Beynəlxalq ticarət və logistika zəncirlərinin inkişafı kontekstində Azərbaycan qlobal nəqliyyat marşrutlarının arxitekturasında getdikcə daha mühüm yer tutur.
Bu fikirləri AZƏRTAC-a müsahibəsində Kanadanın “CPCS” konsaltinq şirkətinin vitse-prezidenti, nəqliyyat, logistika və infrastruktur planlaşdırılması sahəsində beynəlxalq ekspert Endryu Baffard deyib.
O, ölkənin dayanıqlı Avrasiya dəhlizlərinin formalaşdırılmasında strateji əhəmiyyətini vurğulayıb. Ekspertin fikrincə, əlverişli coğrafi mövqeyi və inkişaf etmiş nəqliyyat infrastrukturu sayəsində Azərbaycan Orta Dəhlizin inkişafında əsas rol oynayır. Ölkənin Xəzər dənizindəki limanları, eləcə də Mərkəzi Asiya, Qafqaz və Avropa arasındakı bağlantını təmin edən dəmir yolu və avtomobil nəqliyyatı şəbəkəsi xüsusi əhəmiyyət kəsb edir.
Ekspert qeyd edib ki, son illərdə Azərbaycan, həmçinin Dünya Bankı və Avropa Yenidənqurma və İnkişaf Bankı da daxil olmaqla, bir sıra beynəlxalq maliyyə institutlarının dəstəklədiyi Trans-Xəzər Beynəlxalq Nəqliyyat Marşrutunun mühüm elementinə çevrilib. Onun fikrincə, bu cür təşkilatların iştirakı regionun tranzit potensialına və onun uzunmüddətli perspektivlərinə yüksək etimadın göstəricisidir.
Geoiqtisadi kontekstdən danışan E.Baffard vurğulayıb ki, qlobal logistika sistemində baş verən hazırkı dəyişikliklər şəraitində ölkələr daşıma marşrutlarını getdikcə daha fəal şəkildə şaxələndirirlər. Bu baxımdan Orta Dəhliz dayanıqlı alternativ təklif etməklə yanaşı, regional əməkdaşlıq üçün yeni imkanlar açdığına görə xüsusi aktuallıq kəsb edir.
O bildirib ki, Azərbaycan bu marşrutun əsas həlqələrindən biridir, çünki onun fasiləsizliyini və funksional əlaqəliliyini təmin edir. Çin–Mərkəzi Asiya–Azərbaycan–Qafqaz–Avropa logistika zəncirində ölkə regionlar arasında yük axınlarının hərəkətini təmin edən mühüm tranzit qovşağı rolunu oynayır.
Ekspertin qiymətləndirməsinə görə, yaxın illərdə Orta Dəhlizlə daşımalar davamlı artım nümayiş etdirəcək. Xüsusilə daha dayanıqlı və şaxələndirilmiş marşrutlara tələbatın artdığı şəraitdə onun əhəmiyyəti 5, 10 və 20 illik perspektivdə ardıcıl şəkildə güclənəcək.
Bu baxımdan ekspert Azərbaycan, Gürcüstan və Mərkəzi Asiya dövlətləri arasında regional əməkdaşlığın möhkəmləndirilməsinin vacibliyini vurğulayıb. Onun fikrincə, dəhlizin inkişafı yalnız bütün iştirakçıların koordinasiyalı fəaliyyəti və daha inteqrasiya olunmuş nəqliyyat sisteminin formalaşdırılması şərti ilə mümkündür.
E.Baffard ayrıca olaraq Ələt limanı, dəmir yolu şəbəkəsinin modernləşdirilməsi və multimodal logistika mərkəzlərinin inkişafı da daxil olmaqla, Azərbaycanın tranzit infrastrukturu sahəsində yüksək potensiala malik olduğunu qeyd edib. Onun sözlərinə görə, infrastrukturun inkişaf tempinin artan tələbatla uzlaşdırılması ölkəyə regional və beynəlxalq logistika sahəsində mövqelərini əhəmiyyətli dərəcədə gücləndirməyə, həmçinin biznes və investorlar üçün yeni imkanlar yaratmağa imkan verəcək.
