20 Yanvar hadisələrini xatırlayanda gözlərim önündə bir tarix və ya köhnə kadrlar deyil, həmin günlərdə Bakıda itirdiyimiz dostlarımızın, qonşularımızın, birlikdə yaşadığımız insanların simaları canlanır.
Bu sözləri AZƏRTAC-a açıqlamasında israilli politoloq Yuri Boçarov deyib.
Onun sözlərinə görə, 1990-cı ilin yanvar günləri Bakıda yaşayan hər kəs üçün ağır bir sarsıntı olub: “Biz o günləri şəhərdə yaşadıq, hər şeyi öz gözlərimizlə gördük. Qorxu, çaşqınlıq, ağrı və insanları qoruya bilməyən mərkəzi hakimiyyətin acizliyi. Elə həmin vaxt dərk etdik ki, SSRİ deyilən böyük bir dövlət dağılır”.
Azərbaycanla bağlarını heç vaxt qırmadığını diqqətə çatdıran Y.Boçarov əlavə edib: “Biz Bakı ilə əlaqəmizi heç vaxt itirmədik. Bu, rəsmi yox, dərin insani və mənəvi bağ idi. O günlərdə Bakı sakinlərinin necə birləşdiyini, milli və dini fərqlərə baxmayaraq bir-birinə dayaq olduğunu gördük. Əsl Bakı məhz bu idi və bu gün də elədir”.
Politoloq bildirib ki, 20 Yanvar onun yaddaşında həmişə hüzn günü olaraq qalacaq: “Biz o gün həlak olanların hamısını xatırlayırıq. Bu tarix ürəyimizdə həmişə yas günü kimi yaşayacaq”. Eyni zamanda, o qeyd edib ki, bu ağır xatirələr içində ümid və qürur hissi də var: “Bu gün təsəlli verən odur ki, Azərbaycan bu sınaqlardan keçə bildi, gücləndi və milli liderlərinin rəhbərliyi ilə müstəqil, güclü bir dövlətə çevrildi. Bu gün Azərbaycan təkcə regionda deyil, dünyada da söz sahibi olan ölkədir”.
Yuri Boçarov əlavə edib ki, bu gün İsraildə yaşasalar da, Azərbaycanla mənəvi bağları dəyişməyib: “Biz Azərbaycanı və Bakını tolerantlıq, insanlıq və qarşılıqlı hörmət mədəniyyətinə görə sevirik. 20 Yanvar xatirəsi bizim üçün təkcə itki ağrısı deyil, həm də insan ləyaqətinin, həmrəyliyin və doğru tarixi seçimin qiymətini xatırladan bir gündür”.
