Müharibə cəhdi ona baha başa gələcək
"Ermənistan rəsmi dairələrinin Azərbaycan-Ermənistan arasında sülh müqaviləsinin imzalanmasına dair fikirləri əksər hallarda üst-üstə düşmür. Baş nazirin fikirlərini bəzən parlament sədri və ya xarici işlər naziri başqa tərzdə şərh edir. Bu, əlbəttə ki, ölkənin rəhbər şəxsləri arasında vahid fikrin olmamasından, ən əsası isə, Ermənistanın müstəqil siyasət yürüdə bilməməsindən qaynaqlanır".
Bu sözləri "Azərbaycan" qəzetinə Milli Məclisin Aqrar siyasət komitəsinin sədri Tahir Rzayev deyib. Deputat bildirib ki, Ermənistan müstəqil siyasət yürüdə bilmir, Qərbin yedəyində sürünür, ilk növbədə Fransanın tapşırıqlarını yerinə yetirir. Bu dövlətdə rəhbər vəzifə daşıyanların əksəriyyəti xarici ölkələrin agentləridir. Avropa, Rusiyayönümlü bu şəxslər Ermənistanın taleyi, sülh müqaviləsinin bağlanmasının əhəmiyyəti, xalqın gələcəyi barədə deyil, öz vəzifələri, ağalarına yarınmaq haqqında daha çox düşünürlər. Məhz buna görə də sülh müqaviləsinin bağlanmasına dair məsələlər ortaya qoyulanda, şərh ediləndə Ermənistan havadarlarının mövqeyindən çıxış edir. "Paşinyan sülh müqaviləsinin iki maddəsi istisna olmaqla, qalan maddələr üzrə razılığa gəlindiyi barədə bəyanatlar səsləndirir. Xarici işlər naziri isə bütün maddələr üzrə razılıq əldə edildiyini bildirir. Digər tərəfdən qeyd edilir ki, Ermənistan konstitusiyasında dəyişiklik edilməsinə ehtiyac yoxdur. Halbuki Azərbaycan Ermənistan konstitusiyasında dəyişiklik edilməsini - ölkəmizə qarşı ərazi iddialarının aradan qaldırılmasını əsas şərt kimi qarşıya qoyub və yarımçıq sülhə getməyəcəyini dəfələrlə bəyan edib. Ermənistanın rəsmi dairələri isə Azərbaycanın bu çağırışlarını tamamilə başqa istiqamətə yönəldir", - deyə T.Rzayev əlavə edib.
Komitə sədri qeyd edib ki, Ermənistan sülh sazişi imzalamağa hazır olduğunu elan etdiyi halda silahlanmanı genişləndirir, xarici ölkərdən külli sayda silah-sursat alır. Fransanın köməyi və təkidi ilə müharibəyə hazırlaşır. Əgər ortada sülh danışıqları varsa, qarşılıqlı münasibətlərdən, dövlətlərin ərazi bütövlüyünün tanınmasından söhbət gedirsə, silahlanmaya, sərhədə monitorinq qruplarını cəlb etməyə, sərhədçilərin hərəkətini izləməyə nə ehtiyac var? Əlbəttə, Ermənistan bu suallardan qaçır, yalançı sülh danışıqlarını ortaya atmaqla özünə vaxt qazanmaq istəyir. Ancaq bütün bunlar əbəsdir. Prezident İlham Əliyev ötən günlərdə "Rossiya Seqodnya" Beynəlxalq İnformasiya Agentliyinin Baş direktoruna müsahibəsində də bildirdi ki Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır. Ermənistanın silahlanma prosesi sıçrayışla gedir. Bu ölkənin rəsmi dairələri sülh ətrafında ikili oyun oynayırlar. Sürətlə silahlanır, xarici havadarlarına arxalanaraq müharibəyə hazırlaşırlar. Ancaq onlar səhv yoldadırlar, 44 günlük müharibədən, 23 saatlıq antiterror tədbirlərindən hələ də yaxşı nəticə çıxarmayıblar.
Tahir Rzayev bildirib ki, Ermənistanın müharibə cəhdi ona baha başa gələcək. Təcavüzkar dövlət bu barədə bir daha düşünməli, haqq yoluna gəlməlidir.
Əsmər QARDAŞXANOVA,
"Azərbaycan"
