44 günlük Vətən müharibəsinin başlamasından 5 il ötür. Mənə isə elə gəlir ki, dünən idi Turalımı son dəfə bağrıma basıb cəbhəyə yola saldığım gün. Müharibəyə könüllü getdi. Dedi ki, üç qardaşıq, mütləq torpaqlarımızın azadlığı uğrunda döyüşlərə qatılmalıyıq. Getdi və bu vəzifəni şərəflə yerinə yetirdi.
Tural həmlə taborunda döyüşürdü. Onun taboru ermənilərin uzun illər ərzində qurduqları istehkamları yararaq qəhrəmancasına irəliləyirdi. Keçdiyi döyüş yolu haqqında danışmağa Turalın imkanı olmadı. Ancaq bu barədə bizə oğlumla çiyin-çiyinə döyüşən yoldaşları danışıblar. Deyirlər ki, çox qorxmaz, cəsur və xeyirxah idi. Turalımın döyüş yolu Talışdan başlayıb Suqovuşanda başa çatdı. Ancaq bu, son olmadı. Əbədiyaşarlığın başlanğıcı oldu.
Bizim üçün təsəlli budur ki, bu gün dövlət başçısından başlayaraq sıravi vətəndaşlaradək işğaldan azad edilmiş torpaqlara qədəm qoyan hər kəs ilk növbədə bu yolda canından keçən oğullarımıza dualar edir, onların qəhrəmanlığı, vətənpərvərliyi barədə danışırlar.
Ötən 5 il ərzində şəhid ailələri həmişə qonaqlı olub. Xalqımız dərdimizə şərik çıxıb, bizi tək qoymayıb. Bu günlər Tərtər Rayon İcra Hakimiyyətinin başçısı Müstəqim Məmmədov rayonun idarə və müəssisə rəhbərləri ilə birlikdə qonağımız oldu, Bəyimsarov və Sarov kəndlərindən olan şəhid ailələri və qazilərlə görüşdü, qayğılarımızla maraqlandı, qaldırılan məsələlərlə bağlı operativ olaraq məsul şəxslərə tapşırıqlar verdi.
Vətən hər birimiz üçün müqəddəsdir. Şəhid ailələri üçün isə onun hər qarışı əzizdir. Bu torpaqlarda övladlarımız döyüşüb. İndi həmin torpaqların cənnətə döndüyünü görəndə ürəyimiz qürurla döyünür. Allah Prezidentimizi qorusun! Balalarımızın qanı yerdə qalmadı. Onların intiqamı alındı.
Allah bütün şəhidlərimizə rəhmət eləsin!
Güldanə MƏMMƏDOVA,
Tərtər rayonu Bəyimsarov kəndinin sakini, şəhid anası
