Əmək və Əhalinin Sosial Müdafiəsi Nazirliyi (ƏƏSMN) yanında Dövlət Əmək Müfəttişliyi Xidmətinin (DƏMX) tabeliyində fəaliyyət göstərən “Əməyin Mühafizəsi Mərkəzi” publik hüquqi şəxsin təşkilatçılığı ilə Ağdam rayonunda növbəti maarifləndirmə tədbirləri keçirilib.
DƏMX-nin mətbuat xidmətindən AZƏRTAC-a verilən məlumata görə, tədbirlər Ağdam rayonunun mərkəzində, Ağdam Sənaye Parkında və Xıdırlı kəndində təşkil olunub. Maarifləndirmə tədbirləri çərçivəsində Ağdam rayonu üzrə fəaliyyət göstərən 3 müəssisənin ümumilikdə 397 nəfər işçi heyətini əhatə edən 3 ayrı sessiya keçirilib.
Maarifləndirmə tədbirləri zamanı iştirakçılara əməyin mühafizəsi, iş yerlərinin attestasiyası, işçilərin sağlam və təhlükəsiz şəraitdə çalışması, həmçinin yeni dövlət standartlarının tətbiqi ilə bağlı ətraflı məlumat verilib. Eyni zamanda, dövlətin layiqli əmək siyasəti, əmək qanunvericiliyinin əsas tələbləri, iş yerlərində təhlükəsizlik standartları və mina təhlükəsizliyi qaydaları iştirakçıların diqqətinə çatdırılıb.
Tədbirlər çərçivəsində iştirakçılara yaddaş kitabçaları, maarifləndirici bukletlər və digər təlimat xarakterli materiallar təqdim olunub, sualları cavablandırılıb.
Tədbirlərdə DƏMX tabeliyində "Əməyin Mühafizəsi Mərkəzi" publik hüquqi şəxs, ƏƏSMN tabeliyində Dövlət Məşğulluq Agentliyi, Azərbaycan Respublikasının Minatəmizləmə Agentliyi, Beynəlxalq Avrasiya Mətbuat Fondu, Kiçik və Orta Biznesin İnkişafı Agentliyi və Azərbaycan Həmkarlar İttifaqları Konfederasiyasının nümayəndələri iştirak edib, fəaliyyət istiqamətləri üzrə maarifləndirmə işi aparıblar.
Qeyd edək ki, işğaldan azad olunmuş ərazilərdə fəaliyyət göstərən müəssisələrdə əməyin mühafizəsinə dair bu cür tədbirlərin davam etdirilməsi nəzərdə tutulur.
jpg_1765992511.jpg)
jpg_1765990345.jpg)
