Ermənistanın məkri baş tutmayacaq

Çünki Azərbaycanın şərtlərinə əməl olunmadan sülh sazişi imzalanmayacaq

Ermənistanın sülh prosesində səmimi olmadığı yeni məsələ deyil. Baş nazir N.Paşinyan və digər Ermənistan rəsmiləri dəfələrlə bununla bağlı pozitiv məzmunlu açıqlamalar versələr də, reallıq bunun əksini göstərir. Söhbət ondan gedir ki, Ermənistanın hazırkı qanunvericiliyi sülh müqaviləsinin etibarlı olmasına zəmanət vermir.
Xatırladaq ki, Ermənistanın baş naziri avqustun 31-də keçirdiyi mətbuat konfransında Azərbaycan-Ermənistan normallaşma prosesi və bölgədə sülh və təhlükəsizliyin təmin olunması səyləri ilə ziddiyyət təşkil edən açıqlamalar verib. Bütövlükdə isə Paşinyanın söylədiyi bütün fikirlər qeyri-səmimi olmaqla, Ermənistanın sülhdə və münasibətlərin normallaşmasında maraqlı olmadığını göstərir.
Məlumdur ki, Ermənistan konstitusiyasında 1990-cı ildə bu ölkənin Ali Soveti tərəfindən təsdiq olunmuş və "Ermənistanla Dağlıq Qarabağın birləşməsi"nə çağıran "müstəqillik aktı" adlı sənədə istinad edilib. Konstitusiya isə dünyanın hər yerində beynəlxalq sənədlərdən və ya sazişlərdən üstün hüquqi qüvvəsi olan sənəd sayılır. Ona görə də gələcəkdə Ermənistanda konstitusiyaya istinad edilərək sülh sazişindən imtina edilməyəcəyinə heç kim zəmanət verə bilməz.  Bununla bağlı Azərbaycan Xarici İşlər Nazirliyinin şərhində deyilir: "Ermənistan tərəfinin sülh müqaviləsi layihəsində mövcud olan "heç bir tərəf sülh sazişi çərçivəsində öz öhdəliklərini yerinə yetirməməsi ilə əlaqədar öz daxili qanunvericiliyinə istinad edə bilməz" müddəasını qeyd edərək, bu ölkənin konstitusiyasında mövcud olan ərazi iddiasının zərərsiz olduğunu bildirməsi də tamamilə əsassızdır. Bir daha qeyd edirik ki, heç bir beynəlxalq sazişin konstitusiyadan üstün olmadığı hər kəsə yaxşı məlum olan faktdır".
Ona görə dayanıqlı və möhkəm sülhə nail olmaq üçün Ermənistan öz konstitusiyasına dəyişikliklər etməli, ərazi iddialarından əl çəkməlidir. Bu həm də sülh prosesində Ermənistanın nə dərəcədə səmimi olduğunu göstərən amildir. Xarici İşlər Nazirliyinin şərhində bildirildiyi kimi, Azərbaycanla Ermənistan arasında real və davamlı sülh müqaviləsinin imzalanması üçün əsas şərt, başda "Ermənistan və Dağlıq Qarabağın birləşməsi"nə çağıran Ermənistanın Müstəqillik Aktına açıq şəkildə istinad edən Ermənistan konstitusiyası olmaqla, bu ölkənin çoxsaylı hüquqi və siyasi sənədlərində təsbit edilmiş Azərbaycana qarşı davam edən ərazi iddialarına son qoyulmasıdır.
Ermənistanın sülh prosesində digər bir qeyri-səmimiliyi fəaliyyətini dayandırmış ATƏT-in Minsk qrupunun hüquqi müstəvidə də ləğvi ilə bağlı müraciətdən boyun qaçırmasıdır. Rəsmi İrəvanın keçmiş münaqişənin qalığı olan Minsk qrupu ilə bağlı hazırkı mövqeyi Ermənistanın Azərbaycana qarşı məkrli niyyətini nümayiş etdirir.
Bir neçə gün əvvəl Prezident İlham Əliyev Türkiyə Böyük Millət Məclisinin üzvlərindən ibarət nümayəndə heyətini qəbul edən zaman bu məsələyə də toxunaraq bildirib ki, Ermənistan konstitusiyasında Azərbaycana qarşı olan ərazi iddiaları aradan qaldırılmalı, keçmişin qalığı olan ATƏT-in Minsk qrupu və onunla əlaqədar olan təsisatlar tamamilə ləğv edilməlidir. Dövlətimizin başçısı Minsk qrupunun ləğv edilməməsi ilə bağlı Ermənistanın mövqeyinin heç bir halda başadüşülən olmadığını bildirib.
Ermənistanda xəstə təfəkkürdən irəli gələrək Azərbaycana və ətraf dövlətlərə qarşı ərazi iddiaları həmişə olub və indi də var. Bu baxımdan Ermənistanın konstitusiyasında dəyişiklik etmədən və Minsk qrupu hüquqi formada ləğv olunmadan sülh sazişini bağlamağa hazır olmasını bildirməsi erməni məkrinin ifadəsidir. 
Lakin Ermənistanın sülh məkri baş tutmayacaq. Çünki Azərbaycanın şərtlərinə əməl olunmadan sülh sazişi imzalanmayacaq.

Rəşad CƏFƏRLİ,
"Azərbaycan"