İqtisadi gündəm ötən həftə də dinamikliyi ilə seçildi. Maliyyə bazarlarından enerji sektoruna, inflyasiya göstəricilərindən beynəlxalq ticarətə qədər bir sıra istiqamətlərdə yaşanan dəyişikliklər qlobal iqtisadi mənzərənin yeni çalarlarını ortaya çıxardı. Həftə ərzində açıqlanan statistik məlumatlar və beynəlxalq bazarlarda müşahidə olunan tendensiyalar iqtisadi proseslərin mürəkkəb xarakterini bir daha nümayiş etdirdi. Bu fonda həm qlobal, həm də regional iqtisadiyyat üçün əhəmiyyət daşıyan əsas hadisələrə nəzər salaq.
Bakıda keçirilən "Beynəlxalq Maliyyə və Bankçılıq Sammiti 2026" ötən həftənin iqtisadi gündəmində diqqətçəkən ilk hadisədir. "Türk Dövlətlərinin Qlobal Maliyyə İnteqrasiyası" mövzusuna həsr olunan ikigünlük tədbir regional maliyyə əməkdaşlığının genişləndirilməsi və türkdilli ölkələrin qlobal maliyyə sisteminə inteqrasiyasının sürətləndirilməsi məqsədini daşıyırdı.
Sammitdə bankçılıq və maliyyə sektorunda qlobal trendlər, rəqəmsal transformasiya, ödəniş sistemlərinin inteqrasiyası, süni intellektin maliyyə sahəsində tətbiqi, kibertəhlükəsizlik, "yaşıl maliyyə" və investisiya imkanları kimi aktual məsələlər müzakirə olunub. Tədbir həmçinin bank sektorunun nümayəndələrini, tənzimləyici qurumları, investorları və beynəlxalq ekspertləri bir araya gətirərək, regional maliyyə əməkdaşlığı üçün mühüm platforma rolunu oynayıb.
***
Maliyyə sektorunda beynəlxalq inteqrasiya və əməkdaşlıq mövzularının ön plana çıxdığı ötən günlərdə diqqətçəkən hadisələrdən biri kimi 9 İyun - Beynəlxalq Maliyyə Kəşfiyyatı Orqanları Günü münasibətilə Maliyyə Monitorinqi Xidmətində keçirilən tədbiri qeyd edə bilərik. Tədbirdə maliyyə kəşfiyyatının milli təhlükəsizliyin təmin edilməsində, maliyyə sisteminin sabitliyinin qorunmasında, eləcə də cinayət yolu ilə əldə edilmiş vəsaitlərin leqallaşdırılması və terrorçuluğun maliyyələşdirilməsi ilə mübarizədə rolu xüsusi vurğulanıb. Daha sonra maliyyə cinayətləri ilə mübarizə, yeni texnoloji risklər, məlumat mübadiləsi və beynəlxalq əməkdaşlıq məsələləri də müzakirə olunub. Bu tədbir Azərbaycanın qlobal maliyyə təhlükəsizliyi və çirkli pulların yuyulmasına qarşı mübarizə sahəsində beynəlxalq əməkdaşlıq platformalarındakı rolunun daha da gücləndiyini nümayiş etdirir.
***
Rəqəmsal infrastrukturun inkişafı və texnoloji imkanların genişləndirilməsi istiqamətində atılan addımlar da ötən həftənin diqqətçəkən hadisələri sırasında yer alıb. Bu baxımdan Kəlbəcərdə Günəş panelli avtonom radiomonitorinq stansiyasının istifadəyə verilməsi Qarabağ və Şərqi Zəngəzurda müasir rabitə və radionəzarət infrastrukturunun qurulması prosesinin davamı kimi qiymətləndirilir. Rəqəmsal İnkişaf və Nəqliyyat Nazirliyinin məlumatına görə, proqram əsaslı radioqəbuledici (SDR) avadanlıqlarla təchiz edilmiş yeni stansiya Kəlbəcər şəhəri və ətraf ərazilərdə radiotezlik spektrinin və radio yayımlarının məsafədən operativ monitorinqini təmin edir. Yeni infrastruktur sayəsində spektr məşğulluğunun real vaxt rejimində izlənilməsi, ölçmə nəticələrinin təhlili və radionəzarət proseslərinin məsafədən idarə olunması mümkün olub.
