Qafqaz Müsəlmanları İdarəsinin sədri, Şeyxülislam Allahşükür Paşazadə süni intellektdən istifadə zamanı mənəvi və etik hədlərin gözlənilməsinin vacibliyini bildirib.
AZƏRTAC xəbər verir ki, o, bu barədə Astanada keçirilən Dünya və Ənənəvi Din Liderləri Qurultayı Katibliyinin XXIV iclasında çıxışı zamanı deyib.
Şeyxülislam qeyd edib ki, rəqəmsal texnologiyaların sürətli inkişafı və süni intellektin həyatın bütün sahələrinə nüfuz etməsi yeni imkanlarla yanaşı, problemlər də yaradır.
Allahşükür Paşazadə mənəvi və etik hədlərin gözlənilməsinin, yaranma ehtimalı yüksək olan fəsadların qarşısının alınmasının vacibliyini vurğulayaraq bildirib ki, süni intellektin ruhu olmadığı üçün o, insanı ibadət prosesində əvəz etməməlidir. O, bu baxımdan dini sahədə süni intellektdən istifadənin Etik Məcəlləsinin təqdimatını yüksək qiymətləndirib.
Şeyxülislam həmçinin bildirib ki, qarşıdurma və müharibələrin səngimədiyi dövrdə cəmiyyətin bütün zümrə və təbəqə nümayəndələrinin, o cümlədən din xadimlərinin üzərinə böyük məsuliyyət düşür. Onun sözlərinə görə, insan qardaşlığı mühitin inkişafı və nifrət çağırışlarının qarşısının alınması istiqamətində fəallıq artırılmalıdır. Dünyanın müxtəlif nöqtələrində günahsız insanlara qarşı zorakılıq hallarına son qoyulması üçün beynəlxalq hüququn qüvvə və imkanlarından istifadə edilməlidir.
Allahşükür Paşazadə iqlim dəyişmələri ilə mübarizədə dinlərin roluna toxunaraq qeyd edib ki, COP29 Bakı iqlim sammiti çərçivəsində keçirilən Dini Liderlərin Zirvə Görüşünün qəbul etdiyi yekun sənəddə - Bakı Bəyannaməsində bu mühüm məsələyə dair mövqe ifadə olunub.
Çıxışının sonunda Şeyxülislam Qazaxıstan dövlətinə, onun rəhbərliyinə və məsul şəxslərə Qurultay Katibliyinin iclasının yüksəksəviyyədə təşkilinə və qonaqpərvərliyə görə minnətdarlığını bildirib, ölkələrimizdə daim sülh və əmin-amanlıq olmasını arzulayıb.
jpg_1790976482.jpg)
jpg_1791359589.jpg)
