Azərbaycan Qida Təhlükəsizliyi Agentliyinin (AQTA) nümayəndə heyəti iyulun 29-dan iyulun 31-dək Belarus Respublikasında işgüzar səfərdə olub. Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, səfər iki ölkə arasında qida təhlükəsizliyi, heyvan və bitki sağlamlığı, o cümlədən ölkəmizdə baytarlıq preparatlarının istehsalı sahəsində əməkdaşlıq əlaqələrinin inkişaf etdirilməsi üzrə müzakirələrin aparılması məqsədi daşıyıb.

Səfər çərçivəsində agentliyin sədr müavini Balarəhim Quliyevin rəhbərliyi ilə nümayəndə heyətinin Belarus Respublikasının Kənd təsərrüfatı və ərzaq naziri Anatoliy Lineviçin rəhbərlik etdiyi nümayəndə heyəti ilə görüşü keçirilib. Görüş zamanı yeni təyin olunan Belarus Respublikasının kənd təsərrüfatı və ərzaq nazirinə təbriklər çatdırılıb. Azərbaycan və Belarus respublikalarının müvafiq qurumları arasında davam etdirilən əlaqələrin daha da genişləndirilməsi sahəsində potensialın artırılmasının əhəmiyyətindən bəhs olunub.

Müzakirələr zamanı Azərbaycanda baytarlıq preparatları istehsalının yaradılmasına dair əldə edilmiş razılaşmaların həyata keçirilməsi məsələlərinə toxunulub. İki ölkə arasında baytarlıq preparatlarının istehsalının yaradılması üzrə konkret tədbirləri əks etdirən yol xəritəsinin hazırlanması barədə razılıq əldə edilib. Həmçinin heyvanların identifikasiyası, qeydiyyatı və izlənılməsi sisteminin yaradılması və tətbiqi sahəsində cari əməkdaşlığın perspektivlərinə baxılıb.