Bütün bunlar həm də respublikamıza qlobal səviyyədə olan yüksək ehtiramdan və etimaddan xəbər verir
Respublikamız və xüsusən Bakı şəhəri uzun müddətdir ki, dünyada beynəlxalq tədbirlər mərkəzi kimi tanınır. Azərbaycanın inkişafı və burada möhkəm siyasi-ictimai sabitliyin hökm sürməsi ölkəmizi qlobal ictimaiyyət üçün cəlbedici edir. Elə buna görə Bakıda indiyə qədər çoxsaylı mötəbər beynəlxalq tədbirlər təşkil olunub.
Hər bir tədbir yüksək təşkilatçılığı ilə yadda qalıb
"Avroviziya" mahnı müsabiqəsi, I Avropa Oyunları, IV İslam Həmrəyliyi Oyunları və hazırda da Bakıda keçirilməsi davam edən "Formula-1" kimi kütləvi beynəlxalq tədbirlər yüksək təşkilatçılığı ilə yadda qalıb. Bundan başqa indiyədək ölkəmizdə beynəlxalq təşkilatların çoxlu sayda siyasi, iqtisadi və humanitar mövzulu tədbirləri keçirilib. Fəaliyyətdə olan, habelə sabiq dövlət və hökumət başçılarının, tanınmış siyasi xadimlərin, dünyanın müxtəlif yerlərindən gələn siyasi ekspertlərin, jurnalistlərin iştirakı ilə keçirilən Qlobal Bakı Forumu artıq ənənə halını alıb. Son olaraq bu ilin martında Bakıda "Dünya düzəninin yenidən düşünülməsi: Çağırışların fürsətə çevrilməsi" mövzusunda XII Qlobal Bakı Forumu keçirilib. Prezident İlham Əliyevin himayəsi altında keçirilən bu foruma beynəlxalq səviyyədə böyük maraq var.
Bakı həm də digər beynəlxalq tədbirin - Ümumdünya Mədəniyyətlərarası Dialoq Forumunun keçirildiyi ünvandır. Bu ilin mayında Bakı VI Ümumdünya Mədəniyyətlərarası Dialoq Forumuna evsahibliyi edib. Bu forum Prezident İlham Əliyev tərəfindən 2008-ci ildə irəli sürülmüş mədəniyyətlərarası dialoqa dair "Bakı Prosesi"nin tərkib hissəsidir. "Bakı Prosesi" bütün dünyada mədəniyyətlərarası dialoqa dair vacib platforma kimi qəbul olunur.
Son dövrlərdə Bakıda keçirilən başqa bir beynəlxalq tədbir BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) oldu. 2024-cü ilin noyabrında keçirilən COP29-da 197 ölkədən 80 minə yaxın iştirakçı, o cümlədən 80 prezident, vitse-prezident və baş nazir iştirak etdi. Ölkəmizə gələn xarici qonaqlar yerli və xarici media resurslarına açıqlamalarında COP29-un yüksək səviyyədə təşkil olunduğunu bildirdilər.
Qarşıdakı dövrdə də Azərbaycan bir neçə beynəlxalq tədbirə evsahibliyi edəcək. Bunlardan biri 2025-ci ilin payızında keçiriləcək III MDB Oyunlarıdır. III MDB Oyunları 23 idman növü üzrə təşkil edilməklə, "2025-ci ildə Müstəqil Dövlətlər Birliyinin idman paytaxtı" olan Gəncə şəhərində və ölkəmizin digər 6 şəhərində sentyabrın 28-dən oktyabrın 8-dək müddətdə keçiriləcək. Gəncədə 8, Mingəçevirdə 4, Qəbələdə 4, Şəkidə 3, Göygöldə 2, Yevlaxda 1 və Xankəndidə 1 idman növü üzrə yarışlar təşkil ediləcək. Əlbəttə ki, respublikamızın Azərbaycanın MDB Oyunları kimi əhəmiyyətli bir idman tədbirinə evsahibliyi etməsi onun idman ölkəsi kimi artan nüfuzuna, gələcəkdə belə mühüm layihələrin respublikamızda daha yüksək səviyyədə təşkil edilməsinə müsbət təsir göstərəcək.
Bakı Ümumdünya Şəhərsalma Forumunun On Üçüncü sessiyasına evsahibliyi edəcək
Qarşıdakı dövrdə respublikamızda keçiriləcək digər növbəti beynəlxalq tədbir BMT-nin Ümumdünya Şəhərsalma Forumunun On Üçüncü sessiyası olacaq. Qeyd edək ki, Prezident İlham Əliyev Ümumdünya Şəhər Forumunun "Daha yaxşı gələcək naminə şəhərlərimizi dəyişdirək" mövzusunda 2022-ci ilin iyun ayında Polşanın Katovitse şəhərində keçirilən 11-ci sessiyasında videoformatda çıxışı zamanı Azərbaycanın Ümumdünya Şəhər Forumunun növbəti sessiyalarının birinə evsahibliyi etmək arzusunda olduğunu bildirmişdi. "Əminəm ki, yüksəksəviyyəli beynəlxalq tədbirlərə evsahibliyi etməkdə böyük təcrübəyə malik ölkə olan Azərbaycanda Ümumdünya Şəhər Forumunun keçirilməsi uğurlu olacaqdır", - deyə dövlətimizin başçısı qeyd etmişdi. Şəhərsalma sahəsində Azərbaycanın uğurlu fəaliyyəti layiqincə qiymətləndirilərək, irimiqyaslı qlobal tədbirlərdən hesab edilən Ümumdünya Şəhərsalma Forumunun On Üçüncü sessiyasının (WUF13) 2026-cı ildə Bakı şəhərində keçirilməsi qərara alınıb.
Respublikamızda şəhərsalma fəaliyyəti sosial-iqtisadi inkişafın əsas hədəflərindən biridir. Son illərdə ölkəmizdə bu istiqamətdə ardıcıl və məqsədyönlü addımlar atılır, şəhərsalma və urbanizasiya sahəsində müasir standartlar tətbiq edilməklə Bakıda və respublikanın digər şəhərlərində müxtəlif layihələr həyata keçirilir. Torpaqlarımızın işğaldan azad edilməsindən sonra isə respublikamızda şəhərsalma fəaliyyəti yeni mərhələyə qədəm qoyub. İşğaldan azad edilmiş şəhərlərimiz ən müasir tələblər, o cümlədən "ağıllı" şəhər konsepsiyaları əsasında bərpa olunur. Bu gün Qarabağ və Şərqi Zəngəzur iqtisadi rayonlarında tamamilə dağıdılmış yüzlərlə şəhər, kənd və qəsəbənin planlı şəkildə yenidən qurulması həyata keçirilir.
Qeyd edək ki, 2022-ci və 2023-cü illərdə respublikamızda milli şəhərsalma forumları keçirilib. Azərbaycanın müasir şəhərsalma təcrübəsi məhz bu forumlar vasitəsilə bütün dünyaya bəyan olunub. Ağdam və Zəngilanda keçirilən bu forumlar şəhərsalma ilə bağlı ən dolğun müzakirələrin aparıldığı bir platformaya çevrilib. Bakıda keçiriləcək BMT-nin Ümumdünya Şəhərsalma Forumunun On Üçüncü sessiyası isə respublikamızın inkişaf strategiyalarının və dayanıqlı şəhərsalma sahəsindəki nailiyyətlərinin beynəlxalq ictimaiyyətə çatdırılması işinə əhəmiyyətli töhfə verəcək.
Rəşad CƏFƏRLİ,
"Azərbaycan"
jpeg_1765897678.jpeg)
