Artıq BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) öz işini başa çatdırıb. Ölkəmizin mükəmməl təşkilatçılığı beynəlxalq tədbirin yüksək səviyyədə keçirilməsinə şərait yaratdı. 

Bəzi ermənipərəst beynəlxalq təşkilatların və demokratiyadan, qanundan dəm vurduqları halda özləri ən böyük haqsızlığa, ədalətsizliyə yol verən dövlətlərin ölkəmizin COP29-a evsahibliyini boykot etmək üçün özlərini oda-közə vurmaları, qarayaxma kampaniyaları bu dəfə də gözlədikləri nəticəni vermədi.

Son illər Azərbaycan həmin beynəlxalq təşkilatların və dövlətlərin düyünə saldıqları problemlərini özü həll etməklə öz gücünü və qətiyyətini nümayiş etdirir. 2020-ci ildə baş verən 44 günlük Vətən müharibəsində qazandığı Zəfərlə Ermənistanın otuz ilə yaxın işğal altında saxladığı ərazilərini azad etdi, 2023-cü ildə birgünlük lokal xarakterli antiterror əməliyyatları nəticəsində suverenliyinin tam bərpasına nail oldu. İndi həmin ərazilərdə öz gücü ilə tikinti-bərpa, quruculuq işlərini sürətlə davam etdirir. Böyük qayıdış layihəsini reallaşdırır, Qarabağın və Şərqi Zəngəzurun Ermənistanın işğalı səbəbindən yurdundan didərgin düşmüş sakinləri geri dönürlər.

Azərbaycanın Qarabağda erməni separatizminə son qoyması, sülhün bərqərar olması üçün atdığı ardıcıl və əzmli addımları, mövqeyində səbatlı olması bütövlükdə Cənubi Qafqazın əmin-amanlığına, təhlükəsizliyinə yol açır. Fransa başda olmaqla bəzi Qərb ölkələrinin və beynəlxalq təşkilatların narahatlığının başlıca səbəbi də budur. 

Azərbaycana qarşı qərəzli yanaşmadan, ikili standartlar siyasətindən əl çəkməyənlər ölkəmizin evsahibliyini də böyük hiddətlə qarşıladılar. Azərbaycana qarşı informasiya hücumlarına başladılar, dezinformasiyaları dövriyyəyə buraxdılar. COP29 ərəfəsində müxtəlif siyasi dairələrdən edilən bu hücumların, təhdidlərın, çirkin kampaniyaların məqsədi Azərbaycanı qarşısına qoyduğu hədəflərdən yayındırmaq, yüksələn nüfuzuna kölgə salmaq idi. Respublikamızla bağlı həqiqətdən tamamilə uzaq, qərəzli məlumatların məqsədyönlü şəkildə yayılması ölkəmizə qarşı hibrid təhdidlərin təşkilini hədəf götürdü. 

Ekoloji problemlər, iqlim dəyişikliyi, ətraf mühitin mühafizəsi, havanın çirklənməsi ilə bağlı olan bu beynəlxalq tədbiri bütün vasitələrlə siyasiləşdirməyə çalışırdılar. Azərbaycana qarşı hibrid təhdidlərlə, həmçinin kiberhücumlar, dezinformasiya xarakterli məlumatların yayılması, sosial şəbəkələrdə qarayaxma kampaniyaları ilə məqsədlərinə çatmağa çalışırdılar.

Həmin günlərdə Qərb mediasında respublikamızın əleyhinə sifarişli yazıların sayı da artdı. Ölkəmizin gücünün daha da artdığı bir vaxtda COP29 ərəfəsində verilən anti-Azərbaycan açıqlamalarının, yazılan şər, böhtan dolu məqalələrin heç bir nəticəsi olmayacağı şübhəsiz idi. Prezident İlham Əliyev oktyabrın 10-da Pre-COP29 tədbirinin iştirakçılarına müraciətində bəyan etmişdi: "Burada bəzi media qurumlarının Azərbaycanın imicini ləkələmək məqsədi daşıyan qarayaxma kampaniyasına toxunmaya bilmərəm. Bu cəhdlər əbəsdir və bizi iqlim dəyişmələrinin mənfi təsirləri ilə mübarizə aparmaq üçün nəcib missiyamızı həyata keçirməkdən çəkindirə bilməz".

COP29 öncəsi Azərbaycana qarşı hücumların təşkilatçılarının, icraçıların qərəzli, açıq-aşkar düşmənçilik xarakteri daşıyan kampaniyalarla məqsədlərinə çata bilmədiyinə ən gözəl cavabı da Prezident İlham Əliyev noyabrın 12-də Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimindəki çıxışında verdi: "Onlara pis xəbər var: bizim 196 ölkədən gəlmiş və qeydiyyatdan keçmiş 72 min iştirakçımız var. Onların sırasında 80 prezident, vitse-prezident və baş nazir var. Beləliklə, dünya Bakıya toplaşıb və biz bütün dünyaya deyirik: Azərbaycana xoş gəlmisiniz!"

COP29-un davam etdiyi günlərdə də Qərbin erməni lobbisinə xidmət etmək üçün hər cür rəzilliyi özlərinə rəva görən siyasətçiləri, yalan xəbər verməkdə yarışa girən mediası, "müstəqil" QHT-ləri ölkəmiz haqqında dezinformasiya və səhv məlumatlarla öz mövqelərini göstərdilər.

Ancaq fitnəkarlara rəğmən dünyanın ən böyük iqlim tədbiri noyabrın 11-də böyük uğurla başladı və davam etdi. Dünya Azərbaycana toplaşdı. Noyabrın 12-də COP29-un Liderlər Sammitinin açılış mərasimində çıxış edən Prezident İlham Əliyevin vurğuladığı kimi, ötən ilin dekabrında təxminən 200 ölkənin yekdil qərarı ilə Azərbaycana COP29-a evsahibliyi etmək şərəfi verildi: "Biz bu qərarı ölkəmizə olan hörmətin əlaməti, beynəlxalq arenada oynadığımız fəal rolun dəyərləndirilməsi kimi görürük". Bu mötəbər beynəlxalq tədbirə evsahibliyi ilə Azərbaycan göstərilən etimada, inama layiq olduğunu təsdiq etdi. Bu dəfə də ölkəmiz qərəzli, fitnəkar anti-azərbaycançı qüvvələrin cəhdlərini öz uğurları ilə puça çıxardı.

COP29 konfransının yekununda bəşəriyyətin gələcəyi üçün müstəsna önəm daşıyan qərarlar qəbul edildi. Qlobal iqlim dəyişmələri ilə bağlı müzakirələrin aparıldığı toplantı dünya ölkələrinin, xüsusilə də inkişaf etməkdə olan dövlətlərin gözlədikləri qərarların qəbulu ilə başa çatdı.

Bu beynəlxalq tədbir eyni zamanda Azərbaycanın liderlik qabiliyyətini və beynəlxalq nüfuzunu bir daha nümayiş etdirdi. Genişmiqyaslı tədbirin öhdəsindən ölkəmiz uğurla gəldi, bu sahədə yüksəksəviyyəli təşkilatçılıq qabiliyyətini nümayiş etdirdi. COP29-un yüksək səviyyədə təşkilinə görə bütün tərəflərin yekdilliklə Azərbaycana rəsmi şəkildə təşəkkür elan olunması barədə qərar qəbulu bunun nəticəsidir.

Zöhrə FƏRƏCOVA,

"Azərbaycan"