Varlığımız, ucalığımızdır bayrağımız. İndi o, vüqarla dalğalanır işğaldan azad olunmuş torpağımızda, Vətənimizin hər yerində, neçə-neçə ölkədəki Azərbaycan elçiliklərinin qarşısında.
İdmançılarımızın dünya arenalarında qazandıqları qələbələr zamanı ucalan bayrağımız hər birimizin qəlbini sevinc hissi ilə doldurur, riqqətə gətirir. Müstəqilliyimizin atributlarından biri olan bayrağımız qələbə paradlarında, el şənliklərində, tədbirlərdə Zəfər simvolu kimi dalğalanır. Bakıda Xəzərin qucağındakı Bayraq meydanında ucalır əzəmətli Azərbaycan Bayrağı.
Bu bayraq haqqında gör nə qədər şeirlər yazılıb, nəğmələr bəstələnib. Mənim də qəlbimdən bu misralar süzüldü.
Bayraq bir millətin özünüdərki,
Qeyrəti, məsləki, əqidəsidir.
İliyindən keçib canından gələn,
Dilində göyərən haqqın səsidir.
Uca əcdadımın Qobustandakı
Qayada cizgisi, qavaldaşıdır.
Yüz illər, min illər yol keçib gələn,
Nəsillər yaşadan qan yaddaşıdır.
Xətai idrakı, Babək qılıncı,
Koroğlu sazının öz simidir o.
Babam Füzulinin qərib məzarı,
Hələbdə soyulan Nəsimidir o.
Kəpəzdi, Qoşqardı, Arazdı, Kürdü,
Mayası atəşdən, oddan yoğrulub.
Üç rəngi köçürüb öz varlığına,
Bir aylı gecədə sanki doğulub.
Dönüb bir millətin səcdəgahına,
İgidlər önündə onun and içər.
"Yaşa, ana yurdum, sən yaşa ,"- deyə
Girib döyüşlərə canından keçər.
Vətən övladları igid, cüssəli,
Düşmənin bağrını dağıdar, sökər.
Heç nədən qorxmayan oğullar belə
Bayrağın önündə yalnız diz çökər.
Döyüşlər, savaşlar önündə gedib,
Zəfər ilhamıyla dalğalanıbdır.
Çox vaxt cəbhələrdə hamıdan qabaq
İlkin zərbələri bayraq alıbdır.
Namusdu, qeyrətdi, şöhrətdi, şandı,
Bayraq ucalanda millət ucalar.
Bayrağı ucaldan oğullar varsa,
O millət həmişə zəfərlər çalar.
Dik saxla başını, dik tut, Bayrağım!
Qəddin əyilməsin heç vaxt bir daha!
Hələ qarşıdadır sənin xoş çağın,
Gedək o günləri doğan sabaha!
Seyran CAVADOV,
"Azərbaycan"
31 - Copyjpg_1794009722.jpg)
