Hacıqabulda TƏBİB-in dəstəyi və rayon mərkəzi xəstəxanasının təşkilatçılığı ilə "Səhiyyə xidmətlərində hüquqi yanaşma" mövzusunda regional forum keçirilib.
Tədbirdə 10 regionun səhiyyə və hüquq sahəsində çalışan rəhbər şəxslər iştirak edərək səhiyyə sistemində hüquqi tənzimləmələrin əhəmiyyətini vurğulayıblar. "Konstitusiya və Suverenlik İli" çərçivəsində təşkil olunan forumda səhiyyə və hüquq sistemlərinin qarşılıqlı əlaqəsi də müzakirə olunub.
Forumun açılışında çıxış edən Hacıqabul Rayon Mərkəzi Xəstəxanasının direktoru Natiq Əliyev səhiyyədə hüquqi xidmətlərin inkişaf etdirilməsinin vacibliyini vurğulayaraq bildirib ki, tibbi personalın hüquqi biliklərinin artırılması səhiyyə sisteminin effektivliyinə birbaşa təsir göstərir. Rayon icra hakimiyyətinin başçısı Sevindik Hətəmov isə çıxışında səhiyyə və hüquq sisteminin birgə fəaliyyətinin əhəmiyyətindən danışıb. Vurğulayıb ki, tibbi xidmətlərin keyfiyyətinin artırılması üçün hüquqi çərçivənin möhkəmləndirilməsi vacibdir. Tədbirdə çıxış edən Milli Məclisin Sədr müavini Rəfael Hüseynov da səhiyyənin hüquqi əsaslarla idarə olunmasının əhəmiyyətini önə çəkərək vətəndaşların tibbi xidmətlərə əlçatanlığının artırılması üçün normativ bazanın gücləndirilməsinin vacibliyini söyləyib.
TƏBİB-in İcraçı direktorunun müavini Anar İsrafilov çıxışında səhiyyə müəssisələrində hüquqi çərçivənin möhkəmləndirilməsinin tibbi xidmətlərin keyfiyyətinə təsirindən danışıb və bildirib ki, səhiyyə sektorunda hüquqi məsələlərin həlli həm tibb işçiləri, həm də pasiyentlər üçün mühüm rol oynayır. Milli Məclisin Səhiyyə Komitəsinin nümayəndəsi Məlahət İbrahimqızı isə çıxışında səhiyyədə hüquqi xidmətlərin gücləndirilməsinin hüquqi dövlət quruculuğunun tərkib hissəsi olduğundan danışıb, səhiyyə işçilərinin hüquqlarının qorunması və onların hüquqi biliklərinin artırılmasının əsas prioritetlərdən biri olduğunu söyləyib. Milli Məclisin deputatı Tahir Rzayev də səhiyyə sistemində hüquqi mexanizmlərin inkişaf etdirilməsinin vacibliyini vurğulayaraq qeyd edib ki, səhiyyədə mövcud qanunvericiliyin təkmilləşdirilməsi üçün yeni islahatlara ehtiyac var.
Azərbaycan Səhiyyə İşçiləri Həmkarlar İttifaqının sədri Elnara Muradova isə səhiyyə işçilərinin əmək hüquqlarının qorunmasının vacibliyini qeyd edərək vurğulayıb ki, tibbi personalın əmək münasibətlərinin qanunvericiliyə uyğun tənzimlənməsi onların fəaliyyətinin səmərəliliyinə birbaşa təsir edir. İcbari Tibbi Sığorta üzrə Dövlət Agentliyinin nümayəndəsi Aysel İbayeva icbari tibbi sığorta çərçivəsində hüquqi tənzimləmələrin əhəmiyyətindən danışaraq bildirib ki, sığorta sisteminin effektiv işləməsi üçün hüquqi bazanın təkmilləşdirilməsi vacibdir. Hacıqabul rayon prokuroru, baş ədliyyə müşaviri Lalə Hüseynova səhiyyədə hüquqi məsuliyyətin gücləndirilməsinin zəruriliyini vurğulayaraq söyləyib ki, hüquqi tənzimləmələr səhiyyə işçilərinin məsuliyyətini artırmaqla yanaşı, onların hüquqlarının qorunmasına da xidmət etməlidir. TƏBİB-in Hüquq Departamentinin rəhbəri Aynur Hüseynova da səhiyyə sektorunda hüquqi məsələlərin tənzimlənməsi ilə bağlı mövcud problemləri qeyd edərək deyib ki, tibb müəssisələrində hüquqi maarifləndirmənin artırılması vacibdir.
Çıxışlardan sonra forumda səhiyyə sahəsində hüquqi xidmətlərin təkmilləşdirilməsi, səhiyyə işçilərinin hüquqlarının qorunması və vətəndaşların keyfiyyətli tibbi xidmətə çıxış imkanlarının artırılması istiqamətində müzakirələr aparılıb. Tədbir iştirakçıları səhiyyə-hüquq əməkdaşlığının daha da inkişaf etdirilməsinin və bu mövzuda mütəmadi olaraq forumların təşkil edilməsinin vacibliyini vurğulayıblar.
S.CAVADOV,
"Azərbaycan"
jpg_1765992511.jpg)
jpg_1765990345.jpg)
