Bakı İqlim Fəaliyyəti Həftəsi çərçivəsində “Dayanıqlı enerji mərkəzlərinin iqlimə dözümlülüyün, innovasiyaların və enerji keçidlərinin təşviqində roluna dair regional dialoq” mövzusunda müzakirələr aparılıb.
AZƏRTAC xəbər verir ki, tədbirdə dayanıqlı enerji sistemlərinin inkişafı, bərpaolunan enerji mənbələrinin genişləndirilməsi, enerji səmərəliliyinin artırılması, innovativ texnologiyaların tətbiqi və regional əməkdaşlığın gücləndirilməsi məsələləri diqqət mərkəzində olub.
Azərbaycan Prezidentinin iqlim məsələləri üzrə nümayəndəsi, COP29-un prezidenti Muxtar Babayev çıxışında qlobal enerji keçidinin sürətləndirilməsi üçün bərpaolunan enerjinin genişləndirilməsi, enerji səmərəliliyinin artırılması, enerji şəbəkələrinin müasirləşdirilməsi və yeni texnologiyaların tətbiqinin vacibliyini vurğulayıb. O bildirib ki, bu istiqamətdə qarşıya qoyulan hədəflərin reallaşdırılması əhəmiyyətli investisiyalar tələb edir.
BMT-nin Sənaye İnkişafı Təşkilatının (UNIDO) layihə inzibatçısı Marinett Qayon regional dayanıqlı enerji mərkəzlərinin yaradılmasının və onların fəaliyyətinin dəstəklənməsinin əhəmiyyətini qeyd edib. Onun sözlərinə görə, bu istiqamətdə təşəbbüslər regional iqtisadi birliklərlə tərəfdaşlıq çərçivəsində həyata keçirilir və enerji keçidinin sürətləndirilməsinə töhfə verir.
Beynəlxalq Yaşıl Texnologiyalar və İnvestisiya Layihələri Mərkəzinin (BYTİLM) sədri Saken Kalkamanov çıxışında dayanıqlı enerji sahəsində innovativ həllərin tətbiqinin və yaşıl texnologiyalara investisiyaların artırılmasının vacibliyindən danışıb. O, regional əməkdaşlığın genişləndirilməsinin enerji təhlükəsizliyinin və iqlimə davamlılığın gücləndirilməsi baxımından mühüm əhəmiyyət daşıdığını bildirib.
COP29-un yüksəksəviyyəli iqlim çempionu, Milli Məclisin deputatı Nigar Arpadarai isə enerji keçidinin yalnız texnoloji transformasiya deyil, eyni zamanda, iqtisadi və sosial inkişaf məsələsi olduğunu vurğulayıb. O, özəl sektorun, dövlət qurumlarının və beynəlxalq tərəfdaşların birgə fəaliyyətinin dayanıqlı enerji layihələrinin genişləndirilməsi üçün mühüm olduğunu qeyd edib.
