Azərbaycan və Çin arasında kosmosda əməkdaşlıq və kosmik fəzadan dinc məqsədlərlə istifadə üzrə imzalanmış Anlaşma Memorandumu ölkəmizin kosmik sənayesinə strateji təsir göstərə biləcək mühüm addım kimi qiymətləndirilir. Çin bu sahədə Ay və Mars missiyaları həyata keçirmiş, “BeiDou” naviqasiya sistemi və “Tiangong” kosmik stansiyası ilə texnoloji müstəqilliyini təsdiqləmiş güclü tərəfdaşdır. Bu əməkdaşlıq Azərbaycan üçün yalnız texnoloji transfer deyil, həm də kosmik layihələrdə birbaşa tərəfdaşlıq imkanları yaradır.
Məsələ ilə bağlı AZƏRTAC-a açıqlama verən Rəqəmsal İnkişaf və Nəqliyyat Nazirliyi yanında İctimai Şura üzvü, Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri Elvin Abbasov bildirib ki, sənədin praktik nəticələrindən biri “Azərkosmos”un peyk imkanlarının genişləndirilməsi və daha dəqiq müşahidə-kommunikasiya texnologiyalarına çıxış ola bilər.
Çinlə birgə peyklərin orbitə buraxılması, məlumatların emalı və istifadəsi üzrə birgə laboratoriyaların qurulması da gündəmdədir. Bu əməkdaşlıq iqtisadiyyatla yanaşı, fövqəladə hallar, ətraf mühitin monitorinqi və milli təhlükəsizlik sahəsində də ciddi üstünlüklər yarada bilər.
Ekspertin fikrincə, uzunmüddətli perspektivdə bu tərəfdaşlıq Azərbaycanın regional kosmik texnologiyalar mərkəzinə çevrilməsinə və beynəlxalq arenada tanınmasına təkan verə bilər. Eyni zamanda, Azərbaycanın COPUOS və digər beynəlxalq qurumlarda daha fəal iştirakı üçün zəmin yaradacaq.
Əməkdaşlıq süni peyk texnologiyaları üzrə milli kadr potensialının formalaşmasına, gənc alimlərin bu sahəyə cəlb olunmasına da xidmət edəcək.
“Nəticə etibarilə, bu razılaşma Azərbaycanın kosmos sahəsində yalnız istifadəçi deyil, həm də tədqiqatçı və texnologiya istehsalçısı ölkəyə çevrilməsi yolunda ciddi mərhələdir”, – deyə Elvin Abbasov qeyd edib.
