Azərbaycan Tibb Universitetində respublikamızda 2023-cü ilin “Heydər Əliyev İli” elan edilməsi ilə əlaqədar “Azərbaycan dövlətçilik tarixində görkəmli ictimai-siyasi xadim Əziz Əliyevin xidmətləri” adlı dərs vəsaitinin təqdimatı keçirilib.
AZƏRTAC xəbər verir ki, əvvəlcə Ulu Öndər Heydər Əliyevin anadan olmasının 100 illiyinə həsr olunan videoçarx nümayiş etdirilib.
Universitetin İctimai fənlər kafedrasının tarix elmləri üzrə fəlsəfə doktoru dosent Leyla Talışınskinin yazdığı dərs vəsaiti Azərbaycan dövlətçilik tarixində görkəmli xidmətləri olmuş Əziz Əliyevin ictimai-siyasi və elmi fəaliyyətinə həsr edilib.
Tədbirdə təqdimat zamanı ATU-nun tərbiyə işləri üzrə prorektoru Zülfüqar Musabəyov, İctimai fənlər kafedrasının müdiri professor Qoşqar Əliyev, Daxili xəstəliklər kafedrasının professoru Tamfira Əliyeva, AMEA-nın Tarix İnstitutunun direktor müavini, professor Cəbi Bəhramov və digərləri çıxış edərək XX əsrin 1920-1930-cu illərində Azərbaycan SSRİ-də Əməkdar həkim, tibb elmləri doktoru Əziz Əliyevin alim kimi həyat yolu və ölkənin səhiyyə təşəkkülündə uğurlu fəaliyyətindən danışıblar.
Kitabın müəllifi Leyla Talışınski AZƏRTAC-a müsahibəsində deyib: “Hazırladığım dərs vəsaiti Azərbaycan dövlətçilik tarixində görkəmli xidmətləri olmuş Əziz Əliyevin ictimai siyasi və elmi fəaliyyətinə həsr edilib. Onun fəaliyyəti haqqında ümumiləşdirilmiş əsərin yazılmasına çox böyük ehtiyac vardı. Bu dərs vəsaitinin yazılmasında müxtəlif mənbələrdən, o cümlədən arxiv sənədlərindən, tarixi materiallardan, bədii mətnlərdən geniş istifadə edilib. Dərs vəsaitinin Azərbaycan dövlətçilik tarixinin öyrənilməsində əhəmiyyətli rolu olacağına inanıram.
Nəşrdə Əziz Əliyevin XX əsrin 1920-1930-cu illərdəki dövlətçilik tarixində və tibb sahəsində uğurları ətraflı araşdırılıb. Həmçinin İkinci Dünya müharibəsi illərində Əziz Əliyevin İrandakı missiyası da təhlil edilib və ətraflı məlumat verilib. Eləcə də 1942-ci ildən sonra Əziz Əliyevin Dağıstan Respublikasına rəhbərlik etdiyi dövrdə həyata keçirdiyi mühüm təşkilatçılıq və yaradıcılıq missiyası barədə məlumat verilib. Bu dərs vəsaitinin Azərbaycan dövlətçilik tarixinin öyrənilməsi ilə maraqlanan tələbələrə, aspirantlara, ümumiyyətlə, geniş oxucu kütləsi üçün dəyərli nəşr olacağına ümidvaram”.
19 (1)jpg_1771885865.jpg)
