Təsərrüfat işləri isə davam edir
İlin 11 ayı arxada qalmışdır. Bu müddət ərzində qazanılan uğurlar onu deməyə əsas verir ki, ağstafalılar cari ili də uğurla yekunlaşdırmağı bacaracaqlar. 9 ayda rayon üzrə ümumi məhsul buraxılışının dəyəri 191,7 milyon, o cümlədən kənd təsərrüfatı məhsullarının dəyəri 106,7 milyon, sənaye məhsullarının dəyəri 16,5 milyon, pərakəndə əmtəə dövriyyəsinin dəyəri 182,3 milyon manat olmuşdur. Rayon üzrə orta aylıq nominal əməkhaqqı 8,2 faiz artaraq 631,3 manata çatmışdır.
1297 nəfər işaxtaran kimi Qazax-Tovuz Regional Məşğulluq Filialının Ağstafa rayonu üzrə Xidmət Şöbəsində qeydiyyata alınmış və həyata keçirilmiş tədbirlər nəticəsində onlardan 546 nəfər işlə təmin olunmuşdur. Hazırda Ağstafa rayonu üzrə 152 vakant iş yerləri mövcuddur.
Məlum olduğu kimi, rayon iqtisadiyyatının əsasını kənd təsərrüfatı təşkil edir. Hesabat dövründə rayon üzrə istehsal olunan kənd təsərrüfatı məhsullarının dəyəri, qeyd etdiyimiz kimi, 106,7 milyon manat olmuşdur. İstehsalın artmasının əsas səbəbi dövlət tərəfindən fermerlərə verilən dəstəkdir. Hazırda rayonda 2026-cı ilin məhsulu üçün müxtəlif növ kənd təsərrüfatı bitkilərinin əkini aparılır. Artıq 6917,5 hektarda şum qaldırılmış və taxıl səpilmişdir.
Söz yox ki, əldə olunmuş uğurlarda suvarmanın düzgün təşkilinin payı az deyil. Ağstafaçay dəryaçasında hazırda 49,3 milyon kubmetr suvarma suyu mövcuddur. Ağstafaçay Hidroqovşağı İstismarı İdarəsi tərəfindən ötən dövr ərzində 19 hidrotexniki qurğu, 13 hidropost və 13 kilometr beton kanallar cari təmir edilmiş, eləcə də kanallar lildən və kol-kosdan təmizlənmişdir. Bundan başqa, Ağstafa Su Meliorasiya Sistemləri İstismarı İdarəsi tərəfindən 106 subartezian quyusunda, 29 hidrotexniki qurğuda, 5 hidrometrik postda və 6,2 kilometr beton kanalda cari təmir işləri görülmüşdür.
Qazanılan iqtisadi uğurlar rayonda aparılan abadlıq-quruculuq işlərinə də müsbət təsir göstərmişdir. Ağstafa şəhərinin abadlaşdırılması, o sıradan küçə və meydanların yenidən qurulması, çoxmənzilli yaşayış bunalarının təmir olunması rayon mərkəzinin simasını xeyli dəyişmişdir. Binaların həyətində uşaqların əyləncələri və istirahətləri üçün abad məhəllələrin yaradılması isə nümunəvi ənənə halını almışdır.
Əhalinin məmnunluğunu təmin edən həm də mavi yanacaqla təchizatda problemlərin aradan qaldırılmasıdır. Şəmkir Regional Qaz İstismar İdarəsinin Ağstafa Xidmət Sahəsi abonetlərin qaz təchizatının yaxşılaşdırılması üçün daxili imkanlar hesabına rayon mərkəzinin bir sıra küçələrində və bəzi kəndlərdə köhnə boruları dəyişmiş, şəhərdə aparılan abadlıq işləri ilə əlaqədar 7400 poqonometr müxtəlif diametrli qaz xətlərini boyamışdır.
Yeri gəlmişkən, qeyd edək ki, Ağstafada bütün məsələlər, o cümlədən təbii qaz təchizatı ilə bağlı Qarabağ müharibəsi qazi və veteranlarının müraciətləri heç zaman cavabsız qalmır. Təkcə ilin əvvəlindən belə müraciətlər əsasında bir çox ünvanda müxtəlif diametrli 72 poqonnometr qaz xəttinin yeri dəyişdirilmiş, 2 şəhid ailəsinin fərdi yaşayış evi qazla təmin edilmişdir. Xətai kəndində 3, Yenigün kəndində 2 qaztənzimləyici qurğu, Dağ Kəsəmən kəndində 2 qaz kranı yenilənmiş, Poylu kəndində torpaqla təmasda olan qaz xətti dayaqlar üzərinə qaldırılmışdır.
Ümumtəhsil məktəblərinin maddi-texniki bazasının gücləndirilməsi istiqamətində də yeniliklər olmuşdur. Məsələn, Heydər Əliyev Fondu tərəfindən Vurğun qəsəbəsində 420 və Zəlimxan kəndində 220 şagirdlik tam orta məktəblərin tikintisi başa çatmışdır. Köçvəlili kəndində isə 132 şagirdlik modul tipli ibtidai məktəb binası istifadəyə verilmişdir.
Səhiyyə sahəsinə gəldikdə, "Ağstafa Rayon Mərkəzi Xəstəxanası" Publik Hüquqi Şəxs hesabat dövrü ərzində 348 xəstəni dispanser qeydiyyatına götürmüşdür. Hazırda 5167 nəfər dispanser qeydiyyatında saxlanılır. Onlar mütəmadi olaraq pulsuz dərmanlarla təmin edilirlər.
Sabir ƏLİYEV,
"Azərbaycan"
