Avropa Parlamentinin (AP) deputatları çox yaxşı bilirlər ki, Azərbaycanda yaşayan bütün vətəndaşlara, onun milli, etnik və dini mənsubiyyətindən asılı olmayaraq, bərabər münasibət sərgilənir, hüquqları qorunur və azadlıqlar təmin olunur.
Prezident İlham Əliyevin qanunvericilik təşəbbüsü qaydasında irəli sürdüyü və Milli Məclis tərəfindən qəbul edilən "Konstitusiya və Suverenlik İli" münasibətilə amnistiya elan edilməsi haqqında Milli Məclisin qərarı da dövlətin öz vətəndaşına göstərdiyi humanist və bərabər münasibətin göstəricisidir.
Bu barədə "Azərbaycan" qəzetinə açıqlamasında məlumat verən Milli Məclisin deputatı, parlamentin İqtisadi siyasət, sənaye və sahibkarlıq komitəsinin sədr müavini Azər Badamov bildirib ki, müstəqilliyimizin möhkəmlənməsini, dövlətimizin güclənməsini və xalqımızın sabitlik və rifah içində yaşamasını istəməyən, bundan narahat olan dairələr hər zaman olduğu kimi, yenə də öz repertuarını dəyişmək istəmir: "Avropa Parlamenti Azərbaycanı qəsdən hədəf almaqdan əl çəkmir. Özü də reallıqları kontekstdən çıxardaraq, maraqlarına cavab verən formada hərəkətə keçir. Sual olunur, niyə məhz son zamanlar Azərbaycana qarşı sərt ritorika və addımlar yenidən aktuallaşıb? AP-nin 18 dekabr 2025-ci il tarixli qətnaməsi qərəzdən, iftiradan, milli heysiyyatımıza toxunmaqdan başqa bir şey deyil".
Deputat qeyd edib ki, AP Azərbaycana qarşı qondarma "siyasi məhbus" iddiası ilə çıxış edir, milli zəmində qarşıdurma yaratmaq kimi çirkin məqsəd güdür: "Azərbaycanda siyasi motivli və yaxud da hansısa etnik kimliyə malik olma faktı üzrə məhbus yoxdur. Bundan heç söhbət də gedə bilməz. AP hətta bir az belə ədalətli olsaydı, bu günlərdə 20 min nəfərə şamil olunan amnistiya aktının qəbulunu təqdir edərdi. Onlara Azərbaycan vətəndaşının haqqının müdafiəsi maraqlı deyil. Görünən odur ki, avropalı parlamentarilər sadəcə onların Azərbaycana uzadılan əllərinin kəsilməsindən narahatdırlar. Təbii ki, dövlətə və dövlətin qanunlarına əks gedən hər bir kəs qanun qarşısında məsuliyyət daşımalıdır".
Azər Badamovun sözlərinə görə, AP-nin bu addımı həmçinin vətəndaş cəmiyyəti nümayəndələri vasitəsilə möhkəmləndirilməyə çalışılan etimad mühitinin gedişatına zərbədir. Avropa Parlamenti bu ritorika vasitəsilə gələcək tərəfdaşlıq müqaviləsində ehtiva ediləcək məsələləri artıq təzyiq əsasında formalaşdırmağa çalışır, şərt qoyur, şantaj edir. Bu təşkilat qəbul etdiyi qətnamədə səsləndirilən ritorika ilə Azərbaycan və Ermənistan vətəndaş cəmiyyəti nümayəndələri vasitəsilə möhkəmləndirilməyə çalışılan etimad mühitinin gedişatının qarşısını almağa çalışır. AP-nin bu münasibəti yalan və qərəz, iftiradan başqa bir şey deyildir, proseslərin gedişatını kontekstdən uzaqlaşdırmaq cəhdi daşıyır. Bu, bölgədə sülhün və təhlükəsizliyin təmin edilməsi amalına vurulan zərbə olmaqla yanaşı, sifarişli tərəflərin, maraqlı qüvvələrin təxəyyülünün məhsuludur.
"Azərbaycana qarşı qərəzli qətnamələr qəbul edən Avropanın özündə azad fikir ifadə edən insanların təqib edildiyini, etirazını bildirmək üçün aksiyalara qoşulanların atların təpikləri altına salındığını və itlərin etirazçıların üstlərinə buraxılması hallarını az müşahidə etməmişik. Avropalı parlamentarilər, həqiqətən, insan haqlarından danışırsa, niyə öz ərazilərində haqları pozulan avropalıların hüquqlarının müdafiəsindən heç vaxt bəhs etmirlər?
AP-nin Azərbaycan haqqında qəbul etdiyi qərəzli qətnamə ilə bağlı Milli Məclis bəyanat qəbul edib. Avropalı parlamentarilər Ermənistanda uzun illər ərzində vətəndaşların tapdalanmış haqları haqqında heç vaxt səslərini çıxarmayıblar. Amma Azərbaycana qarşı qərəzli münasibət daim fəailiyyətlərində əsas xətt təşkil edib. Azərbaycan Respublikası Milli Məclisi avropalı deputatların öz müstəqlliyini təmin edərək firavan və təhlükəsiz həyat təmin etmiş ölkəmizə diktə ritorikası ilə ittiham etmək istəklərini kəskin pisləmişdir.
Deputat qeyd edib ki, AP-nin qəbul etdiyi kağız parçaları xalqımızı və dövlətimizi yolundan və özünün ədalətli mövqeyindən heç vaxt çəkindirə bilməz. Əksinə, belə qərəz və ikili standartlarla qarşılaşmağımız bizi daha da birləşdirir və mübariz edir.
Rəşad CƏFƏRLİ,
"Azərbaycan"
31 - Copyjpg_1766537868.jpg)
