A qrupunun sonuncu turunda ən maraqlı qarşılaşma Ekvador və Seneqal yığmaları arasında oynanıldı. Qalib gələcək komanda 1/8 finala yüksələcəkdi. Əzmkar, meydançanın bütün zonalarında daha yaxşı təsir bağışlayan Afrika təmsilçisi 2:1 hesabı ilə qələbə qazanaraq 20 ildən sonra mundialın 1/8 finalına yüksəlib. 
Maraqlısı da odur ki, Seneqal millisinin baş məşqçisi Aliu Sisse 2002-ci ildə futbolçu kimi 1/8 finala yüksələn komandasını bu dəfə çalışdırıcısı olaraq bu uğura çatdırıb. 
Həmin dövrdə yığma Yaponiya və Cənubi Koreyanın evsahibliyi etdiyi mundialı 7-ci sırada tamamlayıb. Bu, həm də ölkənin buna qədər dünya çempionatlarında əldə etdiyi ən böyük uğurdur. İndi isə seneqallıların daha yeni nailiyyət qazanmaları üçün yaxşı fürsət yaranıb.  
Qeyd edək ki, yığmanın dəyəri 296,7 milyon avrodur. Komandanın heyətində "Çelsi"dən Eduard Mendi, Xalidu Kulibali, "Bavariya"dan Sadio Mane kimi ulduz futbolçular yer alır. 
Ekvador millisi isə 2006-cı ildə keçirilən dünya çempionatında qrup mərhələsindən çıxmaqla tarixi uğura imza atıb. Komanda 1/16 finalda İngiltərə yığmasına uduzub - 0:1. Ekvador millisinin Amerika kubokunda ən böyük uğuru 4-cü olmağıdır. Komanda iki dəfə - 1959 və 1993-cü ildə turnirdə bu yeri tutub. Kollektiv 2021-ci ildə baş tutan Amerika kubokunu 8-ci sırada bitirib.
* * *
Qrupun digər matçında 1/8 final şansını itirən Qətər qrupun lideri Niderlandla görüşüb. Meydan sahiblərini 2:0 hesabı ilə məğlub edən "narıncılar" qrup qalibi kimi 1/8 finala vəsiqə qazanıb.
Qeyd edək ki, Niderlandın beynəlxalq arenada ən böyük uğuru iki dəfə Avropa çempionu olmaqdır. "Uçan hollandlar" 1976 və 1988-ci ildə keçirilən yarışı qazanıblar. Komandanın dünya çempionatındakı ən yaxşı göstəricisi isə 2-ci olmaqdır. Bu uğura 2010-cu ildə yiyələniblər. Niderland Rusiyada baş tutan (2018) son dünya çempionatının final mərhələsində yer almayıb.
Niderlandın heyətinin dəyəri 494,40 milyon avrodur. Komandanın ən dəyərli oyunçusu Matteys de Lixtdir. "Bavariya"da (Almaniya) çıxış edən müdafiəçinin qiyməti 70 milyon avrodur. Komandanın heyətində "Barselona"dan Frenki de Yonq, Memfis Depay, "Liverpul"dan Vircil van Dayk, "Mançester Siti"dən Natan Ake kimi ulduz futbolçular yer alır. Niderlandın hazırda ən gənc oyunçusu Devin Renşdir. Baş məşqçisi isə Lui Van Qaldır.