Təqaüddəyəm, nəvəmlə birgə yaşayıram. Aldığım pensiya gündəlik ehtiyaclarımızı qarşılamır. Belə halda əlavə sosial yardım ala bilərəm?
Sübhi KƏRİMOV,
Qobu qəsəbəsi
- Sualınızda qaldırığınız məsələ “Ünvanlı sosial yardım haqqında”, “Azərbaycan Respublikasında 2025-ci il üçün ehtiyac meyarının həddi haqqında” və “Azərbaycan Respublikasında 2025-ci il üçün yaşayış minimumu haqqında” qanunlar, həmçinin Nazirlər Kabinetinin qərarı ilə təsdiq edilmiş “Ünvanlı dövlət sosial yardımın alınması üçün müraciət edilməsi, onun təyin olunması, verilməsi və verilməsindən imtina edilməsi” Qaydaları (bundan sonra – Qaydalar) ilə tənzimlənir.
“Ünvanlı sosial yardım haqqında” Qanunun 7.1-ci maddəsinə əsasən, sosial yardımın məbləği ailənin orta aylıq gəliri ilə hər bir ailə üzvü üçün ehtiyac meyarının məcmusu arasında yaranan fərq məbləğində hesablanır. 2025-ci il üçün ehtiyac meyarının həddi 285 manat müəyyən edilmişdir. “Orta aylıq gəlir” dedikdə, ailənin gəlirləri ailə üzvlərinin müraciətdən əvvəlki ardıcıl gələn 12 (on iki) ay müddətinə bütün növ gəlirlərinin, o cümlədən ailə üzvlərinə bağışlanmış hədiyyələr, mülkiyyətdən, ailə üzvlərinə məxsus əmlakdan, şəxsi yardımçı təsərrüfatdan əldə olunan pul və natural formada gəlirlərinin toplusundan ibarətdir. Qeyd olunmalıdır ki, sizin pensiyanız da “orta alıq gəlir”iniz hesablanarkən nəzərə alınar.
Beləliklə, əgər sizin pensiyanız 285 manatlıq ehtiyac meyarından aşağıdırsa, o cümlədən nəvəniz sizin himayənizdədirsə və o azyaşlıdırsa, bu zaman siz ünvanlı sosial yardımın ayrılması və alacağınız ehtimal olunan yardım məbləğininin hesablanması üçün DOST mərkəzlərinə müraciət edə bilərsiniz.
Bir neçə il əvvəl bankdan kredit götürmüşəm. Lakin son aylarda maliyyə çətinliklərinə görə, ödənişləri vaxtında həyata keçirə bilmirəm. Bank əməkhaqqımın tam məbləğini kredit borcunun ödənilməsinə yönləndirə bilərmi?
Gülər MƏMMƏDOVA,
Xırdalan şəhəri
- Sualınızla bağlı bildiririk ki, “İcra haqqında” Qanunun 65.1-ci maddəsinə görə, icra sənədi icra edilərkən borclunun əmək haqqından və ona bərabər sayılan digər gəlirlərindən tutmaların məbləği 50 faizdən çox ola bilməz. Eyni zamanda Azərbaycan Respublikası Mülki Məcəlləsinin 964.2-ci maddəsinə əsasən, müştərinin sərəncamı olmadan hesabdakı pul vəsaitinin silinməsinə məhkəmənin qərarı ilə, habelə qanunla müəyyənləşdirilmiş və ya bankla müştəri arasında müqavilədə nəzərdə tutulmuş hallarda yol verilir. Beləliklə, əgər siz kredit üzrə borcu əməkhaqqı kartınızı verən bankdan almısınızsa, o zaman həmin bank Mülki Məcəllənin yuxarıda adıçəkilən 964.2-ci maddəsinə (əgər kredit müqavilənizdə bu şərt əks olunmuşdursa) əsasən, sizin əməkhaqqı hesabınızdakı məbləğin tamamına borcun tutulmasını yönəldərək onu tam şəkildə tuta bilər.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1767211798.jpg)
