ABŞ Dövlət katibi Entoni Blinkenin noyabrın 27-də Azərbaycan Prezidenti İlham Əliyevə zəngi məlum həqiqətlərə aydınlıq gətirdi. Belə ki, bu telefon danışığı  ilk növbədə İlham Əliyevin qətiyyətli və müstəqil siyasət yürütdüyünü, Azərbaycanın bütün böhtançı və qərəzli davranışlara qarşı adekvat və sərt mövqe ortaya qoyduğunu bir daha dünyaya nümayiş etdirdi.

 

Azərbaycan mövqeyində qətidir və prinsipialdır

Son vaxtlar ABŞ rəsmilərinin Azərbaycanı hədəfə alan açıqlamaları artıb. Görünən odur ki, Vaşinqtonda Azərbaycanın torpaqlarını işğaldan azad etməsini, erməni separatizminə son qoymasını həzm edə bilmirlər. ABŞ Senatının "2023-cü il erməniləri müdafiə aktı"nı qəbul etməsi, Nümayəndələr Palatasının Xarici işlər komitəsinin Avropa üzrə alt komitəsində dinləmələrdə ölkəmiz əleyhinə səslənən çıxışlar bunu təsdiq edir.

Azərbaycan öz qətiyyətli yolu olan, ona qarşı istənilən riyakar davranışı layiqincə cavablandırmağa qadir ölkədir. Məsələn, Azərbaycan ABŞ-nin qərəzli və düşmən mövqeyinə görə Vaşinqtonda Azərbaycanın və Ermənistanın xarici işlər nazirləri səviyyəsində təklif olunan görüşün keçirilməsini mümkün hesab etməyib. Eyni zamanda Azərbaycanın yüksəksəviyyəli rəsmilərinin ABŞ-yə səfər etmələrinə əsassız qadağa qoyulmasına görə Azərbaycan da ABŞ rəsmilərinin ölkəmizə səfərinə qadağa qoyub.

Azərbaycan beynəlxalq münasibətlərdə öz maraqlarını qətiyyətlə  qoruyur və ABŞ-nin ölkəmizə qarşı qərəzli mövqe tutması Bakını narahat etmir. Çünki bütün bunlardan Azərbaycanın itirəcəyi heç nə yoxdur. Azərbaycanın nə ABŞ, nə də onun Konqresi qarşısında heç bir öhdəliyi yoxdur. Amma bütün bunlardan sonra əl-ayağa düşən də ABŞ oldu.  Bu mənada ABŞ Dövlət katibi Entoni Blinkenin Prezident İlham Əliyevlə telefon danışığında münasibətlərin normallaşdırılması məqsədilə dekabrda köməkçisi Ceyms O'Braynın Azərbaycana səfərinə icazə verilməsini xahiş etməsi Azərbaycanın siyasi-diplomatik qələbəsidir.

Bu xahişinin yerinə yetirilməsi üçün Dövlət katibi Blinkenin Prezident İlham Əliyevin şərtini qəbul etməkdən başqa yolu qalmayıb. Belə ki, ABŞ rəsmisi Azərbaycana o şərtlə gələ bilər ki, həmin səfərdən sonra Azərbaycanın yüksəksəviyyəli rəsmilərinin ABŞ-yə səfərlərinə qoyulan əsassız qadağa aradan qaldırılacaq.

Beləliklə, bu telefon danışığı bir daha göstərdi ki, Azərbaycan öz mövqeyində qətidir, prinsipialdır və heç bir qüvvə ölkəmizi öz yolundan döndərə bilməz.

 

ABŞ-nin ikiüzlü siyasətinin növbəti göstəricisi

ABŞ-nin Azərbaycanın ərazi bütövlü yünün bərpasını qəbul edə bilməməsi digər müstəvilərdə də üzə çıxır. Belə ki, Türkiyənən hakim Ədalət və İnkişaf Partiyasının (AKP) sözçüsü Ömər Çəlik bildirib ki, ABŞ Türkiyəyə F-16 təyyarələrinin verilməsi üçün şərt irəli sürüb. Vaşinqton Ankaradan Qarabağın azad edilməsi üçün Azərbaycana verdiyi dəstəyi kəsməsini tələb edib.

Bu da ilk növbədə ABŞ-nin ikiüzlü siyasətinin göstəricisidir. Qarabağ bütün dünyada Azərbaycan torpağı kimi tanınsa da, BMT Təhlükəsizlik Şurası Ermənistan qoşunlarının Azərbaycan ərazilərindən çıxarılmasını tələb edən 4 qətnamə qəbul etsə də, işğalçı və işğala məruz qalan gün kimi agah olsa da, ABŞ hər zaman ikili standartlardan çıxış edib. Ankaradan etdiyi tələb isə həm də ABŞ-nin riyakar davranışının, erməni təəssübkeşliyinin göstəricisidir. 

Görünən həm də odur ki, ABŞ hətta öz müttəfiqləri ilə təzyiq dilində danışır, onları təhdid edir. Əlbəttə, Türkiyə güclü dövlətdir və xaricdən olan bütün təzyiq və təhdidləri adekvat şəkildə cavablandırır, dünyada və regionda öz milli maraqlarını təmin edən qətiyyətli siyasət həyata keçirir.

Eyni zamanda ABŞ-də çox yaxşı bilirlər ki, Türkiyə Azərbaycana yalnız siyasi və mənəvi dəstək verib. Ermənistanın işğalı altında olan torpaqlarımızı Azərbaycan öz gücü ilə azad edib. F-16, F-35-lərin Türkiyəyə verilməməsinin əsl səbəbləri isə bəllidir və ABŞ bunun üçün çoxsaylı bəhanələr ortaya atıb, Türkiyəyə təzyiq göstərməyə çalışır. Azərbaycana yardım məsələsi də bu bəhanələrdən biridir.

ABŞ-yə qarşı son onilliklərdə beynəlxalq səviyyədə etimadsızlıq mühiti formalaşıb. Dünyanın bir çox yerində müharibələrin, siyasi kataklizmlərin, dövlət çevrilişlərinin baş verməsinin səbəbkarı məhz ABŞ-dir. Azərbaycana qarşı məlum davranışlarına görə ABŞ həm də özünün Qafqaz siyasətinə böyük zərbə vurdu.

Rəşad CƏFƏRLİ,

"Azərbaycan"