Qısa müddət ərzində yaradılmasına baxmayaraq Ağdam Sənaye Parkı rezidentlərin sayına görə Sumqayıt Kimya Sənaye Parkından sonra ikinci, Qarabağın isə ən böyük sənaye mərkəzi hesab edilir. Ağdam Sənaye Parkında hazırda investisiya portfeli 260 milyon manatdan çox olan 28 sahibkarlıq subyektinə rezidentlik, 4 sahibkara isə qeyri-rezidentlik statusu verilib. Parkın 70 faizindən çox hissəsi sahibkarların istifadəsinə verilib.
Bunu AZƏRTAC-ın bölgə müxbirinə açıqlamasında İqtisadi Zonaların İnkişafı Agentliyinin mətbuat katibi Elçin Kazımov deyib.
O bildirib ki, sahibkarlar tərəfindən görülən işlərə 115 milyon manatdan çox investisiya yatırılıb, 653 nəfər daimi işlə təmin edilib. Hazırda Sənaye Parkında 9 müəssisə fəaliyyət göstərir, 5-dən çox müəssisənin isə tikintisi istiqamətində işlər aparılır. Həmçinin cari ildə Parkda tütün məmulatlarının istehsalı müəssisəsinin açılışı nəzərdə tutulur. Müəssisədə işlər artıq tam yekunlaşıb.
“Ağdam Sənaye Parkında fəaliyyət göstərən müəssisələr tərəfindən 2024-cü ilin sentyabrından 2025-ci ilin I rübünədək 85 milyon manatlıq, cari ilin I rübü ərzində isə 63 milyon manatlıq məhsul istehsalı həyata keçirilib. İstehsal olunan məhsulların daxili bazara satılması ilə yanaşı, ixracı istiqamətində də uğurlar əldə edilməkdədir. Belə ki, Ağdam Sənaye Parkının rezidenti “Bafco İnvest” MMC Qazaxıstana xüsusi qoruyucu və poliuretan çəkmələrin ixracına başlayıb. Bu gün Qazaxıstana 5 min cüt ayaqqabı göndərilib. Almaniyanın “Desma” şirkətinin avadanlıqlarından istifadə edilən müəssisənin illik gücü 510 min cüt ayaqqabı istehsalı təşkil edir. Şirkət tərəfindən 67 nəfər daimi işlə təmin edilib”, - deyə o bildirib.
Qeyd edək ki, Ağdam Sənaye Parkında sahibkarlıq fəaliyyətinin inkişaf etdirilməsi üçün əlverişli investisiya mühiti yaradılıb. Belə ki, sahibkarlar dövlət vəsaiti hesabına hazır infrastrukturla təmin edilirlər.
Sənaye parkının rezidentləri qeydiyyata alındıqları tarixdən etibarən 10 il müddətinə əmlak, torpaq, gəlir vergilərindən, həmçinin istehsal məqsədilə texnikanın, texnoloji avadanlıqların və qurğuların idxalı zamanı ƏDV-dən və gömrük rüsumlarından tam azad olunurlar. Ağdam Sənaye Parkında fəaliyyət göstərən sahibkarlara cari il iyunun 1-dək 126 təsdiqedici sənəd verilib. Bu təsdiqedici sənədlər əsasında sahibkarlar idxal olunan texnika və texnoloji avadanlıqlara görə 8 milyon manatdan çox vəsaitə qənaət ediblər.
jpeg_1765975443.jpeg)
