Çin alimləri keçəlliklə mübarizə aparmaq üçün mikroelektron texnologiyalardan istifadə edən xüsusi daraq hazırlayıblar. “South China Morning Post” qəzetinin məlumatına görə, siçanlar üzərində aparılan təcrübələr nəticəsində tüklərin demək olar ki, tam bərpa olunduğu müşahidə edilib.
Nəşrin məlumatına əsasən, bu, Pekin Aeronavtika və Astronavtika Universiteti (Beihang Universiteti) ilə Honkonq Şəhər Universitetinin (City University of Hong Kong – CityU) alimlərinin birgə tədqiqatının nəticəsidir. “Detangle” adlandırılan cihaz impuls elektrik sahəsi yaradır və eyni zamanda dərman preparatlarını saç follikullarının dərin qatlarına çatdırır. Bunun üçün sadəcə saçları daramaq kifayətdir.
Siçanlar üzərində aparılan təcrübələr göstərib ki, cihazdan istifadə cəmi 28 gün ərzində tüklərin təxminən 100 faiz bərpasına imkan verib. Müqayisə üçün qeyd edək ki, saçların uzanmasını stimullaşdırmaq üçün ən geniş istifadə olunan vasitələrdən biri olan minoksidil tətbiq edildikdə bu göstərici təxminən 70 faiz təşkil edib. Tədqiqat müəllifləri bildirirlər ki, daraq saçları darayarkən eyni vaxtda elektrik sahəsi yaradır və iki dərman preparatı ötürür. Onlardan biri saç follikullarının ətrafında qan damarlarının inkişafını stimullaşdırır, digəri isə saç tökülməsinin əsas səbəblərindən biri olan androgenlərin yaranmasında iştirak edən fermentin fəaliyyətini zəiflədir.
Daraq mikroelektron idarəetmə sxemi və dərman preparatının ötürülməsi üçün xüsusi modul ilə təchiz olunub. Sonuncu mexanizm prinsipi etibarilə diyircəkli qələmin içindəki mürəkkəb çubuğuna bənzəyir. Bütün komponentlər darağın konstruksiyasına inteqrasiya edilib. Dişciklər baş dərisi üzərində hərəkət etdikdə sistem istiqamətləndirilmiş impuls elektrik sahəsi yaradır. Tədqiqat müəlliflərinin sözlərinə görə, bu sahə saçların uzanmasını stimullaşdıran molekulların dərinin dərin qatlarına nüfuz etməsinə kömək etməklə yanaşı, saç follikullarının hüceyrə membranlarını qısa müddətə daha keçirici edir.
Hələlik cihazın insanlar üzərində klinik sınaqlarının keçirilməsinin planlaşdırılıb-planlaşdırılmadığı və darağın satışa çıxarılıb-çıxarılmayacağı barədə məlumat verilmir. Bununla belə, tədqiqat müəllifləri bildiriblər ki, dərmanların bu üsulla çatdırılması sistemi yalnız saç tökülməsinin deyil, digər xəstəliklərin müalicəsində də faydalı ola bilər.
Ülkər XASPOLADOVA,
“Azərbaycan”