Bu planların reallaşdırılmasında USAID kimi təşkilatlar fəal iştirak edirlər
Qonşu Gürcüstanda Qərbin təsiri altında hakimiyyət böhranı yaşanır. Ölkədə formalaşdırılmış şəbəkə yenidən ayağa qaldırılıb, Avropadan gələn emissarlar bilavasitə prosesə nəzarət edir və vəziyyəti gərginləşdirmək üçün hər yola əl atırlar.
Hadisələrin gedişatı göstərir ki, Qərb bu ölkədə çox dairələrə əl uzadıb. Hətta o qədər irəli gedib ki, özünü istər QHT, istər media sektorunda olsun, agent şəbəkəsini geniş şəkildə, hətta hakimiyyətin bəlli strukturlarına qədər yüksəldə bilib. İctimai rəyə ciddi təsir edə biləcək bir şəbəkə qurub. Həmin şəbəkənin hesabına da bu gün Gürcüstan çalxalanır.
Gürcüstan Azərbaycan üçün önəmli qonşu dövlətdir. Hər iki dost ölkə arasında ikitərəfli münasibətlər yüksələn xətlə inkişaf edir. Bu ölkədə minlərlə soydaşımız yaşayır. Bu səbəbdən də Gürcüstanda baş verən hadisələr bizləri də narahat etməyə bilməz.
Ölkə hakimiyyətinin Aİ-yə üzvlüklə bağlı danışıqları 2028-ci ilə qədər dayandırmaq qərarından sonra respublikada kütləvi etiraz aksiyaları başlayıb. Yerli medianın yaydığı məlumatlara görə, Tbilisidə parlamentin binası yaxınlığında etirazçılarla polisər arasında toqquşmalar baş verib. Hər iki tərəfdən xəsarət alanlar olub. Dünən Tbilisidə xüsusi təyinatlılar Gürcüstan parlamentinin binası qarşısındakı meydanı etirazçılardan tamamilə təmizləyiblər.
Gürcüstanın Çexiyadakı səfiri Teya Maisuradze istefa verib. O, bu barədə "X" hesabında paylaşım edib. Bununla da Gürcüstanın istefa verən səfirlərinin sayı 6-ya çatıb. Qeyd edək ki, səfirlər Gürcüstan hökumətinin Avropa İttifaqına üzvlüklə bağlı danışıqları dayandırması barədə qərarını dəstəkləmirlər.
Gürcüstanın Baş naziri İrakli Kobaxidze bildirib ki, müxalifətlə heç bir danışıq aparılmayacaq. Ölkədə etiraz aksiyası adı altında iğtişaşların yaranmasında bilavasitə müxalifət günahkardır. O, bununla da ölkədə hazırkı vəziyyətlə əlaqədar müxalifətlə danışıqların aparılması mümkünlüyünü istisna edib.
Ümumiyyətlə, Gürcüstanda parlament seçkilərindən sonra siyasi proseslərin gedişi, xüsusilə Qərbdən idarə olunan müxalifətin əsassız olaraq seçkilərin nəticələrinin ləğv olunması və yeni seçkilərin keçirilməsinə yönəlmiş fəaliyyəti aydın göstərir ki, Qərb Gürcüstanda rəngli inqilab ssenarisi planlaşdırıb və həyata keçirməyə çalışır. İnqilabın başlıca məqsədi mövcud hakimiyyəti devirmək və Gürcüstanda Qərbdən idarə olunan iqtidar komandası formalaşdırmaqdır.
Baş verənlər Qərbin oyunlarıdır. Bu planların reallaşdırılmasında USAID kimi təşkilatlar fəal iştirak edirlər. Hazırda Qərbin nəzarətində olan siyasi partiyaların, medianın, QHT-lərin, diplomatların və s. Gürcüstanda sabitliyi pozmaq xəttini tutduğu aydın görünür. Bu qüvvələrin can atdığı müddətsiz etirazlar 2004-cü ildə sınaqdan çıxarılmış metoddur.
Gürcüstan hakimiyyətinin "Xarici təsirin şəffaflığı haqqında" qanun qəbul etməsi, cinsi azlıqların fəaliyyətini məhdudlaşdıran normativ hüquqi aktların tətbiqi, habelə Gürcüstan hökumətinin ölkəni 2028-ci ilin sonuna qədər Avropa İttifaqına üzvlük məsələsini gündəmə gətirməməyə qərar verməsi Gürcüstan hakimiyyətinin təhlükəli oyunu gördüyünü və əks tədbirlər reallaşdırdığını nümayiş etdirir.
Artıq gürcü xalqı Qərbin və onun təəssübkeşlərinin əsl niyyətinin nədən ibarət olduğunu anlayır və buna ciddi müqavimət göstərir. Gürcülər yaxşı anlayırlar ki, xarici təsirlərin sarsıdıcı nəticələrindən sığortalanmağın yeganə yolu regional birlikdən, xüsusilə Azərbaycanla əlaqələri daha da gücləndirməkdən keçir. Azərbaycan və gürcü xalqı bir yerdə olduqca və eyni hədəfə doğru irəlilədikcə, regionu qeyri-sabitlik məkanına çevirmək cəhdləri heç bir nəticə verməyəcək.
Rəşad BAXŞƏLİYEV,
"Azərbaycan"
