Tərtər Rayon İcra Hakimiyyəti yanında İctimai Şuranın üzvləri ailə münaqişələri zamanı yaranan problemlərin həllində yaxından iştirak edirlər. Bu zaman bizi ən çox incidən və rahatsız edən - valideynlərə və uşaqlara olan münasibətdir. Çünki həm yaşlılar, həm də uşaqlar qayğıya, köməyə daha çox ehtiyac duyurlar.
Bu sahədə dövlətimiz kifayət qədər iş görsə də, əsas məsuliyyət ailələrin üzərinə düşür. Çünki dövlətimizin qanunları ilə bərabər, bizim ən dəyərli sərvətimiz xalqımızın yazılmamış qanunları, dəyərli adət-ənənələridir. O ənənələr ki, indi onlar yaxşı qorunmur.
Bu yaxınlarda rayon Ağsaqqallar Şurasının sədri Faiq Məmmədovla bir ailədə olduq. Ananın üç oğlu, üç gəlini vardı. Boylu-buxunlu, yaraşıqlı oğlanlar və gözəl gəlinlər. Yəqin ki, üç oğul dünyaya gələndə anaya gözaydınlığı verib, onu bəxtəvər qadın adlandırıblar. Amma gördüyümüz mənzərə bizdə heç də bu təəssüratı yaratmadı. Ana oğlanlarından biri ilə yaşayırdı. Biz həyətə daxil olanda qoca qadın yuduğu paltarları güc-bəla ilə ipə sərirdi. Hiss olunurdu ki, o, oğlu, gəlini və nəvələri ilə bir evdə yaşasa da, onlar üçün yad bir insandır. Bir azdan o biri oğullar və gəlinlər də gəldilər. Söz-söhbət başladı. Ananın övladlarıyla mübahisə etdiyini və bu zaman nələr çəkdiyini görmək ağır idi. Mülk üstündə mübahisələr, hər şeyin ən yaxşısını asan əldə etmək arzusu bəzi insanlarda o qədər güclənib ki, müqəddəs qohumluq bağları qırılır, münasibətlər korlanır və bunun acısını valideynlər çəkirlər.
Rayonumuzun başqa bir kəndində isə gənc qadın iki övladını atıb tanımadığı, sosial şəbəkə vasitəsilə tanış olduğu insana qoşulub qaçıb. İndi paytaxtda yüngül həyat tərzi keçirir. Bu qadın həyatında kəndindən başqa heç yeri görməmişdi. Yetimçiliklə böyüyüb ailə qurmuşdu, övlad sahibi olmuşdu. Çətinliklə dolanırdılar. Odur ki, övladlarına yaxşı həyat yaşatmaq istəyirdi, əvəzində telefondakı dələduzların toruna düşdü. İndi sosial şəbəkələrdə insan alveri ilə məşğul olan qadınların ikrah doğuran sifətlərinə baxanda düşünürsən ki, bəlkə o bədbəxt yetimlər də dələduzların əməllərinin qurbanı olublar. Bildiyimiz odur ki, haqqında söhbət apardığımız həmin qadın birdəfəlik həyat yoldaşının da, övladlarının da qəlbindən silinib.
Mən o qadına haqq qazandırmıram, ona ana deməyə də dilim gəlmir. Amma dilim gəlir deyim ki, ailələrin dağılmasına, insanların bədbəxtliyinə səbəb olanlara elə cəza verilməlidir ki, belə çirkin işlə məşğul olmağa heç kim risk etməsin.
Azərbaycan qadınının saf, təmiz adını qorumaq üçün bütün cəmiyyət birgə səy göstərməlidir. Amma nə edəsən ki, gecə-gündüz bəzi efirlərdən düşməyən "müğənni"lərin vulqar geyimləri, dəyərlərimizə uyğun gəlməyən serialların nümayişi buna imkan vermir. Elə bunların nəticəsidir ki, cəmiyyətdə ailə dəyərlərinə münasibət dəyişib. İndi valideynlərin də, elə gənc qızların özlərinin də elçi gələnlərə ilk sualı ailənin maddi durumu ilə bağlı olur. Bəzi analar bəri başdan elçilərə bildirirlər ki, "mənim qızım gedib qayınana-qayınataya qulluq etməyəcək, ev işləri görməyəcək". Onsuz da indi evdə işlərin çoxunu məişət texnikaları görür. Ancaq heç bir texnika ailə ocağındakı istiliyi yaratmağa qadir deyil və bu, qadınlarımızın üzərindədir. Belə olmayanda boşanmaların sayı artır, uşaqlar valideynlərin birindən ayrı yaşamaq məcburiyyətində qalırlar. Bu da körpə yaşlarından onlara ağır zərbə olur.
Boşanmaların bir səbəbi də erkən nikahdır. Hazırda bütün cəmiyyətimiz buna qarşı ciddi mübarizə aparır. Qızların vaxtından əvvəl ailə qayğılarını çiyinlərinə götürmələrinin zərəri barədə yüzlərlə canlı nümunə göstərmək olar. Amma nə xeyri, hələ də bəzi valideynlər bundan nəticə çıxarmırlar. Nədir onları buna məcbur edən? Əksər halda yenə də maddiyyat. Düşünürlər ki, imkanlı adamdır, gedib hazır evdə yaşayacaq, əziyyət çəkməyəcək. Belə valideynlər unudurlar ki, həyatda hər şeydən üstün övladının sağlamlığı, onun mənəvi dünyasının rahat olmasıdır. Nikah yaşından tez ailə qurarkən məhz bunlar itirilir.
Hazırda nikaha daxil olan gənclərdən sağlamlıq haqqında arayışın tələb edilməsi, qohumlar arasında nikahın qadağan olunması və hətta bu günlərdə müzakirə edildiyi kimi, narkoloji dispanserdən də arayış istənilməsi ailələrimizin qorunmasına, xəstə uşaqların dünyaya gəlməməsinə xidmət edir.
Azərbaycanda, o cümlədən rayonumuzda yüzlərlə, minlərlə ailə var ki, onlar hər kəsə nümunə ola bilər. Belə ailələrdə böyük-kiçiyin yeri, ər-arvad arasında qarşılıqlı hörmət, valideynlərlə uşaqlar arasında pərdə var. Bu isə təkcə nümunəvi ailə yox, həm də sağlam cəmiyyət və möhkəm dövlət deməkdir.
Svetlana BAĞIROVA,
Tərtər Rayon İcra Hakimiyyəti yanında İctimai Şuranın sədri
