"Milli Məclisin 16 dekabr tarixdə keçirilən plenar iclasında 2025-ci ilin dövlət büdcəsi və büdcə zərfinə daxil olan qanun layihələri üçüncü oxunuşda müzakirə edilərək qəbul olundu. Ölkəmizin 2025-ci il və sonrakı üç ili əhatə edən ortamüddətli dövr üzrə büdcə siyasətinin istiqamət və hədəfləri qarşıda duran bir sıra çağırışlar nəzərə alınmaqla tərtib edilib".
Bu sözləri "Azərbaycan" qəzetinə Milli Məclisin deputatı Zaur Şükürov deyib. Deputat bildirib ki, bir sıra dövlət qurumlarında struktur dəyişikliklərinin baş verməsi, dövlət və icmal büdcələrindən maliyyələşən subyektlərin fəaliyyəti ilə bağlı Prezident İlham Əliyev tərəfindən hökumətə müvafiq icra tapşırıqlarının verilməsi, həmçinin müzakirələr zamanı deputatların bir sıra təkliflər irəli sürməsi səbəbindən 2025-ci ilin dövlət büdcəsinin ilkin layihəsinə müəyyən dəyişikliklərin edilməsi zərurəti yaranmışdı. Əlavə gəlir potensialının səfərbər edilməsi məqsədilə bir sıra publik hüquqi şəxslərin xərclərinin dövlət büdcəsi hesabına deyil, öz gəlirləri hesabına təmin edilməsi nəticəsində təqribən 159 milyon manat vəsaitin bu təyinat üzrə sərbəstləşdirilməsi və bu vəsaitin tam həcmdə ölkəmizin müdafiə və milli təhlükəsizliyinin daha da gücləndirilməsi ilə bağlı tədbirlərin maliyyələşdirilməsinə yönəldilməsi nəzərdə tutulub. "Bununla müdafiə və milli təhlükəsizlik xərclərinin dövlət büdcəsindəki ümumi məbləği 8 milyard 555 milyon manata çatdırılıb. Eyni zamanda büdcə təşkilatlarında malların və xidmətlərin alınması üzrə xərclərin optimallaşdırılması yolu ilə əlavə 36 milyon manat vəsait sərbəstləşdirilərək, ölkə rəhbərinin tapşırığı ilə siyasi partiyalara maliyyə yardımının ayrılması üçün ilkin proqnozlaşdırılan vəsaitin 1,0 milyon manat artırılması, 2025-ci ildə Yaponiyanın Osaka şəhərində keçiriləcək Ümumdünya Sərgisi - Expo-2025-də ölkəmizin təmsil olunması xərcləri də daxil olmaqla dövlət büdcəsində beynəlxalq fəaliyyət üzrə xərclərin 24 milyon manat artırılması, ölkəmizin ixrac və investisiya potensialının təbliği ilə bağlı xərclərin maliyyələşdirilməsi üçün 10,0 milyon manat ayrılması planlaşdırılır", - deyə o əlavə edib.
Z.Şükürov qeyd edib ki, ilkin variantla müqayisədə dövlət büdcəsinin gəlir və xərcləri büdcə təşkilatlarının ödənişli xidmətlərindən daxilolmaların və ona müvafiq olaraq büdcədənkənar xərclərin artırılması hesabına 40 milyon manat çoxalıb. Nəticədə 2025-ci ildə büdcə gəlirlərinin 38 milyard 356 milyon manat, xərclərinin 41 milyard 407,6 milyon manat, büdcə kəsirinin isə 3 milyard 51,6 milyon manat olacağı gözlənilir. 2025-ci ildə büdcə xərclərinin təxminən 41 faizinin sosialyönümlü sahələrə yönəldilməsi nəzərdə tutulur ki, bu da hökumətin növbəti ildə də əhalinin sosial rifahını diqqətdə saxladığını deməyə əsas verir.
Deputat bildirib ki, növbəti il və ortamüddətli dövr üçün büdcə siyasətində Qarabağ və Şərqi Zəngəzurun bərpası, yenidən qurulması, ölkə iqtisadiyyatına reinteqrasiyası və Böyük qayıdışın təmin edilməsi əsas məqsədlərdən biri olaraq müəyyən edilib: "Hazırda işğaldan azad olunmuş ərazilərimizin bərpası Azərbaycan dövlətinin vəsaiti hesabına həyata keçirilməkdədir. Bu ərazilərə Böyük qayıdışın təmin edilməsi, şəhər və kəndlərin yenidən qurulması və bərpası, həmin ərazilərdə müasir infrastrukturların yaradılması məqsədilə növbəti ilin dövlət büdcəsindən 4 milyard manat vəsait ayrılması planlaşdırılır. Prezident İlham Əliyev yeddinci çağırış Azərbaycan Respublikası Milli Məclisinin 23 sentyabr tarixdə keçirilən ilk iclasında, 26 sentyabr tarixdə iqtisadi məsələlərə həsr olunmuş müşavirədə, həmçinin digər çıxışları zamanı səsləndirdiyi mükəmməl rəhbər prinsiplər ölkəmizin sosial-iqtisadi və xarici siyasətinin daha çevik şəkildə formalaşdırılması, iqtisadiyyatımızın bundan sonra daha da şaxələndirilməsi və dayanıqlı inkişaf modelinin təkmilləşdirilməsi xüsusunda vacib əhəmiyyət kəsb edir".
Zaur Şükürov vurğulayıb ki, bu baxımdan Prezident İlham Əliyevin müəyyənləşdirdiyi əsas prioritetlərin - hərbi potensialımızın gücləndirilməsi, milli təhlükəsizliyimizin təmin edilməsi, dövlət sərhədlərinin qorunması, hərbi sənaye kompleksinin inkişafı, sosial məsələlərin, Qarabağın və Şərqi Zəngəzurun bərpasının diqqətdə saxlanılması xüsusilə önəmlidir. Əminliklə demək olar ki, müdafiə qabiliyyətimizin gücləndirilməsinin, Qarabağ və Şərqi Zəngəzurun bərpasının, əhalinin sosial rifahının yüksəldilməsinin prioritet təşkil edəcəyi 2025-ci ilin dövlət büdcəsi ölkə rəhbəri tərəfindən qarşıya qoyulmuş vəzifələrin gerçəkləşdirilməsi üçün etibarlı və dayanıqlı maliyyə təminatı yaradacaq.
Əsmər QARDAŞXANOVA,
"Azərbaycan"
