1918-ci ilin 28 May tarixi bizim istiqlal yaddaşımızdır. Bu gün biz o tarixi qürurla xatırlayır və qeyd edirik.
Çünki, ötən əsrin əvvəlində Azərbaycan Xalq Cümhuriyyətinin qurulması olduqca mühüm milli-siyasi məqsədləri özündə ehtiva edirdi: demokratik, hüquqi və dünyəvi müstəqil dövlət qurmaq, milli kimliyi qorumaq və eyni zamanda müasir dünyaya inteqrasiya etmək.
Cəmi 23 ayın içində ilk parlament yaradıldı. Dövlət atributları təsis edildi. Milli ordu formalaşdırıldı. Azərbaycan vətəndaşlığı anlayışı təsbit olundu. İnsanların dini, irqi, cinsi kimliyindən, milli, sosial mənsubiyyətindən asılı olmayaraq bərabər hüquqlara malik olduğu elan edildi. Bu, həmin dövrdə nəinki Şərq aləmi üçün ilk idi, dünyanın bir çox ölkələri üçün də mütərəqqi yanaşma idi.
28 May - demokratik ənənələrimizin təməlidir. Azərbaycan Xalq Cümhuriyyəti Şərqə demokratiya, parlament mədəniyyəti, hüquqi dövlət modeli gətirdi. Bu baxımdan, Cümhuriyyət Azərbaycanla yanaşı, bütövlükdə regionun siyasi tarixində yeni bir səhifə açdı.
Azərbaycan Xalq Cümhuriyyətinin beynəlxalq aləmdə tanınmaq, diplomatik münasibətlər qurmaq istiqamətində addımları da vacib əhəmiyyət daşıyırdı. Çünki, bu proses növbəti daha sonrakı dövrlər üçün də ölkənin dünya siyasi sistemində tanınması yönündə hüquqi və diplomatik zəmin formalaşdırdı.
28 May - Azərbaycanın çoxəsrlik maarifçilik ideyalarının təcəssümüdür. Təhsilin ana dilində aparılmasına dair qərarların qəbul edilməsi, milli məktəblərin formalaşdırılması, Bakı Dövlət Universitetinin yaradılması haqqında qanunun qəbul edilməsi göstərirdi ki, Cümhuriyyətin dövlətçilik düşüncəsi gələcəyə hesablanmışdır.
Azərbaycan Xalq Cumhuriyyətinin fəaliyyəti, əhəmiyyəti haqqında əsas məqamları sadalayarkən, unutmamalıyıq ki, həmin addımlar çox qısa bir zaman kəsiyində həyata keçirilmişdir. Bu da öz növbəsində Azərbaycanın milli ruhunun, dövlətçilik ənənələrinin dərin köklərlərindən irəli gəlir.
Azərbaycan Xalq Cumhuriyyətinin irsi bu gün də Azərbaycanın siyasi kimliyində, dövlətçilik fəlsəfəsində və müstəqil qərarlarında yaşayır.
Bu gün Azərbaycan cənab Prezident İlham Əliyevin rəhbərliyi ilə tarixi ədaləti, ərazi bütövlüyünü, suverenliyini bərpa etmiş, torpaqlarını azad etmiş qalib bir dövlətdir. Öz sözünü deyən, öz qərarını verən, regionda və dünyada etibarlı tərəfdaşa çevrilmiş, öz milli mövqeyini qətiyyətlə ortaya qoyan nüfuzlu bir ölkədir.
Eyni zamanda Azərbaycan Türk dünyasında inteqrasiyanın mühüm mərkəzlərindəndir, həmçinin qlobal proseslərin, beynəlxalq dialoqun, yüksək səviyyəli forumların, sammitlərin aktiv iştirakçısıdır.
Yəni, bir zamanlar dünyaya özünü tanıtmaq üçün çalışan Azərbaycan bu gün dünyanın gələcəyinin formalaşdırılmasında mühüm bir siyasi güc kimi özünü təsdiqləyib.
Ona görə də dövlətimizin günü-gündən artan uğurları Azərbaycan Xalq Cumhuriyyətinə də bir ithafdır.
Günay Əfəndiyeva,
Milli Məclisin deputatı, Mədəniyyət komitəsinin sədr müavini
jpeg_1779952923.jpeg)
