Ali məktəb Çində beynəlxalq forumda təmsil olunub

Qarabağ Universiteti Çinin Lanzhou Universitetinin evsahibliyi ilə keçirilən Kəmər və Yol Universitetləri Alyansının (University Alliance of the Belt and Road - UAB&R) 2024-cü il forumunda iştirak edib. Bu məqsədlə universitetin rektoru Şahin Bayramov Çində səfərdə olub. 

Kəmər və Yol Təşəbbüsünün yeni onilliyinin başlanılması ərəfəsində keçirilən forum "Rəqəmsal gücləndirmə, "yaşıl innovasiya" və birgə inkişaf şəraitində beynəlxalq təhsil əməkdaşlığı" (International Education Collaboration Under the Circumstances of Digital Empowerment, Green Innovation and Shared Development) mövzusuna həsr edilib.

Dünyanın bir sıra ölkələrinin ali təhsil müəssisələri, tədqiqat institutları və mərkəzlərinin rəhbərləri, eləcə də beynəlxalq təşkilatların nümayəndələrinin qatıldığı forum çərçivəsində "Kəmər və Yolun yaşıl inkişafı" (Green Development of the Belt and Road), "Rəqəmsal təhsil üzrə əməkdaşlıq perspektivləri" (The Prospects on Digital Education Collaboration) və "Əməkdaşlıq mexanizminin inkişafı" (The Development of Collaboration Mechanism) mövzularında panel sessiyalar keçirilib.

Forumda əsas məruzəçi qismində çıxış edən Şahin Bayramov "Yaşıl inkişaf çağırışlarını cavablandırmaqda universitetlərin rolu: Bir Kəmər, Bir Yol regionunda imkanlar" mövzusunda geniş təqdimat edib. Belə bir beynəlxalq nüfuzlu ali təhsil platformasında Qarabağ Universitetini təmsil etməkdən qürur duyduğunu bildirən Ş.Bayramov dəvətə görə təşkilatçılara təşəkkürünü bildirib. Eyni zamanda rektor foruma evsahibliyi edən Lanzhou Universitetinin 115 illik yubileyi münasibətilə təbriklərini çatdırıb. 

Böyük coğrafiyanı əhatə edən, nəhəng infrastruktur və investisiya layihələrinin həyata keçirildiyi Kəmər və Yol Təşəbbüsü regionunda sürətli sənayeləşmə və urbanizasiyanın ciddi ekoloji problemlərlə müşayiət olunduğunu qeyd edən rektor "yaşıl inkişaf" çağırışlarının həllində universitetlərin əhəmiyyətli rolundan bəhs edib. Ali təhsil müəssisələrinin tədqiqat və innovasiya habı, təhsil və potensialın inkişafı məkanı, siyasət maarifləndiricisi və beyin mərkəzi, əməkdaşlıq və tərəfdaşlıqları təşviq edən platforma kimi unikal mövqeyindən danışan Ş.Bayramov davamlı inkişaf təfəkkürlü gələcək liderləri və mütəxəssisləri yetişdirən universitetləri "yaşıl inkişaf"ın katalizatorları adlandırıb.

Azərbaycanın "yaşıl inkişaf" siyasətinə sadiqliyindən bəhs edən rektor ölkəmizdə davamlı inkişafla bağlı müəyyən edilmiş milli prioritetlərdən və həyata keçirilmiş ardıcıl və sistemli işlərdən danışıb. Vurğulayıb ki, 2024-cü ilin Azərbaycanda "Yaşıl dünya naminə həmrəylik ili" elan edilməsi və BMT-nin İqlim Dəyişmələri üzrə Çərçivə Konvensiyasının Tərəflər Konfransının  29-cu sessiyası (COP29) kimi nüfuzlu bir tədbirin keçirilməsi ilə bağlı qərar ölkəmizin milli, regional və qlobal səviyyələrdə ətraf mühitin qorunmasına və iqlim dəyişikliyinin qarşısının alınmasına verdiyi töhfənin bariz nümunəsidir.

Daha sonra Azərbaycanın işğaldan azad edilmiş regionunda yeni yaradılmış Qarabağ Universitetinin missiyası, vizyonu və strateji məqsədləri barədə məlumat verən Ş.Bayramov təmsil etdiyi ali təhsil müəssisəsinin tələbə mərkəzli və tədqiqat əsaslı universitet kimi regional ekosistemin drayverinə, "yaşıl transformasiya" hədəfli layihələrin reallaşdırılacağı məkana və davamlı inkişafı dəstəkləyən innovativ həllərin təşəbbüskarına çevriləcəyini hədəflədiyini diqqətə çatdırıb. Böyük maraqla qarşılanan təqdimatdan sonra forum iştirakçılarının sualları cavablandırılıb.

Bununla yanaşı, forum çərçivəsində rektor Ş.Bayramov Çinin Lanzhou Universiteti, Şimal-Qərb Normal Universiteti və  Lanzhou Maliyyə və İqtisadiyyat Universitetini ziyarət edib və həmin universitetlərin rektorları ilə görüşüb. Görüşlərdə universitetlər arasında potensial əməkdaşlıq imkanları müzakirə edilib.

Qeyd edək ki, Kəmər və Yol Universitetləri Alyansı 2015-ci ilin 17 oktyabr tarixində Çinin Qansu əyalətinin Dunhuanq şəhərində yaradılıb və "Dunhuanq konsensusu" adlı razılıq əsasında fəaliyyətə başlayıb. "Əlaqəlilik, açıqlıq, inklüzivlik, innovasiya və əməkdaşlıq" vizyonunu rəhbər tutaraq, Dunhuanq Konsensusu ali təhsil üçün ümumi icma yaratmağı hədəfləyir, təhsil, texnologiya və mədəniyyət sahəsində "Kəmər və Yol" boyu ölkələr və universitetlər arasında hərtərəfli kommunikasiya və əməkdaşlığı təşviq edir, ölkələr və regionların ekoloji və sosial inkişafına xidmət edir. Hazırda Lanzhou Universiteti tərəfindən evsahibliyi edilən alyansın 170-dən çox üzv universiteti var. Gələcək kommunikasiya və əməkdaşlığı daha da genişləndirmək və inkişaf etdirmək məqsədilə 2016-cı ildən başlayaraq hər il tematik forumlar keçirilir. Beynəlxalq əməkdaşlığın inkişafına xüsusi önəm verən Qarabağ Universitetinin bu forumda təmsil olunması yeni qarşılıqlı faydalı tərəfdaşlıqların qurulmasına hədəflənib. 

Ülkər XASPOLADOVA,

"Azərbaycan"