Azərbaycan ilə Türkiyə arasında quru sərhədindən keçən ticarətin həcminin artacağı gözlənilir. Sərhəd Ticarət Mexanizmi bunun üçün mühüm dəstək rolunu oynayır. Bu sözləri ölkəmizin Qarsdakı baş konsulu Zamin Əliyev AZƏRTAC-ın müxbiri ilə söhbətində deyib.
Diplomat bildirib ki, Türkiyənin şərqindən olan sahibkarlarla Azərbaycanın Naxçıvan, Qarabağ və Şərqi Zəngəzur iqtisadi rayonlarının şirkətləri arasında yeni əlaqələrin yaradılması məsələsi iki qardaş ölkənin müvafiq strukturları səviyyəsində müzakirə olunur. Biznes forumların, sahibkarların qarşılıqlı səfərlərinin təşkili ilə bağlı fikir mübadiləsi aparılır.
Diplomat xatırladıb ki, Azərbaycan İqtisadiyyat Nazirliyinin nümayəndələri 2024-cü il noyabrın 27-də Azərbaycanla həmsərhəd İqdır vilayətinə səfər ediblər və burada Sərhəd Ticarət Mexanizmindən səmərəli istifadə məsələləri müzakirə olunub.
“Türkiyə tərəfi milli qanunvericiliyə uyğun olaraq Qars və İqdırı Naxçıvan Sərhəd Ticarət Mexanizminin əhatə etdiyi vilayətlər kimi müəyyən edib. Bu mexanizm Naxçıvandan Türkiyəyə hər il müəyyən həcmdə məhsulların çatdırılmasına imkan verir”, - deyə baş konsul qeyd edib.
Diplomat Azərbaycan Prezidenti İlham Əliyevin yanvarın 7-də yerli televiziya kanallarına verdiyi müsahibəyə diqqət çəkib və dövlət başçısının “həm Qarabağ, həm Şərqi Zəngəzur və eyni zamanda, ona o qədər də uzaq olmayan Naxçıvan Muxtar Respublikası iqtisadi, sosial, yaşıl enerji və təhlükəsizlik nöqteyi-nəzərdən vahid bir böyük məkana çevrilməlidir, halbuki bu, bizim bölgüyə görə üç regiondur” sözlərini xatırladıb.
“Azərbaycanın tarixən bir-birinə bağlı olan bu regionları vahid konsepsiya əsasında inkişaf edir. Ona görə də Qarabağ və Şərqi Zəngəzur şirkətlərinin məhsullarının yuxarıda qeyd olunan ticarət mexanizminin əhatə dairəsinə daxil edilməsi vacib olardı”, - deyə baş konsul bildirib.
