Bir məktəbin uğurları

Göygöl şəhərindəki Emil Vəliyev adına 5 nömrəli tam orta məktəbin adı nəinki rayonda, eləcə də respublikamızın təhsil sistemində hörmətlə çəkilir. Buna səbəb son illər məktəbin qazandığı uğurlardır.
1989-cu ildən tam orta məktəb kimi fəaliyyətə başlayan bu təhsil ocağı üçün 2006-cı ildə 480 şagirdlik yeni bina inşa edilmişdir. Hazırda məktəbdə 79 müəllim, 4 laborant, 
2 kitabxanaçı, 18 texniki işçi çalışır. 900 şagirdin təhsil aldığı, 37 sinif, 
4 məktəbəqədər hazırlıq qrupunun fəaliyyət göstərdiyi məktəb birnövbəlidir. 2021-2022-ci tədris ilindən "İcma Əsaslı Məktəbəqədər Təhsil", STEAM və "Peşə təmayüllü sinif" layihələrinin həyata keçirildiyi məktəbin şagirdləri rayon tədbirlərində fəal iştirak edirlər.
2022-2023-cü tədris ilində məktəbin şagirdlərinin "Kenquru", "Lütfi Zadə" və bir sıra respublika fənn olimpiadalarında və müsabiqələrində müxtəlif nailiyyətləri olmuşdur. Belə ki, keçən tədris ilində məktəbin 7-ci sinif şagirdi Fatimə Əsgərova respublika müsabiqəsində biologiya fənni üzrə gümüş medala layiq görülmüşdür. Məktəbin 8-ci sinif şagirdi  Aslan Qocayev isə Elm və Təhsil Nazirliyinin dəstəyi, "Gənclərin Respublika Bədii Yaradıcılıq Evi" publik hüquqi şəxsin təşkilatçılığı ilə ümumtəhsil məktəblərinin şagirdləri və məktəbdənkənar təhsil müəssisələrinin dərnək üzvləri arasında keçirilən "Zəfər dastanı" adlı onlayn respublika şeir və mahnı müsabiqəsində sertifikatlarla təltif edilmişdir. Bunlardan başqa, "Kenquru" Beynəlxalq Riyaziyyat Müsabiqəsində məktəbin 6-cı sinif şagirdi Yunis Sadıqov və 8-ci sinif şagirdi Fatimə Əsgərova finala vəsiqə qazanmışlar. 2022-2023-cü tədris ilində 9-cu siniflər arasında ümumi orta təhsil üzrə Fəridə Cəfərova və Fidan Abbasova fərqlənmə attestatına layiq görülmüşlər. 
Məktəbin 27 şagirdi bu il ali təhsil müəssisələrinə sənəd vermiş, onlardan 21 nəfəri qəbul olunmuşdur.
Təhsilverənlərin sertifikatlaşdırılması prosesində məktəbin ibtidai sinif müəllimləri Nəzakət Qasımova 54,  Elnarə Abbasova 53, Azərbaycan dili və ədəbiyyat müəllimi  Esmira Əsgərova 55 bal toplayaraq uğurlu nəticə göstərmişlər. Prezidentin müvafiq sərəncamı ilə məktəbin ibtidai sinif müəllimi Nəzakət Qasımova Azərbaycan təhsilinin inkişafında xidmətinə görə "Tərəqqi" medalı ilə təltif edilmişdir. Bundan başqa, "Xəmsə möcüzəsi" beynəlxalq onlayn incəsənət müsabiqə-festivalının respublika mərhələsində məktəbin Azərbaycan dili və ədəbiyyat müəllimi Roza Rəhimovanın təşkilatçılığı ilə məktəbin 7-ci sinif şagirdləri Kazım Kazımov, Murad Dilənov, Dərya Hüseynova dram nominasiyası üzrə III yerə layiq görülmüşlər.
Məktəbin idman sahəsində də uğurları var. Şagirdlər müxtəlif səviyyəli idman yarışlarında göstərdikləri nəticələrlə fərqlənirlər. 

S.ƏLİYEV,
Göygöl şəhəri