- Mən artıq 10 ildir ki, xarici ölkədə yaşayıram. Azərbaycandan çıxmazdan əvvəl ailə üzvlərimdən birinə notarius vasitəsilə uzunmüddətli etibarnamə vermişəm. Bu müddət ərzində etibarnamədən istifadə edilib-edilməməsi barədə heç bir məlumatım yoxdur. Bilmək istədiyim məsələlər aşağıdakılardır:
a) Etibarnamədən hansı sahələrdə istifadə olunub-olunmadığını yoxlamaq mümkündürmü?
b) Hazırda Azərbaycana gəlmək imkanım yoxdur. Bu halda həmin etibarnaməni necə ləğv edə bilərəm?
Nail BƏŞİRLİ
- Sualınızda qeyd olunan məsələlər Azərbaycan Respublikasının Mülki Məcəlləsi, "Notariat haqqında" Qanun və Nazirlər Kabinetinin 11.09.2000-ci il tarixli, 167 nömrəli Qərarı ilə təsdiqlənmiş "Notariat hərəkətlərinin aparılması qaydaları haqqında" təlimatla tənzimlənir.
Etibarnamədən hansı sahələrdə istifadə olunub-olunmadığını yoxlamaq məsələsinə gəldikdə, notariat orqanlarının apardıqları hərəkətlər Ədliyyə Nazirliyinin Notariat, qeydiyyat və reyestr baş idarəsi tərəfindən qeydə alınır və siz həmin idarəyə rəsmi müraciət etməklə müvafiq məlumatları əldə edə bilərsiniz.
Sualınızın ikinci hissəsinə gəldikdə isə qeyd olunmalıdır ki, Azərbaycan Respublikası Mülki Məcəlləsinin 365.1.3-cü maddəsinə və yuxarıda adıçəkilən təlimatın 79-cu bəndinə əsasən, sizin notariat qaydasında təsdiq edilmiş ərizəniz əsasında verdiyiniz etibarnaməni ləğv etmək hüququnuz var. Bunun üçün siz ərizənizi yaşadığınız ölkədəki Azərbaycan Respublikasının konsulluğunda təsdiqlədərək daha sonra onu poçt vasitəsilə etibarnaməni verdiyiniz notariat ofisinə göndərməlisiniz. Alternativ olaraq, mobil telefonunuzda Ədliyyə Nazirliyinin "Mobil notariat" proqram təminatında qeydiyyatdan keçməklə distant qaydada xitam verə bilərsiniz.
- Brend adımı başqalarının istifadə etməməsi üçün onu hüquqi cəhətdən neçə qoruma altına ala bilərəm?
Fuad DÜNYAMALIYEV,
Mərdəkan qəsəbəsi
- Əvvəl qeyd edilməlidir ki, qanunvericilikdə brend anlayışı "əmtəə nişanı" kimi əks olunmuşdur. "Əmtəə nişanları və coğrafi göstəricilər haqqında" Azərbaycan Respublikası Qanununda əmtəə nişanı dedikdə sahibkarın əmtəələrini və ya xidmətlərini digər sahibkarın əmtəələrindən və ya xidmətlərindən fərqləndirən və qrafik təsvir edilən nişan və ya nişanların hər hansı bir uzlaşması başa düşülür.
Göründüyü kimi, siz öz əmtəə nişanınızı sahibkarlıq fəaliyyətinizin bir hissəsi kimi dövlət qeydiyyatına aldıra bilirsiniz. Dolayısı ilə əmtəə nişanınızın başqa şəxslər tərəfindən istifadə edilməsinin qarşısını almaq üçün onu əmtəə nişanı kimi qeydiyyatdan keçirməklə hüquqi cəhətdən mühafizə altına ala bilərsiniz. Eyni zamanda nəzərə almaq lazımdır ki, bununla brendinizin adı deyil, onun qrafik təsviri qeydiyyata alınır. Qrafik təsvirin daxilində olan sözlər təsvir hesab olunmaqdadır. Qeydiyyat məsələsi "Əmtəə nişanları və coğrafi göstəricilər haqqında" qanunla tənzimlənir. Qeydiyyat üçün siz Azərbaycan Respublikasının Əqli Mülkiyyət Agentliyinə müraciət etməlisiniz. Müraciət zamanı əmtəə nişanının qrafik təsviri, sahibkarın adı, hansı məhsul və xidmətlər üzrə istifadə ediləcəyi və təsisçi barədə məlumat təqdim olunmalı, həmçinin müvafiq dövlət rüsumu ödənilməlidir. Agentlik əvvəlcə sənədlərin tamlığını, sonra isə brendin unikallığını yoxlayır. Əgər hər şey qaydasındadırsa, sizə 10 il müddətinə qüvvədə olan və yenilənə bilən əmtəə nişanı haqqında şəhadətnamə verilir. Bu sənəd sizə həmin əmtəə nişanı üzərində müstəsna hüquqlar verir - yəni başqalarının onu istifadə etməsinin qarşısını ala, hüquq pozuntusu halında məhkəməyə müraciət edə və kompensasiya tələb edə bilərsiniz. Əgər brendinizi beynəlxalq səviyyədə də qorumaq istəyirsinizsə, onun beynəlxalq qeydiyyatı qanunvericiliyə əsasən mümkündür.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1767211798.jpg)
