Fevralın 17-də Milli Məclisin Hüquq siyasəti və dövlət quruculuğu komitəsinin videokonfrans formatında iclası keçirilib.
AZƏRTAC xəbər verir ki, komitənin sədri Əli Hüseynli gündəliyə “Avropa Şurasının İnsan orqanlarının alverinə qarşı Konvensiyası”nın təsdiq edilməsi haqqında” və bəzi qanunlarda dəyişiklik edilməsi barədə bir sıra qanun layihələrinin daxil edildiyini söyləyib.
Komitə sədri əvvəlcə “Avropa Şurasının İnsan orqanlarının alverinə qarşı Konvensiyası”nın təsdiq edilməsi haqqında” qanun layihəsini təqdim edib. O, Azərbaycanın hər zaman beynəlxalq hüquqa, öz üzərinə götürdüyü öhdəliklərə sadiq olduğunu vurğulayıb, İnsan orqanlarının alverinə qarşı Konvensiyaya qoşulmağın ali məqsədlərimizdən irəli gəldiyini bildirib.
Konvensiyanın məqsədi insan orqanlarının alverinin qarşısının alınması və onunla mübarizə aparılması, bu sahədə müəyyən əməllərin kriminallaşdırılmasının təmin edilməsi, habelə qurbanların hüquqlarının müdafiəsi və tərəflər arasında milli və beynəlxalq əməkdaşlığın gücləndirilməsidir.
Komitənin üzvü Nizami Səfərov məsələ barədə fikirlərini açıqlayaraq Azərbaycanın bu Konvensiyaya xüsusi bəyanatla qoşulduğunu qeyd edib.
Sonra Əli Hüseynli İnzibati Xətalar Məcəlləsində dəyişiklik edilməsi haqqında qanun layihəsi (birinci oxunuş) barədə məlumat verib. Diqqətə çatdırılıb ki, layihə müvafiq Qanunla elektron siqaretlərin və ya onların komponentlərinin idxalı, ixracı, istehsalı, saxlanılması, topdan və ya pərakəndə satışı və ya istifadəsinin qadağan edilməsindən irəli gələn məsələlərin tənzimlənməsi məqsədilə hazırlanıb.
Əli Hüseynli “Yol hərəkəti haqqında” və “Avtomobil yolları haqqında” qanunlarda dəyişiklik edilməsi barədə qanun layihəsinə dair (ikinci oxunuş) məlumatı diqqətə çatdırıb. O qeyd edib ki, layihə yol hərəkəti qaydalarının təkmilləşdirilməsi məqsədilə hazırlanıb.
Onlayn iclasda habelə Mülki Prosessual Məcəllədə, Ailə Məcəlləsində, Cinayət-Prosessual Məcəlləsində, “Gənclər siyasəti haqqında”, “Uşaq hüquqlarının müdafiəsi üzrə komissiyalar haqqında Əsasnamənin təsdiq edilməsi barədə”, “Yetkinlik yaşına çatmayanların baxımsızlığının və hüquq pozuntularının profilaktikası haqqında”, “Bədən tərbiyəsi və idman haqqında”, “Sosial xidmət haqqında”, “Reklam haqqında”, “Tütün məmulatlarının istifadəsinin məhdudlaşdırılması haqqında”, “Uşaqların zərərli informasiyadan qorunması haqqında” və “Media haqqında” qanunlarda dəyişiklik edilməsi barədə qanun layihəsi də (ikinci oxunuş) müzakirəyə çıxarılıb.
Layihədə “Uşaq hüquqları haqqında” yeni qanun layihəsindən irəli gələrək uşaqların hüquq və azadlıqlarının təmin edilməsi, uşaq hüquqlarının təminatının hüquqi əsaslarının formalaşdırılması məqsədilə bir sıra qanunvericilik aktlarında müvafiq dəyişikliklər ehtiva olunur.
Bununla yanaşı, komitə üzvləri Gömrük Məcəlləsində, İnzibati Xətalar Məcəlləsində və “Qiymətli metallar və qiymətli daşlar haqqında” Qanunda dəyişiklik edilməsi barədə qanun layihəsini üçüncü oxunuşda nəzərdən keçiriblər.
Onlayn iclasın gündəliyində olan qanun layihələrinin hər biri Milli Məclisin plenar iclasına tövsiyə edilib.
