Noyabrın 8-də Azərbaycan xalqı, bütün dünya azərbaycanlıları Vətənimizin ərazi bütövlüyü uğrunda canlarından keçmiş şəhidlərimizin xatirəsini dərin ehtiramla anıb.
AZƏRTAC xəbər verir ki, Zəfər Günündə, bu şanlı bayram günündə ən çox ziyarət olunan məkanlardan biri qəhrəman övladların dəfn olunduğu Şəhidlər xiyabanları olub. Səhər saatlarından başlayaraq Vətən müharibəsinin iştirakçıları, qazilər, hərbçilər, şəhid ailələri, ictimaiyyət nümayəndələri və başqaları Birinci və İkinci Qarabağ müharibələrində şəhid olmuş döyüşçülərin xatirəsinə sonsuz ehtiramın ifadəsi olaraq Şəhidlər xiyabanlarını ziyarət ediblər. Qəhrəman Vətən övladlarının məzarları üzərinə güllər düzülüb, şəhidlərimizin ruhlarına dualar oxunub. Uşaqdan böyüyə hər kəs suverenliyimizi, ərazi bütövlüyümüzü bərpa edən qəhrəmanların xatirəsinə ehtiramını bildirib, onlara bir daha minnətdarlığını ifadə edib.
Ehtiyatda olan baş əsgər Elşən Məmmədov Zəfər Günündə döyüş yoldaşlarını İkinci Şəhidlər xiyabanında ziyarət edib. Zəfər Gününü xalqın uğuru hesab edən E. Məmmədov AZƏRTAC-a müsahibəsində söyləyib: “Zəfər hissini yaşamış bir hərbçi kimi çox söz deyə bilərəm. Mən fəxr edirəm ki, 44 gün döyüşmüşəm. Başda şəhid ailələri, qazilər və veteranlar olmaqla, hamını Zəfər Günü münasibətilə təbrik edirəm”.
Milli Qəhrəman, şəhid general-mayor Polad Həşimovun anası Səmayə Həşimova böyük itkini qürurla və kədərlə yada salıb: “Polad 2020-ci il iyulun 14-də şəhid olanda təkcə bizim ev yox, bütün Azərbaycan ayağa qalxdı. Onun şəhadətindən sonra minlərlə gəncin qəlbində intiqam və ədalət hissi alovlandı. Poladın yolunu davam etdirən gənclərimiz öz canları və sağlamlıqları bahasına 44 günlük şanlı Qələbəni qazandılar. Torpaqlarımızı itirəndə neçə-neçə qəhrəman oğullarımızın arzusu yarımçıq qaldı. Bu gün o arzuları gənclərimiz qanları və canları ilə həyata keçirdilər. Vətəndaşlarımız Xankəndiyə, Xocalıya qayıdanda, orada həyat yenidən canlananda Polad kimi igidlərin ruhu da rahatlıq tapır. Çünki onlar məhz bu günlər üçün canlarından keçiblər”.
Şəhid kapitan Elvin Kazımovun anası Fədayə Kazımova övladının 44 günlük savaşın qəhrəmanları sırasında olmasından qürur duyduğunu söyləyib. “Elvin evini, ailəsini, anasını sevirdi, amma hamıdan çox Vətənini seçdi. Aprel döyüşlərində iştirak etmişdi, yaralanmışdı. Kəşfiyyatçı idi. Oktyabrın 6-sı şəhid olması barədə xəbəri gəldi. Qorxmaz idi, əsgərlərə də cəsarətli olmağı öyrədirdi. Onlara deyirdi ki, ölməyə yox, öldürməyə gəlmişik. Elə də şəhid oldu. Mənim iki oğlum müharibədə iştirak edib”,- deyə şəhid anası əlavə edib.
Dövlət Sərhəd Xidmətinin kapitanı, şəhid Fərid Mehbalıyevin atası Kəmaləddin Mehbalıyev övladının qəhrəmanlığından danışarkən diqqətə çatdırıb ki, Fərid ailəli idi və iki qızı var. O, 2022-ci il sentyabrın 12-də Ermənistan silahlı qüvvələrinin genişmiqyaslı təxribatının qarşısının alınması zamanı şəhid olub.
Şəhid Elsevər Paşayevin qayınatası Bariz Baxşəliyev Zəfər Gününü həm hüznlə, həm də qürurla qeyd edənlərdəndir. “Bugünkü Qələbə bu igidlərin canı, qanı bahasına qazanılıb. Onların hərəsi bir dastan yazıb. Göz görə-görə ölümə gediblər. Elsevər Füzulidən Laçınadək döyüşüb. 5 dil bilirdi, 15 xarici dövlətdə təlim keçmişdi, sülhməramlılarda xidmət edirdi”,- deyə B. Baxşəliyev əlavə edib.
Vətən müharibəsinin qazisi Elxan Xəlilli isə Füzuli, Hadrut və Zəngilan uğrunda könüllü döyüşməsindən söhbət açıb. O vurğulayıb ki, Zəfər Gününü həm qürur, həm də o günləri xatırladan sızıltı ilə qarşılayır.
Xatırladaq ki, Prezident İlham Əliyevin müvafiq Sərəncamına əsasən, noyabrın 8-i Azərbaycanda Zəfər Günü kimi qeyd edilir.
jpeg_1765884927.jpeg)
jpeg_1765884704.jpeg)
