"Bakı-Ekspo" Mərkəzində Qafqaz regionunun nəhəng hərbi-texnoloji platforması olan və müdafiə sənayesinin qlobal güclərini bir araya gətirən "ADEX 2026" 6-cı Azərbaycan Beynəlxalq Müdafiə Sərgisi və "Securex Caspian" 15-ci Beynəlxalq Daxili Təhlükəsizlik, Mühafizə və Xilasetmə Avadanlıqları Sərgilərinin keçirilməsi mühüm əhəmiyyət kəsb edir. Bu sərgilər Azərbaycanın müdafiə sənayesinin inkişafı və bu sahədə əldə etdiyi nəticələrin beynəlxalq miqyasda təqdim olunması baxımından vacibdir. Belə mötəbər beynəlxalq sərgilər bir tərəfdən ölkənin müdafiə sənayesində formalaşdırdığı istehsal və texnoloji imkanların nümayiş etdirilməsinə, digər tərəfdən isə yeni əməkdaşlıq əlaqələrinin qurulmasına şərait yaradır.
Milli Məclisin deputatı Vüqar RƏHİMZADƏ qəzetimizə açıqlamasında deyib ki, ölkəmiz müdafiə sənayesinin inkişafına xüsusi diqqət yetirərək müxtəlif təyinatlı hərbi məhsulların istehsal imkanlarını genişləndirib. Bu baxımdan "ADEX 2026" yerli müdafiə sənayesi müəssisələrinin məhsullarının və texnoloji həllərinin beynəlxalq auditoriyaya təqdim edilməsi üçün mühüm platformadır. "Sərgidə nümayiş etdirilən məhsullar Azərbaycanın bu sahədə istehsal potensialının, texnoloji imkanlarının və yeni həllər üzərində aparılan işlərin daha geniş auditoriyaya çatdırılmasına imkan verir. Sərginin əhəmiyyətini artıran əsas məqamlardan biri onun geniş beynəlxalq iştirakla keçirilməsidir. Bu il "ADEX" iştirakçı şirkətlərin sayına görə rekord vurub. Bununla əlaqədar olaraq, məhz "ADEX 2026" sərgisi üçün "Bakı-Ekspo" Mərkəzinin 5-ci pavilyonu istifadəyə verilib. Bu mühüm yenilik "ADEX"in artıq yeni inkişaf mərhələsinə qədəm qoyduğunu göstərir. Beşinci pavilyonun fəaliyyətə başlaması sadəcə ekspozisiya sahəsinin genişləndirilməsi deyil, Azərbaycana və ölkənin müdafiə sənayesi potensialına artan beynəlxalq marağın, eləcə də "ADEX"in beynəlxalq müdafiə sənayesində möhkəmlənən mövqeyinin əyani ifadəsidir. "ADEX" və "Securex Caspian" sərgilərində bu il, ümumilikdə 53 ölkə təmsil olunur", - deyə o əlavə edib.
Deputat bildirib ki, dövlətlərarası və hərbi-texniki əməkdaşlıq üçün mühüm görüş platforması olan "ADEX" yeni əlaqələrin qurulması üçün əlverişli imkan formalaşdırır. Bu platforma çərçivəsində Azərbaycan şirkətləri potensial tərəfdaşlarla birbaşa təmas yaratmaq, məhsullarını təqdim etmək, qarşılıqlı maraq doğuran istiqamətləri müəyyənləşdirmək və gələcək əməkdaşlıq perspektivlərini müzakirə etmək imkanı əldə edirlər. Burada söhbət yalnız hazır məhsulların tanıdılmasından getmir. Müasir müdafiə sənayesində texnologiya, innovasiya, elmi-tədqiqat və istehsal imkanlarının bir-biri ilə əlaqələndirilməsi xüsusi əhəmiyyət daşıyır. Bu baxımdan "ADEX 2026" çərçivəsində keçirilən görüşlər və müzakirələr yeni texnologiyaların öyrənilməsi, qabaqcıl təcrübənin mənimsənilməsi, birgə layihələrin reallaşdırılması və müdafiə sənayesində innovativ həllərin tətbiqi baxımından da əhəmiyyətlidir.
V.Rəhimzadə qeyd edib ki, sərginin Azərbaycan üçün digər mühüm imkanlarından biri müdafiə sənayesində ixrac coğrafiyasının genişləndirilməsi ilə bağlıdır: "Yerli istehsalçıların məhsullarını beynəlxalq sərgi iştirakçılarına təqdim etməsi onların xarici bazarlara çıxış imkanlarını artırır. Bu isə uzunmüddətli perspektivdə müdafiə sənayesi məhsullarının ixracının genişləndirilməsi, yeni tərəfdaşlıqların qurulması və Azərbaycan istehsalının beynəlxalq müdafiə sənayesi bazarında daha geniş tanınması üçün əlavə imkanlar yaradacaq".
Əsmər QARDAŞXANOVA,
"Azərbaycan"
