Bütün sahələrdə dərin böhran yaşayan Ermənistanda ictimai-siyasi vəziyyət gərgin olaraq qalır. Tərəflər bir-birilərini təhdidə davam edirlər. Artıq ölkənin mütxəlif şəhərlərində etirazlar keçirilir. Siyasi çəkişmələrdən yorulan əhali isə problemlərinin həllini istəyir. Ölkədə əhalinin 60 faizi işsizdir. Bu ilin ilk 4 ayında işsizliyin səviyyəsi ötən ilin müvafiq dövrü ilə müqayisədə orta hesabla 26 faiz artıb.
"4rd.am" saytı yazır ki, hazırda Ermənistanda rəsmi qeydiyyata alınan işsizlərin sayı 74 min nəfərdən çoxdur. Milli Statistika Xidmətinin Ermənistanda yoxsulluğun mənzərəsi və iş bazarının problemləri üzrə beş illik araşdırmalarının nəticələrinə görə, ölkədə hər 100 işsizdən 40-ı gəncdir. Ümumi işsizlər arasında 20-29 yaşlı insanlar üstünlük təşkil edirlər. Ermənistanda yeni iş yerlərinin yaradılması da mümkün deyil. Çünki ölkə iqtisadiyyatı iflasa uğrayır. Vəziyyət o həddə çatıb ki, hətta mövsümi iş tapmaq çox çətindir.
2018-ci il inqilabından 7 il sonra, Nikol Paşinyanın hakimiyyəti dövründə Ermənistanın dövlət borcu martın 31-nə 5 trilyon 318 milyard dram təşkil edib. Bu barədə Ermənistanın maliyyə naziri Vahe Hovhannisyan ötən gün keçirdiyi mətbuat konfransında bildirib. Məlum olur ki, dövlət borcu 13,6 milyard dollara yaxın olub. Bu da ötən ilin dekabrın 31-nə 4,4 faiz artım deməkdir. 2024-cü ilin yekunlarına görə, dövlət borcu ilə Ümumi Daxili Məhsul (ÜDM) nisbəti 0,1 faiz bəndi azalıb.
Hovhannisyan əmin edib ki, borcun cəlb edilməsi və həcmi Ermənistanın büdcəsi və ortamüddətli borc strategiyası ilə planlaşdırılır.
Erməni nazir onu da vurğulayıb ki, daxili borcun ümumi borcda xüsusi çəkisi artaraq, 50 faizə çatıb. Hovhannisyan bunu kifayət qədər yaxşı göstərici hesab edib.
"4rd.am" nəşri yazır ki, 2018-ci ilin sonunda Ermənistanın dövlət borcu təxminən 6,9 milyard dollar təşkil edib: "Borc göstəricilərini müsbət hesab edən nazirin ağlına da gəlməzdi ki, 2018-ci ilin dövlət borcu ilə bağlı məlumatları müqayisə etsək, 2018-ci ildən 2025-ci ilin martına qədər dövlət borcunun təxminən 6,7 milyard dollar artdığını, yəni iki dəfəyə yaxın artdığını qeydə alacağıq. Dövlət borcunun ÜDM-ə nisbəti də artıb, lakin orta səviyyədə, təxminən 2,5 faiz bəndi artıb".
Hazırda Ermənistanın xarici kreditlərinin ən böyük hissəsini Dünya Bankının kreditləri təşkil edir. Ötən il borc faizlərinə və əsas borcun ödənilməsinə təxminən 2 milyard dollar xərclənib. Rəsmi məlumatlara görə, 2024-cü ildə borc faizlərinə 314 milyard dram, əsas borclara isə 451 milyard dram ayrılıb.
İqtisadiyyat naziri Gevorq Papoyanın çirkin manipulyasiyasından sonra dövlət borcu ilə bağlı söhbətlər qızışıb. Nazir ictimaiyyəti aldatmaq qərarına gəlib, xarici borclarla bağlı məlumatları açıqlayıb, dövlət borcunun o qədər də böyük olmadığı təəssüratı yaradıb. Üstəlik, o, sosial şəbəkədə istifadəçinin sualına cavab olaraq bildirib ki, daxili borc bir cibdən pul çıxarıb digərinə qoymaqla eynidir.
Bunlar bir daha Ermənistanda bütün sahələrdə vəziyyətin qeyri-qənaətbəxş olduğunun, ölkə hakimiyyətinin hər keçən gün daha çıxılmaz vəziyyətə düşdüyünün sübutudur. Hadisələrin bu səpkidə inkişafı yaxın gələcəkdə Ermənistanda hakimiyyət böhranının yaşanacağını göstərir.
Elçin CƏFƏROV,
"Azərbaycan"
