Azərbaycanda yaradılan münbit investisiya mühiti yerli və xarici sərmayəçilər üçün cəlbedici olaraq qalır. Səbəb həm də ölkəmizdə investisiyanın qanunla etibarlı qorunmasıdır. Kapital qoyuluşunda bu şərt son dərəcə vacibdir.
Dünyada baş verən məlum proseslər səbəbindən qlobal iqtisadiyyatda kapital qoyuluşu xeyli azalmışdır. Bu mənfi proseslər ölkəmizdən də yan keçməmişdir. Belə olan halda dövlət ölkənin iqtisadi inkişafındakı dinamikanı qoruyub saxlamaq üçün özü birbaşa investor kimi çıxış edir. Bunun sayəsində iqtisadiyyatda əldə olunan uğurları qoruyub saxlamaq mümkün olur.
Cari ilin birinci yarısında ölkəmizdə kapital qoyuluşunda yerli və xarici investorların aktivliyinin artması dövlətin daha geniş təşviqedici tədbirlərinin nəticəsidir. Dövlət Statistika Komitəsindən verilən məlumata görə, cari ilin yanvar-iyun aylarında ölkənin sosial-iqtisadi sahələrinin inkişafı üçün bütün mənbələrdən əsas kapitala 9 milyard 295,2 milyon manat və ya ötən ilin müvafiq dövrü ilə müqayisədə 13,8 faiz çox investisiya yönəldilmişdir. Hesabat dövründə neft-qaz sektoruna yönəldilmiş investisiyaların həcmi 34,3, qeyri-neft-qaz sektoruna yönəldilmiş investisiyaların həcmi 5,5 faiz artmışdır.
Ölkənin iqtisadi inkişafı üçün investisiya qoyularkən onun səmərəliliyi də nəzərə alınır. Belə ki, qoyulan ümumi sərmayənin 54,2 faizindən məhsul istehsalı, 31,8 faizindən xidmət, 14 faizindən isə yaşayış evlərinin tikintisində istifadə olunub.
Qeyd edildiyi kimi, məlum səbəblərdən, o cümlədən daha çox pandemiya illərində bir neçə il kapital qoyuluşunda dövlətin payı yüksək olub. Sonralar isə sərmayə qoyuluşunda qeyri-dövlət sektorunun payı yenidən yüksəlməyə başlayıb. Hesabat dövründə ölkə üzrə yatırılan ümumi sərmayənin 58,2 faizi qeyri-dövlət, 41,8 faizi isə dövlət sektorlarına məxsusdur. Kapital qoyuluşunda daxili mənbələrin payı yüksək olaraq qalır. Hesabat dövründə daxili mənbələrdən əsas kapitala yönəldilmiş investisiyaların dəyəri ümumi sərmayənin 74,2 faizini təşkil edib. Xarici sərmayələrə gəldikdə Dövlət Statistika Komitəsindən verilən məlumata görə, bu ilin yanvar-iyun aylarında xarici maliyyə mənbələrindən əsas kapitala 2 milyard 395 milyon manat məbləğində investisiya yatırılıb. Bu da ötən ilin eyni dövründəki göstəricilərlə müqayisədə 18,2 faiz çoxdur. Xarici mənbələrdən əsas kapitala yönəldilmiş investisiyaların 1 milyard 935 milyon manatından neft-qaz, 459,5 milyon manatından qeyri-neft-qaz sektorlarında istifadə olunub.
Rüstəm KAMAL,
"Azərbaycan"
677jpg_1790033437.jpg)
