Azərbaycanın Rusiyadakı səfirliyində 20 Yanvar faciəsinin 36-cı ildönümünə həsr olunmuş matəm tədbiri keçirilib.
AZƏRTAC xəbər verir ki, tədbirdə Azərbaycan diasporunun nümayəndələri, Rusiyanın Azərbaycanlı Gənclər Təşkilatının (RAGT) fəalları, tələbələr, eləcə də səfirliyin və Heydər Əliyev Fondunun Rusiyadakı nümayəndəliyinin əməkdaşları iştirak ediblər. Diplomatik nümayəndəliyin binasında 1990-cı il yanvarın 20-də sovet qoşunlarının Bakıya daxil olması və mülki şəxslərin qətlə yetirilməsi ilə nəticələnən faciəli hadisələrin qurbanlarına həsr olunmuş xatirə stendi qurulub.
Tədbirdə şəhidlərin xatirəsinə bir dəqiqəlik sükut elan edilib.
Azərbaycanın Rusiyadakı səfiri Rəhman Mustafayev və iştirakçılar xatirə stendi önünə gül dəstələri qoyublar. Həmçinin Moskvada və Rusiyanın digər bölgələrində Azərbaycanı təmsil edən ictimai birliklər və diaspor təşkilatları adından əklillər təqdim edilib.
Matəm tədbirində qeyd olunub ki, xalqımızın Ümummilli Lideri Heydər Əliyev 1990-cı il yanvarın 21-də Azərbaycanın Moskvadakı daimi nümayəndəliyinə gəlib və orada mətbuat konfransı keçirib. O, Bakıda törədilən vəhşilikləri qətiyyətlə pisləyib və onları mülki əhaliyə qarşı terror adlandırıb. Ulu Öndər hadisələrə siyasi və hüquqi qiymət verilməsini və faciənin günahkarlarının məsuliyyətə cəlb edilməsini tələb edib, bununla da Azərbaycan xalqı ilə həmrəyliyini nümayiş etdirib.
Çıxışlarda vurğulanıb ki, məhz Heydər Əliyevin təşəbbüsü və əzmkarlığı sayəsində 20 Yanvar faciəsinə sonradan dövlət səviyyəsində siyasi və hüquqi qiymət verilib.
Həmin qanlı günün şahidi olan tədbir iştirakçıları 1990-cı ilin yanvar hadisələri ilə bağlı xatirələrini bölüşüblər.
jpg_1790976482.jpg)
jpeg_1791196410.jpeg)
jpg_1791192304.jpg)
