolu kimi intensiv inkişafa önəm verməliyik. Yüksək məhsuldarlığa nail olmağın yolu isə keyfiyyətli toxumdan, qabaqcıl dünya təcrübəsinin, mütərəqqi texnologiyanın tətbiqindən keçir. Hökumətdən narazı olmağa haqqımız yoxdur. Subsidiya alırıq, gübrəni, texnikanı güzəştli qiymətlərlə verirlər. Bizə qalan odur ki, hər qarış torpaqdan səmərəli istifadə edək, bol taxıl yetişdirək. Ölkəmizin taxıl idxalı qayğısını yüngülləşdirək.
Lazım QULİYEV,
"Azərbaycan"
jpeg_1765975443.jpeg)
