Cənubi Afrika Respublikasının şimal-qərb əyalətindəki tərk edilmiş Stilfonteyn mədənində aparılan xilasetmə əməliyyatının ilk üç günü ərzində 78 qeyri-qanuni şaxtaçının cəsədi çıxarılıb.
CAR Polis Xidmətindən (SAPS) verilən yazılı açıqlamada, Stilfonteyn mədənində yanvarın 13-də başlayan xilasetmə əməliyyatı nəticəsində 216 qeyri-qanuni şaxtaçının xilas edildiyi bildirilib.
Xilas edikən bütün şaxtaçıların saxlanıldığı da bildirilib.
Cənubi Afrikanın insan haqları təşkilatı olan Mədəndən Təsirlənən İcmaların Fəaliyyət Alyansı (MACUA) yanvarın 3-də Stilfonteyndə qapalı qalan şaxtaçıların, aclıqdan ölən dostlarının cəsədlərini yediklərini iddia edərək Konstitusiya Məhkəməsinə müraciət edib. Konstitusiya Məhkəməsinin qərarından sonra hökumət yanvarın 13-də xilasetmə əməliyyatlarına başlayıb.
MACUA-nın yanvarın 9-da verdiyi açıqlamada yerin altında 109 şaxtaçının cəsədinin aşkar edildiyi iddia edilib.
Polis noyabr ayında tərk edilmiş Stilfonteyn mədənindəki qeyri-qanuni şaxtaçılara su və qida təchizatını dayandırmışdı. Təslim olmaq istəməyən yüzlərlə şaxtaçı yerin altında ac və susuz qalmışdı.
Prezident Aparatının rəsmisi Xumbudzo Ntshavheninin qeyri-qanuni şaxtaçıların tüstü ilə mədəndən çıxarılacağına dair verdiyi bəyanat mübahisələrə səbəb olmuşdu.
Rəsmi məlumatlara görə, Stilfonteyni 1806 qeyri-qanuni mədənçi tərk edib. Polis bu şəxslərin yalnız 21-nin ölkə vətəndaşı olduğunu, digərlərinin isə Mozambik vətəndaşı olduğunu bildirib.
Cənubi Afrikada almaz, qızıl və platin kimi qiymətli minerallara malik olan mədənlərdə 10000 - 30000 arasında insanın qeyri-qanuni şəkildə işlədiyi bildirilir.
Rizvan CƏFƏROV,
"Azərbaycan"
