BMT-nin Baş katibi Antonio Quterreş rəhbərlik etdiyi təşkilatın təşkil etdiyi süni intellekt (AI) üzrə yeni müstəqil ekspert qrupunun açılış iclasında bildirib ki, onun üzvü olan mütəxəssislər yeni texnologiyanın bəşəriyyətin rifahı naminə necə istifadə olunacağını formalaşdırmaq üzrə böyük məsuliyyət daşıyırlar.
AZƏRTAC təşkilatın məlumatına istinadla xəbər verir ki, BMT-nin rəhbəri çərşənbə axşamı günü süni intellekt üzrə Müstəqil Beynəlxalq Elmi Panelinin ilk iclasında alimlərə müraciət edərək bildirib: “Sizin hər biriniz müxtəlif bölgələri və elm sahələrini təmsil edirsiniz, süni intellekt və əlaqəli sektorlarda böyük təcrübə qazanırsınız. Siz dünyanın əvvəllər heç görmədiyi bir texnoloji nailiyyəti təmsil edirsiniz”.
O əlavə edib ki, ekspert qrupunun üzvü olan 40 alimin məqsədi süni intellektdən istifadə sahəsində mövcud olan boşluğu aradan qaldırmaq, habelə bu texnologiyanın iqtisadiyyatlara və cəmiyyətlərə real təsirini qiymətləndirməkdir. Bu, ölkələrə bərabər şəraitdə eyni səviyyədə hərəkət etməyə imkan verəcək.
Ekspertlər BMT də daxil olmaqla, heç bir hökumətdən, şirkətdən və ya qurumdan asılı olmayan elmi qiymətləndirmələr aparacaqlar. Quterreş vurğulayıb: “Süni intellekt ildırım sürəti ilə irəliləyir, heç bir ölkə, şirkət və tədqiqat sahəsi təkbaşına tam mənzərəni görə bilməz. Dünyanın təcili olaraq süni intellektin ortaq, qlobal bir anlayışına ehtiyacı var. Bu, ideologiyaya deyil, elmə əsaslanmalıdır”.
Onun sözlərinə görə, süni intellekt onilliklər ərzində sülhü və təhlükəsizliyi, insan hüquqlarını və davamlı inkişafı formalaşdıracaq. AI texnologiyalarının ətrafında yaranan anlaşılmazlıq barədə xəbərdarlıq edən BMT-nin Baş katibi deyib: “Faktların gizlədildiyi və ya təhrif edildiyi zaman qorxunun nə qədər tez yayıla biləcəyini, etibarın necə pozulduğunu və bölünmənin necə dərinləşdiyini gördüm. Geosiyasi gərginliyin artdığı və münaqişələrin qızışdığı bir vaxtda ortaq anlaşmaya, təhlükəsiz və məsuliyyətli süni intellektə ehtiyac daha çoxdur”.
Süni intellektin sürətli inkişafını diqqətə çatdıran Quterreş alimlərə bildirib ki, hazırda elmi panel zamanla yarışır. AI-nin çox sürətlə irəliləməsi ilə bağlı narahatlıqlara toxunan Baş katib deyib: “Belə genişmiqyaslı texnoloji inkişafın şahidi olmamışıq. Həqiqətən də yüksək sürətlənmə səviyyəsinə çatmışıq”.
Baş katib BMT-nin süni intellekt siyasətinə yönəlmiş məsələlərlə məşğul olan digər təşəbbüsü çərçivəsində - AI üzrə Yüksəksəviyyəli Məsləhət Orqanında əldə edilən irəliləyişlərə əsaslanaraq vurğulayıb ki, yeni ekspert qrupu həmin təcrübədən istifadə edə bilər. “Bu gün dünyamız üçün bundan daha vacib bir vəzifə düşünə bilmirəm”, -deyə BMT-nin rəhbəri çıxışının sonunda qeyd edib.
19 (1)jpg_1771885865.jpg)