***
İqtisadiyyatın modernləşdirilməsi və rəqabət qabiliyyətinin artırılması istiqamətində aparılan müzakirələr də ötən həftənin iqtisadi gündəmində önəmli sırada diqqət çəkib. İyunun 11-də Bakıda keçirilən elm və innovasiyalara həsr olunmuş beynəlxalq konfransda dayanıqlı iqtisadi transformasiya, neftdənkənar sahənin inkişafı, iqtisadiyyatın şaxələndirilməsi və rəqəmsal transformasiya məsələləri müzakirə olunub.
Dövlət qurumları, beynəlxalq təşkilatlar, biznes dairələri və ekspertlərin iştirak etdikləri tədbirdə elmin və müasir texnologiyaların iqtisadi artımın əsas hərəkətverici qüvvələrindən birinə çevrildiyi vurğulanıb. Panel müzakirələrində innovasiyaların tətbiqi, korporativ transformasiya və beynəlxalq təcrübənin öyrənilməsi istiqamətində fikir mübadiləsi aparılıb. Tədbir Azərbaycanın uzunmüddətli inkişaf strategiyasında innovasiyayönümlü iqtisadi modelin getdikcə daha çox ön plana çıxdığını bir daha nümayiş etdirib.
***
Xarici bazarlarda Azərbaycan məhsullarının təşviqi və qeyri-neft ixracının genişləndirilməsi istiqamətində görülən tədbirlər ötən həftənin yaddaqalan məqamlarındandır. Belə ki, Moskvada Azərbaycan məhsulları və şərablarının təqdimat mərasimi keçirilib. Tədbirdə Azərbaycanın zəngin şərabçılıq ənənələri, müxtəlif regionlarda istehsal olunan məhsullar və ölkənin turizm potensialı nümayiş etdirilib. Çıxışlarda yerli istehsalçıların məhsullarının xarici bazarlarda tanıdılmasının əhəmiyyəti, eləcə də Azərbaycan-Rusiya ticarət əlaqələrinin inkişaf perspektivləri vurğulanıb.
***
Həftənin ən vacib və diqqətçəkən hadisələri sırasında "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın icrası ilə bağlı keçirilən müşavirələr xüsusi yer tutub. Bu çərçivədə davam edən tədbirlər aqrar sektorun gələcək inkişaf prioritetlərinin müəyyənləşdirilməsi, ərzaq təhlükəsizliyinin gücləndirilməsi və kənd təsərrüfatında əlavə dəyər yaradan istehsal zəncirinin formalaşdırılması istiqamətində atılan addımların müzakirəsi baxımından əhəmiyyəti ilə seçilir.
Regionlarda keçirilən müşavirələrdə kənd təsərrüfatı məhsullarının istehsal və emal imkanlarının genişləndirilməsi, müasir texnologiyaların tətbiqi, ixrac potensialının artırılması, su və digər təbii resurslardan səmərəli istifadə, həmçinin balıqçılıq və akvakultura sahələrinin inkişaf perspektivləri diqqət mərkəzində saxlanılır. Qeyd olunur ki, dövlət proqramının əsas məqsədi aqrar sahədə məhsuldarlığın yüksəldilməsi, rəqabətqabiliyyətli istehsalın təşviqi və regionlarda məşğulluğun artırılmasıdır. Proses neftdənkənar iqtisadiyyatın şaxələndirilməsi strategiyasının mühüm tərkib hissəsi kimi qiymətləndirilib. Çünki aqrar sahənin inkişafı daxili tələbatın ödənilməsi ilə yanaşı, həm də emal sənayesinin genişlənməsinə, ixrac imkanlarının artmasına və kənd yerlərində sosial-iqtisadi rifahın yüksəlməsinə xidmət edir.
Beləliklə, 7 gün ərzində baş verən hadisələr göstərir ki, Azərbaycan iqtisadiyyatı bir tərəfdən qlobal iqtisadi proseslərə daha fəal inteqrasiya, digər tərəfdən isə neftdənkənar sahənin dayanıqlı inkişafını təmin etməkdə qərarlıdır.
Z.NADİRQIZI,
"Azərbaycan"
